Бэс ыйын 12 күнүгэр, түүн 10 чаас 40 мүнүүтэҕэ Иркутскай уобалас Киренскэй оройуонун Алексеевскай бөһүөлэгин туһаайыытынан Өлүөнэтээҕи өрүс пароходствота АИ-92 бэнсиини тиэйэн испит «Ерофей Хабаров» диэн танкерыгар Алексеевскайдаҕы РЭБ танкера кэтиллэн, 138 туонналаах систиэринэ тэстэн, Өлүөнэ өрүскэ бэнсиин тохтубута. «Ерофей Хабаров» танкер хамаандата тута дьаһал ылан, саахал тахсыбыта 30 мүнүүтэ иһигэр ууга бэнсиин түһэрин тохтоппута, бэнсиин тохтубут сирин 200 миэтэрэлээх хааччахтыыр быанан төгүрүппүтэ, 300 киилэ иҥэрэр сорбены куппута.
Быһылаан туһунан иһитиннэриини тутаат, Саха Өрөспүүбүлүкэтинээҕи ЫББМ салаата «ураты бэлэмнээх буолуу» эрэсиимин биллэрбитэ. Онон, Ленскэй куоракка тоҕус киһилээх быыһааччылар этэрээттэрэ өрүһүнэн устан кэлэр бэнсиин бээтинэлэрин дьаһайарга бэлэм турар. Этэрээккэ икки катер, 300 миэтэрэлээх хааччахтыыр быа уонна 350 киилэ иҥэрэр сорбент баар. Айылҕаны кэтээн көрөр судаарыстыбаннай кэмитиэккэ уу боруобатын ылан анаалыстыыр үс бөлөх тэрилиннэ.
Күнү-дьылы кэтээн көрөр сулууспа Саха сиринээҕи управлениетын исписэлиистэрэ өрөспүүбүлүкэ территориятыгар бэнсиин бээтинэтэ бэс ыйын 15-16 күннэригэр кэлиэн сөп дииллэр. Бэнсиин тохтубут сириттэн (Киренскэй оройуон Алексеевскай бөһүөлэгиттэн) Ленскэй оройуон Витим бөһүөлэгэр диэри -- 415 км. Бу туһунан Ил Дархан уонна Бырабыыталыстыба пресс-сулууспата иһитиннэрэр.
Хаартыскаҕа Мария Васильева (ЯСИА) түһэриитэ.
-
0
-
0
-
0
-
0
-
0
-
0
