Түһүлгэ

 Тэрийээччилэринэн СӨ Судаарыстыбаннай Мунньаҕа уонна «Ил Түмэн» издательскай дьиэ буоллулар.

“Төгүрүк остуол” бэбиэскэтигэр «Географическай эбийиэктэр ааттарын тустарынан» Федеральнай Сокуону олоххо киллэрии, «СӨ административнай-территориальнай тутулун туһунан» эрэгийиэннээҕи сокуону толоруу, итиэннэ өрөспүүбүлүкэ сирин-дойдутун ааттарын сокуон ирдэбиллэригэр олоҕуран, биир тутулга сөп түбэһиннэрии боппуруостара көрүлүннүлэр.

Мунньаҕы Ил Түмэн билимҥэ, үөрэхтээһиҥҥэ, култуураҕа, иһитиннэриини киэҥ эйгэҕэ тарҕатыыга уонна уопсастыбаннай тэрилтэлэр дьыалаларыгар сис кэмитиэтин бэрэссэдээтэлэ Феодосия Васильевна Габышева ыытта. Оттон көмөлөһөөччү ыытааччынан инники этиллибит кэмитиэккэ бэрэссэдээтэли солбуйааччы, «Ил Түмэн» издательскай дьиэ генеральнай дириэктэрэ Мария Николаевна Христофорова буолла.

Судургу тылынан быһаарар буоллахха, сир-дойду барыта түҥ былыргыттан илдьэ кэлбит ытыктанар ааттаах буолара биллэр. Ол гынан баран, ол ааттарбытын айан суолун бэлиэлэригэр сыыһа суруйа сылдьабыт. Саха сиэрин даҕаны, итэҕэлин да, сурук-бичик быраабылатынан  быһыытынан да оннук суруллара табыллыбат. Холобур, Тааһаҕар нэһилиэгэ Тасагар диэн сурулла сылдьара истэргэ астыга суох. Ама да иккис судаарыстыбаннай тылбыт нуучча тыла буолбутун үрдүнэн, нэһилиэктэрбит, бөһүөлэктэрбит ааттара каартаҕа буоллун, айан суолугар буоллун, төрөөбүт тылбытынан суруллуохтаах. Ону толорор инниттэн, бу мунньахха тыл билимин хандьыдаата, гуманитарнай-чинчийэр институт наукаҕа үлэһитэ Ньургун Багдарыын, СӨ Төрүт Сокуонун Сэбиэтин бэрэссэдээтэлэ Петр Гоголев, СӨ Бырабыыталыстыбатын бэрэссэдээтэлин солбуйааччы Сергей Местников дакылаат оҥордулар, дьон санаатын иһиттилэр.

Мунньахха туох санаа этиллибитин, туох түмүккэ кэлбиттэрин, хайдах быһаарыныы ылыллыбытын туһунан сиһилии хаһыат кэлэр нүөмэригэр ааҕаарыҥ. Ким бу тиэмэҕэ ураты санаалардаах, этиилэрдээх “комментарий” диэҥҥэ суруйан үллэстиҥ.