Үөрүүлээх күн улуус баһылыга Михаил Соров тыыл бэтэрээннэрин, сэрии сылын оҕолорун кытары «Албан Аат» улуустааҕы кыраайы үөрэтэр музейга көрсүһүүтүттэн саҕаланна. Манна Старай Русса таһынааҕы Рамышевоттан кыргыһыы толоонуттан булуллубут сэрии сэптэринэн, малларынан оҥоһуллубут быыстапканы музей салайааччыта Маргарита Попова сырдатта.
Салгыы сэрии ыар тыына хаарыйбыт дьонноро кыттыылаах, Кыайыы Болуоссатыгар үөрүүлээх миитиҥҥэ Сураҕа суох сүппүттэргэ анаммыт пааматынньыкка гирлянда ууруута тэрилиннэ. Мустубут дьон Ф.М. Охлопков аатынан Сынньалаҥ пааркатыгар диэри «Өлбөт үйэлээх полканы» тэринэн хаамтылар.
Параад иннинэ олохтоохтору улуус баһылыга Михаил Соров, нэһилиэк баһылыга Егор Павлов, улуус бэтэрээннэрин сэбиэтин бэрэссэдээтэлэ Маргарита Попова, саҥа көлүөнэ ыччата, улуустааҕы үөрэх салаатын солбуйааччыта Иннокентий Дягилев эҕэрдэлээтилэр.
Кыайыы парадыгар улуустааҕы полиция, баһаарынай чаас, балыыһа үрүҥ халааттаах сиэстэрэлэрин, Алампа аатынан Ытык Күөл 1 №-дээх орто оскуолатын, Д.А. Петров аатынан Ытык Күөл 2 №-дээх орто оскуолатын, А.Е.Мординов аатынан Тааттатааҕы лицей үөрэнээччилэрэ, «Эдэр Карбышевтар» түмсүүлэрэ кыттыылаах холуонналар хаамтылар.
Улуус дьаһалтатын үлэһиттэрэ олохтоохтору уонна параад кыттыылаахтарын саллаат итии хааһытынан күндүлээтилэр.
Күнүһүн олохтоохтор бырааһынньыктааҕы кэнсиэри көрдүлэр.
Киэһэтин Кыайыы Болуоссатыгар «Свеча памяти», «Кыайыы Салюта» тэриллэн, үтүө дьоммут ааттара өлбөт-сүппэт үйэлэммиттэрин өссө төгүл бигэргэтиэхпит.
Ким да умнуллубат, туох да умнуллубат!
Күннэй Маркова хаартыскаҕа түһэриилэрэ
-
8
-
0
-
0
-
1
-
0
-
0
