Устудьуон кыргыттар фото-видео салаатыгар Сергей Арсеньевич Зверев салалтатынан үөрэнэллэр. Кыргыттар кэпсииллэринэн, куурустарыгар 14 ыччат өрөспүүбүлүкэ араас муннуктарыттан үөрэнэр. Ытык Тааттаҕа тус баҕаларынан уонна «Манчаары оонньуулара» ыытылларынан, онно анаан видеоролик оҥорбуттар. Быраактыкаларын кэмигэр ый устата ыытыллыбыт тэрээһиннэри устаннар, таҥаннар, култуура пуондадытыгар үйэтитиигэ хаалларбыттар. Ол курдук, улуустааҕы «Икки сулус» куонкуруһу, «Ыччат баалын», «Сыл бастыҥнара» тэрээһиннэри, өрөспүүбүлүкэтээҕи «Северная звезда» куонкуруһу уонна Кыайыы былааҕын көрсүү тэрээһинин устубуттар.
Аделаида бастакы кууруска үөрэнэригэр «Зина уонна Леха» иккис киинэтигэр икки нэдиэлэ устата режиссер ассисстеныгар (хлопушка) быраактыкаламмыт. Ааспыт сылга режиссер Эдуард Новиков «Сир уһугар» киинэтигэр артыыстарга асисстеннаабыт. Онтон Анастасия «Сүүрүгү утары. Диодоровтар» диэн Анастасия Диодорова туһунан бырайыакка кыттыыны ылбыт, режиссер ассистенынан (хлопушка) сылдьыбыт.
Кыргыттар кэллиэһи бүтэрэн, иккиэн тутуспутунан салгыы Владивостокка үөрэнэр баҕалаахтар. Эдэр дьоҥҥо, Таатта айар күүһэ саҥа, сонун бырайыактары олоххо киллэрэргитигэр тирэх буоллун, суолгутун астын диэн баҕа санаабыт бастыҥын аныыбыт!
-
4
-
1
-
0
-
0
-
0
-
0
