Уопсастыба

 Дьоһуннаах күн тэрээһинэ улуус дьаһалтатын аактабай саалыгар ыытылынна. Биһирэмҥэ оччотооҕу кэм салайааччылара, Георгий Михайлович бииргэ үлэлэбит, алтыспыт дьоно-сэргэтэ Ытык Күөлтэн, Победаттан, Чөркөөхтөн, Кыйыттан, Уолбаттан, Уус Тааттаттан, Туора Күөлтэн, Харбалаахтан, Чычымахтан уонна Дьокуускайтан тиийэ кэлбиттэр.

Кинигэ көрдөххө дьоҕус, ол эрээри, бастакы сирэйиттэн саҕалаан, биир киһи олоҕо, кини  иккис төрөөбүт дойду оҥостубут Тааттата, алтыспыт, үлэлээбит үтүө-мааны дьонноро кэпсэнэллэр. Ытык Тааттабыт дириҥ устуоруйатыгар Георгий Артемьев биир улахан миэстэни ылар. Тумус туттар аҕа табаарыһын Өксүөнтүй Мординов кэс тылынан Тааттабыт төрүт аатын турууласпыт, төнүннэрбит үтүөтэ үйэлэргэ суруллар, кэпсэнэр дьылҕалаах.

Кинигэ биһирэмин, дойду кэскилэ, “Бастакылар хамсааһыннарын”  кыһыл хаалтыстаах оҕолоро, доргуччу хоһоон ааҕыыларыттан саҕаланна. СКИХ Тааттатааҕы филиалын пуондатыттан көрдөрүллүбүт киинэҕэ Георгий Михайлович бу баардыы, кэпсии турара көрдөрүлүннэ. Мустубут дьону Таатта улууһун баһылыгын социальнай боппуруостарга солбуйааччы Святослав Сунхалыров, дьокутааттар улуустааҕы мунньахтарын бэрэссэдээтэлэ Петр Максимов эҕэрдэлээтилэр, боччумнаах кинигэ күн сирин көрбүтүн бэлиэтээтилэр.

Георгий Михайлович оҕо сааһын үөрэнээччи Инна Максимова сырдатта, тус санаатын эттэ. Хомсомуолтан салайааччы буола үүммүт, уһун сылларга улууспут баһылыгынан үлэлээбит Михаил Соров кинигэни ырытта.

Георгий Михайлович олоҕун сырдатар үс ырыа ылланна: сөбүлээн ыллыыр “Доҕоруом, дабай күөх сыырдаргын” ырыатын Алексей Аржаков, таптыыр, ахтар Тааттатын  Анна Новгородова уонна “Ыллыаҕыҥ нап-намыын ырыаны” Олимпиада Егасова толорон, ахтыылары ырыанан тыыннаан биэрдилэр.

Георгий Михайлович сурукка тиһэн хаалларбыт ахтыыларыгар олоҕуран, Рива Кулаковская, Николай Колодезников, Михаил Архипов, Маргарита Николаева, Светлана Беркина, Марфа Аммосова, Варвара Тихонова, Петр Чярин, Владимир Калачев, Валентина Кривошапкина уо.д.а., кинини киһи кэрэмэһэ, истиҥ доҕор, аҕа табаарыс, сатабыллаах салайааччы, Таатта патриота, кинигэ таһаарааччы быһыытынан сырдаттылар. Маны таһынан Георгий Михайлович үлэтин сырдатар быыстапка тэриллэн, ааспыт кэми санатта.

Дьоһун олоҕу олорон ааспыт, таатталар киэн туттар биир дойдулаахпыт, салайааччыбыт, биир бигэ санаалаах Георгий Михайлович Артемьев туһунан өйдөбүл көлүөнэттэн көлүөнэҕэ умнуллубакка, ахтылла-кэпсэнэ туруоҕа.