Улуус саамай бөдөҥ хаһаайыстыбата «Тымныы Полюһа» тыа хаһаайыстыбатын потребительскэй кэпэрэтиибэ бэйэтин иһинэн тэриммит «Алгыс» диэн тэрилтэтигэр 200-чэкэ ынах сүөһүлээх. Кэпэрэтиип Остуолба нэһилиэгэр баар Киэҥ Сыһыыттан ходуһа түүлэһэн, бэйэтэ биригээдэ туруоран оттуур, ону таһынан «Күүлэйи» көдьүүстээхтик туһанар, сайын устатыгар хаста да отчуттар улуустааҕы күрэхтэһиилэрин тэрийэр. Онон сүөһүлэрин кыстатар отун аҥаарын хааччынар, ордугун чааһынайдартан атыылаһар. Бу үгэһин быйыл да кэспэтэҕин туһунан кэпэрэтиип бырабылыанньатын салайааччы Екатерина Портнягина маннык кэпсээтэ:
– Айылҕа үчүгэй хараҕынан көрөн, от үүнэн, быйыл Киэҥ сыһыыга дьон барахсаттар оттуу ахан сылдьаллар. Бу былдьаһыктаах күннэри өрүсүһэн, биһиги кэпэрэтииппит биир биригээдэни туруоран оттотор, онно олохтоох орто оскуола үрдүкү кылааһын оҕолоро наставниктар салалталарынан үлэлииллэр. Даҕатан эттэхпинэ, быйыл ахсыс сылын биһиги оҕолору үлэлэтэн, тыа сирин үлэтигэр сыһыарабыт. Үлэлиир-сынньанар усулуобуйаларын тэрийэбит, итии аһылыгы хааччыйабыт, хамнастарыгар күҥҥэ 1500 солк харчыны төлүүбүт, инньэ гынан уолаттарбыт үөрэ-көтө үлэлииллэр. Кинилэри таһынан, 15 киһини дуогабарынан оттотобут. Онон, окко киириэхтэн 50 туоннаны оттоотубут.
Дьэ онно көмөлөһүннэрэн, ааспыт өрөбүлгэ бастакы «Күүлэйбитин» тэрийдибит. Түөрт хамаанда кэлэн кытынна. Остуолба нэһилиэгин хамаандата (салайааччы Василий Харитонов) 3,84 гектар сир отун охсон, мунньан, бастакы миэстэни ылла, 100 тыһыынча солкуобай харчынан бириэмийэлэннэ. Бэйэбит оҕолорбут хамаандата (салайааччы Герман Графов) 2,84 гектар сир отун охсон, харбаан, иккис миэстэни ылла, 80 тыһыынча солкуобай харчынан наҕараадаланна. Кинилэртэн бэрт кыранан хаалан, Дьааҥы куорат хамаандата (салайааччы Сергей Окоемов) 2,83 гектар сир отун охсон, мунньан, үһүс миэстэни ылла, 50 тыһыынча солкуобайынан наҕараадаланна. Биирдиилээн киирсиигэ Остуолба олохтооҕо Дмитрий Гуляев 1,84 гектар сири охсон бастаата, 25 тыһыынча солкуобайынан бириэмийэлэннэ, ол отун харбаан Евдокия Гуляева эмиэ 25 тыһыынча солкуобайынын бириэмийэлэннэ.
Улууспут баһылыга Владислав Иванов, кини солбуйааччыта Дабаан Котельников, үп-казначейство управлениетын начальнига Алексей Харбин уонна үөрэх управлениетын начальнига Иннокентий Юмшанов кэлэннэр, куонкуруһу таһынан от охсон көмөлөспүттэрэ үлэҕэ көҕүлээһин үтүө холобура буолла.
Инньэ гынан, бу икки күн устата барыта 16 гектар ходуһа сирэ охсуллан, 30 туонна от мунньулунна, ону бэйэбит биригээдэбит кытыыга таһан, барытын пресстээн бүтэрдэ. Ол түмүгэр, күн бүгүҥҥү чахчынан, илиигэ туппут оппут барыта 80 туонна буолла! Бу курдук, 150 туоннаны бэйэбит оттуур, 150 туоннаны атыылаһан, кыстыыр оппутун хааччынар санаалаахпыт.
Бу ааспыт өрөбүл күннэргэ, атырдьах ыйын 12-13 күннэригэр, «Тымныы полюһа» кэпэрэтиип улуус дьаһалтатын кытары кыттыһан, «Ыччат күүлэйин» тэрийэн ыытта, 18-һыттан 35-гэр диэри саастаах отчуттар кытыннылар.
Хаартыскалары Екатерина Портнягина ыытта.
-
4
-
0
-
0
-
0
-
0
-
0
