Уопсастыба

Быйылгы аахсыйа уратыта диэн оҕо дьиэлэрин уонна коррекционнай оскуола иитиллээччилэригэр, кыаммат уонна элбэх оҕолоох ыалларга бэлэхтэри оҥорору сэргэ, байыаннай хомуурга барбыт дьон оҕолоругар эмиэ бэлэх уунуохха сөп. Оҕолор баҕа санааларын толорор аахсыйаҕа ким баҕарар кыттыан сөп. «Үтүө санаа харыйатыгар» тиийэн оҕо аата суруллубут аккырыыкканы талан ылан, кини баҕа санаатын толороҕун. Аахсыйа тэрийээччитэ - «Үтүө санаа куората» уопсастыбаннай тэрилтэ. Саҥа дьыллааҕы аахсыйа  сэттис төгүлүн ыытыллар.

Ахсынньы 15 күнүгэр Ил Дархан Айсен Николаев «Берегиня» иитиллээччитин 8 кылааһын үөрэнээччитэ Максим Рясик уонна анал байыаннай эпэрээссийэ кыттыылаахтарын оҕолорун баҕа санааларын толордо. «Саҥа дьыл — наһаа үчүгэй, кэрэ бырааһынньык. Оҕолор бука бары туох эрэ дьикти үчүгэйи күүтэллэр уонна кинилэр бу күүтүүлээх кэрэ бырааһынньыкка бэлэх тутуохтаахтар. Быйылгы сыл уратыта диэн, бэлэҕи коррекционнай оскуола үөрэнээччилэрэ, тулаайах оҕолор эрэ буолбакка, анал байыаннай эпэрээссийэ кыттыылаахтарын оҕолоро эмиэ тутуохтара», — диэ быһаарда Айсен Николаев. Ил Дархан Максимҥа квадрокоптер, кырачааннарга куукула уонна көбүөр, оонньуур бэлэхтээтэ.

Ону тэҥэ сылын ахсын ыытыллар аһымал аахсыйаҕа норуот дьокутаата, Хотугулуу-Илиҥҥи федеральнай университет ректора Анатолий Николаев кытынна. «Мин үс оҕо аҕата буоларбынан, оҕолорго бэлэх оҥорор олус үчүгэй. Бэлэхтэри оҕолор саастарынан көрөммүн, кичэйэн таллым. Оҕолор бары сөбүлүөхтэрэ диэн эрэнэбин», – диэн норуот  дьокутаата үллэстэр. Анатолий Николаев аатыттан бэлэхтэри үс ыал биэс оҕото тутуоҕа.

Үтүө аахсыйаҕа норуот дьокутааттарын уопсастыбаннай көмөлөһөөччүлэрэ эмиэ кытыннылар. Хас биирдиилэрэ «Үтүө санаа харыйатын» анныгар  бэртээхэй бэлэхтэри хааллардылар. Сотору кэминэн аахсыйа тэрийээччилэрэ ыйыллыбыт аадырыстарга Саҥа дьыллааҕы бэлэхтэри тиэрдэн биэриэхтэрэ.

Ил Түмэн вице-спикердэрэ Александр Жирков уонна Антонина Григорьева, норуот дьокутааттара Сахамин Афанасьев, Марина Силкина, Мария Христофорова, Иван Семенов, Александр Семенов, Валентин Семенов, Татьяна Егорова, Андрей Находкин, Феодосия Габышева, Владимир Прокопьев, Николай Кульбертинов, Гаврил Алексеев, Юрий Николаев, Наталья Румянцева, Владимир Чичигинаров уо.д.а. оҕолор Саҥа дьыллааҕы баҕа санааларын толордулар. Соторутааҕыта Ил Түмэн Хонтуруоллуур кэмитиэтин бэрэссэдээтэлэ Андрей Николаев Сунтаар улууһугар үлэлии сылдьан, ахсынньы 15 күнүгэр, бу аахсыйаҕа эмиэ кыттыбыта.

Ил Түмэн дьокутааттара «Үтүө санаа харыйата» аахсыйаҕа көхтөөх кыттыыны ылаллар. Эт-хаан өттүнэн доруобуйаларынан хааччахтаах, быстах хомуурга барбыт саллааттар дьиэ кэргэттэрин оҕолоругар бары үтүөнү баҕаран туран, бырааһынньыктааҕы үөрүү-көтүү санаатын өрө көтөҕөллөр, үрдэтэллэр.

Аахсыйа 2015 сылга аан бастаан Дьокуускай мэра Айсен Николаев уонна «Үтүө санаа куората» уопсастыбаннай тэрилтэ көҕүлээһининэн тэриллэн,  2019 сылтан өрөспүүбүлүкэтээҕи таһымнаах буолла. Былырыын тулаайах оҕолорго уонна коррекционнай оскуолаларга анаан 900-тэн тахса бэлэх оҥоһуллубута.

Быйыл аахсыйа сэтинньи 21 күнүттэн ахсынньы 31 күнүгэр диэри  Дьокуускайдааҕы «Бубль Гум» маҕаһыыннарыгар (Кальвица уул. 14/5 уонна Дзержинскай уул. 71), ону таһынан Хозмаркет» маҕаһыыныгар (Чернышевскай уу. 107/1) ыытыллар. Билигин бу аахсыйаҕа Саха Сирин бары улуустара эмиэ кытталлар.

* * *

Бука бары оҕолорбутугар дьоллоох оҕо сааһы баҕаран туран, норуот дьокутааттарыгар уонна бу аахсыйаҕа кыттыспыт тэрилтэ салайааччыларыгар ис сүрэхпититтэн махтанабыт. Эһиги үтүө холобургутун сыаналыыбыт, эһигинэн киэн туттабыт. Чэгиэн туругу, бигэ тирэҕи баҕарабыт. Үүнэр сыл бука барыгытыгар үөрүү үктэллээх, ситиһии сиэтиилээх, дьол аргыстаах буоллун.