Баһаары умуруораары волонтердар өрүһү туоруурга күһэллибиттэрэ, уот умайыыта тахсыбыт сиригэр сүүрэн тиийээт, икки өттүттэн умулларбытынан барбыттара.
Уу туризмыгар инструктор Ольга Неустроева кэпсиир: «Буруо өҥө уларыйа турбута, бастаан хара этэ, онтон маҥхайбыта уонна төттөрү хараарбыта. Суостаах уот күүдэпчилэммитэ. Уот биэрэги кыйа, быһа холоон, 50-70 миэтэрэ иэҥҥэ тэнийбитэ уонна үөһэ хайаҕа тахсыбыта. Биһиги тута Буотамаҕа бизонарий директора Семен Семеновичка эрийэн көмө көрдөөбүппүт. Бэйэбитигэр хочулуоктаах уонна бытыылкалаах эрэ этибит».
Арыый хойутуу кинилэргэ үс уол оҕолоох эр киһи кыттыспыта. Ити иннинэ волонтердар уоту умуруора сүүрэн иһэн кинилэри көрбүттэр эбит. Ити кэмҥэ баһаар буола турар сирин үрдүнэн кэтиир сөмөлүөт көтөн ааспыта. Уоту кытта кытаанах охсуһуу 3 чаас кэриҥэ барбыта, уопсай күүһүнэн ойуур баһаара тарҕаныытын бохсубуттара.
Ордук хайа иэнигэр уоту умуруорар олус уустуга. Кылаабынайа, кинилэр барытын кэмигэр бохсон, уот киэҥ сиргэ тэнийиитин таһаарбатахтара.
«Умуруоран баран, биһиги өссө икки чаас устата уулаах гермомөһөөччүктэри илдьэ сылдьан, уу куппуппут. Ханна да аһаҕас уот хаалбатаҕын итэҕэйэн баран, дьэ биирдэ лааҕырбытыгар төннүбүппүт, онтон икки чааһынан Өлүөнэ өрүһү таҥнары байдаркаларынан устубуппут. Ити кэмҥэ «Авиалесоохрана» диэн формаларыгар суруктаах дьон уонна баһаарынай массыына кэлбиттэрин көрбүппүт. Биһиги кинилэргэ чугаһаан, туох быһыы-майгы буолбутун кэпсээбиппит итиэннэ Улахан Ааҥҥа диэри устубуппут. Оттон үс уоллаах эр киһи Евгений диэн, Дьокуускайтан сылдьар эбит. Кини мотоциклынан сылдьар 3 уолу уонна 3 кыыһы көрбүтүн кэпсээбитэ, ол сиргэ сынньаммыттар. Кинилэр кэннилэриттэн баһаар турбут», - диэн РОССОЮЗСПАС волонтера Ольга Неустроева үллэһиннэ.
«СӨ быыһыыр сулууспата» ГБУ ойуур баһаарын умулларыыга булугас өйү уонна хорсун быһыыны көрдөрбүт волонтердарга махталын биллэрдэ.
-
0
-
0
-
0
-
0
-
0
-
0
