Кэпэрэтиип БТЗ-254К.20 тыраахтары «Сиртэн үүнээйини ылыыны сайыннарыы» бырагырааманан лизиҥҥэ олоҕуран, оттон «Беларус-1221.3» тыраахтары тус сыаллаах муниципальнай бырагыраама «Сиртэн үүнээйини ылыы уонна сүөһү аһылыгын бэлэмнээһин» диэн хос бырагырааматынан атыыласта.
– АПК-ны сайыннарыы тус сыаллаах муниципальнай бырагыраама улууска 2023 сыллаахтан үлэлиир. Былырыын бааһыный хаһаайыстыбалар тиэхиньикэ атыыласпыт ороскуоттарын толойууга үп көрүллэн, алта «МТЗ-82.1.» тыраахтар атыылаһыллыбыта. Хас биирдии тиэхиньикэҕэ 1 мөл. солк субсидия, ол эбэтэр улуус бүддьүөтүттэн холбоон 6 мөл солк харчы көрүллүбүтэ. «Сиртэн үүнээйини ылыы уонна сүөһү аһылыгын бэлэмнээһин» хос бырагырааманан 32 мөл 363 тыһ солк көрүллэн, 11 тыа хаһаайыстыбатын тиэхиньикэтэ ылылынна. Ол иһигэр 7 «МТЗ» тыраахтар: «Болугур», «Үрүйэ» кэпэрэтииптэр иккилии, «Бөтүҥ», «Абаҕа», «Кэскил» уонна А.Николаева биирдэм тэрилтэтэ биирдии тыраахтары ыллылар. Маны таһынан, хаһаайыстыбалар уоҕурдуу киллэрэр, бурдугу быһар хамбаайыны, бараны атыыластылар, – диэтэ улуус баһылыга.
Ас-үөл өттүнэн куттал суох буолуутун хааччынарга Ил Дархан Айсен Николаев эти-үүтү ылыы, оҕуруот аһын үүннэрии көрдөрүүтүн 2030 сылга диэри 1,5 төгүл үрдэтэр соругу туруорар. Хаһаайыстыбалар үлэлэрин көдьүүһүн үрдэтэллэригэр анал тиэхиньикэнэн хаачыллыы быһаарар оруоллаах. Бу туһунан Ил Дархан уонна Бырабыыталыстыба пресс-сулууспата суруйар.
-
0
-
0
-
0
-
0
-
0
-
0
