Үлэни өрө тутуу төннүөхтээх
Ханнык да киһи сүрэҕэ сөбүлүүр, дууһата сытар идэтинэн үлэлиирэ, чахчыта, кини дьоло буоллаҕа. «Человек труда/Үлэ киһитэ» анал бырайыак Ил Дархан Айсен Николаев 2023 сылы Саха Сиригэр Үлэ сылынан биллэрбитигэр ананар. Үлэни, үлэлээх буолууну уонна үлэ дьонун өрө тутан, дойдубут уонна өрөспүүбүлүкэбит таһымыгар, ордук тыа дьонун туһунан сырдатабыт, Интэриниэт куйаарын ситимигэр тарҕатабыт.
«Норуоту норуот, өрөспүүбүлүкэни өрөспүүбүлүкэ оҥоруохпутун баҕарар буоллахпытына, үлэҕэ сыһыаннаах, үлэни өйдүүр, билэр, төрөөбүт дойдутун, дьонун-сэргэтин таптыыр, ытыктыыр ыччаты иитэн таһаарыахтаахпыт» диэн бэргэн этиигэ олоҕуран, үлэни өрө тутуу төннөрүгэр барыгытын кыттыһаргытыгар, бииргэ буоларгытыгар ыҥырабыт.
Бу видео устуулары Сахапарламент.ру сетевой порталга https://www.sakhaparliament.ru/all-tags/chelovek-truda “Спецпроекты” анал рубрикаҕа киирэн көрүҥ, сэргээн, чугас дьоҥҥутун кытта үллэстиҥ. Баҕар, бу дьоруойдар ортолоругар эһиги чугас аймаххытын, истиҥ доҕоргутун эбэтэр билэр киһигитин көрүөххүт.
Бырайыак дьоруойдара
Бырайыак үһүс таһаарыытын дьоруойа, «СЭТО» эксплуатационнай-тиэхиниичэскэй хааччыйыы сулууспа» иһинэн аварийнай-диспетчерскай сулууспа маастара Гаврил Унаров буолла. «СЭТО» эксплуатационнай-тиэхиниичэскэй хааччыйыы сулууспа» үлэһиттэрин билиһиннэрдэ, сантехниктары, сварщиктары кытта киин куоракка сайаапка быһыытынан хайдах үлэ-хамнас барарын туһунан сырдатта. Ол курдук, канализация, ититии, уу хааччыйыытын систиэмэтин туругун көрөллөр уонна өрөмүөннүүллэр. Күн устата диспетчерскай сулууспаҕа олохтоохтортон 10-тан тахса сайаапка киирэр, оччотугар нэдиэлэҕэ – 100, онтон ыйга – 500-тэн тахса. Гаврил Унаров хомунаалынай-тутуу техникумун бүтэрбит, идэтинэн тутуу-технига, ону тэҥэ электрогазосварщик. Бу тэрилтэҕэ 12 сыл устата үлэлиир.
Оттон төрдүс таһаарыы дьоруойа, «Стабильность-22» хампаанньа дворнига Савва Данилов бу идэҕэ 2019 сылтан үлэлиирин аҕынна. Өлүөхүмэ оройуонуттан төрүттээх, бу иннинэ Нерюнгри куоракка сантехниктаабыт. Үлэ сылын кэрчиктэрин 1980 сылтан завхоһунан саҕалаабыт, аармыйаҕа сулууспалаабыт. «Үлэһиттэр үчүгэйдэр. Мэлдьи хайгыыллар. Баҕар, бу сайын уоппускабын ылан, дойдубар сынньана Өлүөхүмэҕэ айанныам. Аймахтарбар кыстык от булунарга күүс-көмө буолуом, балыктыам, бултуом», – диэн кэпсиир Савва Данилов.
Бэһис, үбүлүөйдээх таһаарыы дьоруойа, биһиги биир идэлээхпит, бэчээт үлэһитэ Семен Пахомов Ю.А. Гагарин аатынан өрөспүүбүлүкэтээҕи типографияҕа бүттүүн өрөспүүбүлүкэ хаһыаттара хайдах, хаһан бэчээттэнэн тахсалларын көрдөрдө. Бу идэҕэ 15 сыл ыстаастаах, устудьуоннуур кэмин саҕаттан типографияҕа үлэлиир. «Үлэбин олус сөбүлүүбүн. Эрэдээксийэ үлэ күнүн түмүктүүр, онтон биһиэхэ – саҥа саҕаланар», – диэн Семен Пахомов типография «кистэлэҥнэрин» сырдатта.
Суруй, кэпсээ, сырдат
Бэйэҕит аттыгытыгар билигин элбэх ситиһиилэрдээх, өр сылларга бэриниилээхтик урут үлэлээн ааспыт, күн ахсын бүгүн бииргэ үлэлии-хамсыы сылдьар, истиҥник убаастыыр, киэн туттар, тэрилтэ сайдарыгар улахан сыратын уурбут, сыаната биллибэт кылааттарын киллэрбит биир идэлээххит туһунан кэпсиэххитин, сырдатыаххытын баҕарар буоллаххытына, биһиги Адрес электронной почты защищен от спам-ботов. Для просмотра адреса в вашем браузере должен быть включен Javascript. электроннай аадырыспытыгар «Үлэ киһитэ/ Человек труда» диэн бэлиэлээх суруктаргытын хаартыскалардаан ыытыҥ.
«Ил Түмэн» хаһыат иһинэн Саха Сиригэр Үлэ сылыгар анаммыт рубрикаҕа сыһыаран таһаарабыт, сыл түмүгүнэн бастыҥ үлэһит дьоруой туһунан кэпсээни эбэтэр ахтыыны анал дипломунан уонна сэмэй бэлэҕинэн бэлиэтиэхпит.
-
0
-
0
-
0
-
0
-
0
-
0
