Ааспыт сылларга ардаҕы быыһынан бэрт эрэйинэн оттоммут от сытыйан-ымыйан, сүөһүлэр бэрт ыараханнык кыстаабыттар. Оттон быйыл өрүскэ улахан уу кэлбэтэх, ардах да түспэтэх, инньэ гынан, хаһаайыстыбалар тардылыга суох оттообуттар. Олохтоох дьаһалта тыа хаһаайыстыбатыгар исписэлииһэ Вероника Кулагина иһитиннэрбитинэн, аҕыйах сүөһүлээх ыаллар кыстыыр отторун хааччыммыттар, билигин сүрүннээн элбэх сүөһүлээхтэр эрэ оттуу сылдьар эбиттэр.
– Дьэ, өтөрүнэн буолбатах үчүгэй, өҥ сайын буолла, – диир нэһилиэк олохтооҕо, үлэ бэтэрээнэ Антонина Габышева. – Ааспыт сылларга оттоммут от арыыттан кыһын эрэ тиэйиллэрэ. Быйыл курааннаан, боротуоха уута түһэн, арыыга массыына көҥүл киирэр-тахсар буолан, дьоннор оттообут отторун барытын кыбыыларыгар тастылар. Мин уолум Байанай сэттэ туоннаны оттоон, үс ынахпытын кыстатар отун булунна, билигин, баҕар, эһиил мөлтөх дьыл кэлиэ диэн эбии оттуу сылдьар. Хаһаас хаалбат. Отун барытын рулуоннаан, биир сиргэ чөмөхтөөн баран, бугулунан бүрүйдэ. Бүттэҕинэ, кыбыытыгар таһыахтаах.
Антонина Васильевна бэйэтэ бөһүөлэк иһигэр оттообут: уһуйаан былаһааккатын уонна түөрт уһаайба (сүөһүтэ суох уонна көһөн барбыт ыаллар иччитэх турар уһаайбаларын) отун илиитинэн охсон ылбыт. Аҥардас уһуйаан былаһааккатыгар 17 улахан бугулу туруорбут. Оттообутун барытын кыбыытыгар тиэйтэрэн аҕалбыта, бэйэтэ икки туонналаах от буолан үөрдүбүт!
– От киһини түөһүн тылыгар диэри үүммүт, кураан буолан хаачыстыбата туох да ааттаах, аны, уһаайбабытын ыраастаатыҥ диэн ыалларым махталлара улахан. Сайын устатыгар бастакы ардах бу бэҕэһээ эрэ түстэ, киһилии оттооботохторо ырааппыт дьону дьэ, абыраата. Оҕуруот аһа да бэркэ үүннэ, сир аһа да үчүгэй, хаһаайкалар хаптаҕаһы уонна сугуну кыайдылар, отон да баар быһыылаах, – диэн үлэһит ыал ийэтэ үөрүүтүн кистээбэт.
-
2
-
0
-
0
-
0
-
0
-
0
