Уопсастыба

Бу бэлиэ күҥҥэ Дьокуускайга, Петровскай уулуссаҕа, 17 №-дээх оскуола иннигэр саха судаарыстыбаннай, бэлитиичэскэй диэйэтэлэ Илья Егорович  Винокуровка анаммыт  пааматынньыкка тыыннаах сибэкки дьөрбөтүн ууруу долгутуулаах тэрээһинигэр үп миниистирэ Валерий Жондоров, Ил Түмэн дьокутааттара Андрей Николаев, Ньургуйаана Заморщикова, Эдгар Константинов, киин  куорат думатын дьокутааттара уонна Нам улууһун бэрэстэбиитэллэрэ кытыннылар.

– Хас биирдиибит сүрэҕэр бу ытык күҥҥэ биһиги Саха Өрөспүүбүлүкэтин судаарыстыбаннаһын олохтоспут чулуу дьоммутун ахтан-санаан, кинилэр сырдык ааттарыгар сүгүрүйэн ааһар ытык иэстээхпит. Судаарыстыбаннастаах буолуу Нохтоо Мыымах саҕаттан саха бастыҥ дьонун туруорсубут туруорсуулара буолар, ол туһугар олохторун анаабыттара биһиги биир дойдулаахтарбыт Максим  Аммосов, Илья Винокуров. Билигин Саха Өрөспүүбүлүкэтэ  Ил Дархан Айсен Николаев салалтатынан  Уһук Илиҥҥэ инники күөҥҥэ сылдьарынан биһиги киэн туттабыт, өссө даҕаны сайдыа диэн эрэнэбит, – диэтэ Нам улууһун Мунньаҕын бэрэссэдээтэлэ Алексей Винокуров.

Киин куоракка 17 №-дээх оскуола иннигэр, саха судаарыстыбаннай, бэлитиичэскэй диэйэтэлэ И.Е. Винокуровка анаммыт  пааматынньык 2017 с. туруоруллубута. Ол кэмтэн ыла Нам улууһуттан төрүттээх биир дойдуулаахтар түмсүүлэрэ бу оскуоланы кытары шефтэһэллэр. Түмсүү чилиэннэрэ бүгүн сарсыарда оскуола иитэр-үөрэтэр кэлэктиибин кытары көрүстүлэр,  "Суолталааҕы сэһэргэһии"  кылаас чаастарыгар ыалдьыттаатылар.  Оҕолорго Илья Егорович Винокуров олоҕун, үлэтин-хамнаһын туһунан сырдаттылар.  

Ыспыраапка: 

Илья Егорович Винокуров 1896 сыллаахха Намҥа төрөөбүтэ. 1939--1943 сс. Саха АССР Народнай хамыһаардарын сэбиэтин бэрэссэдээтэлин солбуйааччынан, 1943--1946 сс. бэрэссэдээтэлинэн, 1946-1951 сс. баартыйа обкуомун бастакы сэкиритээринэн үлэлээбитэ. Сэрии саҕанааҕы сут сылларга дойду үрдүкү салалтатыгар  туруорсан, нэһилиэнньэни араҥаччылыыр дьаһаллары тэрийбитэ: холкуостар иэстэрин сотторбута, аһылык саппаас пуондатын тэрийтэрэн, бурдук лимиитин улаатыннаран, сүөһү маассабай төрүөҕүн, сааскы ыһыы, сайыҥҥы оттооһун, күһүҥҥү хомуур курдук дьылы быһаарар сүрүн үлэлэр кэмнэригэр  холкуостарга «итии» аһылыгы тэрийтэрэн, саха норуотун хоргуйууттан өрүһүйбүтэ, 1942 сыллаахха хоту көһөрүллүбүт Чурапчы холкуостара 1944 сыллаахха дойдуларыгар төннөллөрүн ситиспитэ. 1938--1952 сс. Саха АССР бастакы, иккис уонна үһүс ыҥырыылаах Үрдүкү Сэбиэтин дьокутаата. 1957 сыллаахха өлбүтэ.