Сис кэмитиэт бэрэссэдээтэлэ Елена Голомарева төрүт олохтоох аҕыйах ахсааннаах хотугу омуктар түөлбэлээн олорор сирдэригэр олох-дьаһах күннээҕи наадыйыытын хааччыйыыга тирэх буолар аналлаах “Саха Өрөспүүбүлүкэтигэр факторялар тустарынан” диэн сокуон барыла ырытыллар оҥоһуллубутун туһунан кэпсээтэ.
--Ааспыт ыйыгар Анаабыр улууһугар бара сылдьаммын, көһө сылдьар аҕа ууһун общиналарын баһылыктарын кытары көрсүбүппэр, оттугунан-уматыгынан, сапаас чааһынан уонна аһынан-үөлүнэн хааччыйыыга ыарахаттарын көрсөллөрүн, ас-үөл сыаната икки-үс төгүл ыараханын туһунан эппиттэрэ. Кинилэр табаларын мэччитээри сүүһүнэн-тыһыынчанан көстөөх сиринэн көһө сылдьаллар, кыһын “Бураны”, сайын мотуордаах оҥочону туһаналлар. Ямаллар холобурдарынан факториялары тэрийэн табаһыттары хааччыйар быдан көдьүүстээх буолуоҕа, онуоха Аартыка улуустарын кииннэригэр аһыллар эргиэн-логистика кииннэрэ олук буолуохтара. Күн бүгүн аҕыс улууска маннык эргиэн-логистика кииннэрэ үлэлии тураллар, сыаналара удамыр уонна чахчы туһалаах табаардарынан хааччыйар буоланнар, нэһилиэнньэ биһирэбилин ыллылар. Аны 2026 сылга диэри маннык кииннэр Аартыка бары улуустарыгар тэриллиэхтээхтэр, Ил Дархан Айсен Николаев оннук соругу туруорар, -- диэтэ.
Аартыканы сайыннарыы уонна хотугу омуктар дьыалаларын миниистирин солбуйааччы Михаил Погодаев факториялар тустарынан сокуон олус наадалааҕын тоһоҕолоото. Ямал-Ненец аптаныамынай уокуругар 30 фактория баарын, олор табаһыттар көһө сылдьар маршруттарыттан чугас базаланан үлэлииллэрин, маҕаһыыны таһынан, ыскылааттаахтарын, баанньыктаахтарын, онон табаһыттар кэлэн наадалаах табаардарын, аһы-үөлү, оттугу-уматыгы, саппаас чааһы атыылаһалларын таһынан сынньанан баралларын туһунан кэпсээтэ.
--Биһиэхэ факториялар маннык тэриллэллэрэ буоллар, бастакынан көс олохтоох дьоҥҥо олус көмөлөөх буолуоҕа, иккиһинэн олохтоохторго эбии үлэ миэстэтэ тахсыаҕа итиэннэ табаһыттар оҥорон таһаарар бородууксуйаларын соҕотуопкалыыр тиһиги тэрийэргэ тирэх буолуоҕа, – диэн бэлиэтээтэ.
Норуот дьокутаата Виктор Губарев Сэбиэскэй былаас сылларыгар Аллараа Халымаҕа факториялар хайдах үлэлээбиттэрин туһунан аҕынна, урукку үтүө үгэс аныгы олох таһымынан сөргүтүллэрин өйүүрүн биллэрдэ. Мунньах түмүгэр сис кэмитиэт чилиэннэрэ саҥа сокуон барылын салгыы чочуйар оробуочай бөлөҕү тэрийэргэ быһаардылар.
-
0
-
0
-
0
-
0
-
0
-
0
