--Ол эрээри билигин киһи барыта тиэхиньикэлэнэн, киэҥ бааһыналарга олордор буолла, онон оҕуруот аһа атыыга улаханнык барбат. Ол иһин атын хайысханы тутуһан эрэбин: саас Нөмүгүттэн быйылгы уонна былырыыҥҥы төрүөх 70 төбө сүөһүнү аҕалбытым. Ону көрүөм, хотон туттуом. Уруккута сопхуос оттуур Толоон диэн сиригэр 92 гектарга бурдук үүннэрдим. Ону күһүн сенажтыам. 1992 сыллаахха быраҕыллан турбут Дьаам диэн сиргэ дьиэ-уот туттан, уот тартаран, бастаан утаа оҕо лааҕырын үлэлэппитим. Кэлин онтукам турбаза буолбута. Оччолорго кыһыннары сөтүөлүүр бассейн эҥин оҥоро сылдьыбыттааҕым. Оттой быйыл Амма өрүс анныгар ресторан оҥордум. Түннүгүнэн балыктары көрө-көрө аһыыгын. Дьону олордор 5 кыракый дьиэлээхпин. Ону сууккаҕа 1500 солкуобайга уларсабын. Өксөкүлээхпит 2022 сылга төрөөбүтэ 145 сылын туолар. Онуоха диэри айымньыларынан скверэ, түһүлгэтэ, мин базам барыта ситэн-тупсан, биир улахан туристическай кластер буолуохтаах. Өссө биир баҕа санаам -- ити уҥуор хайаҕа өрүс үрдүнэн айанныыр фуникулеру оҥоруу, -- диир рационализатордыы толкуйдаах Данил Егорович.
Киһи ыра санаалааҕын тухары айар-тутар, олоххо дьулуһар, кэрэни кэрэхсиир, сонун сүүрээни сэҥээрэр. Уу анныгар рестораны, кыһын Амма өрүскэ тахсар аһаҕас бассейны оҥорбут Данил Афанасьев “канатнай дорожканы” да мындырдаан айан таһаарыаҕар саарбахтаабаппын.
- 0
- 0
- 0
- 0
- 0
- 0