Ол туһунан «Оһуокай» түмсүү чилиэнэ Марта Николаева маннык кэпсээтэ:
– Ил Дархан Айсен Николаев ыйааҕынан олохтоммут Оһуокай күнэ быйыл иккис сылын үрдүк таһымҥа ыытылынна. Быйылгы дьаһал биир уратытынан Саха Өрөспүүбүлүкэтин Бырабыыталыстыбата 17 сааһыттан 35-гэр диэри саастаах эдэр этээччилэргэ анаан, «Куйаар далай түһүлгэ» диэн өрөспүүбүлүкэтээҕи күрэҕи тэрийбитэ буолар. Онно уон биир улууска уонна Дьокуускай куоракка барыта 2,5 тыһыынча киһи кыттыбытыттан сүүмэрдэммит 35 финалистан үһүс, иккис, бастакы истиэппэннээх лауреаттар быһаарылыннылар.
Кыайыылаахтары чиэстээһин Оһуокай күнүгэр, сарсыарда 12 чаастан Өрөспүүбүлүкэ болуоссатыгар ыытылынна. Бырабыыталыстыба Бэрэссэдээтэлин солбуйааччы Сергей Местников мустубут дьону эҕэрдэлииригэр: «Оһуокай — бу биһиги өбүгэлэрбититтэн илдьэ кэлбит култуурунай нэһилиэстибэбит, норуоту түмэр, сомоҕолуур, Ийэ дойдуга тапталы, или-эйэни хоһуйар төрүт үҥкүүбүт буолар», -- диэтэ.
Куйаар далай түһүлгэ» күрэх кыайыылаахтарыгар наҕараадалары туттарда. Ол курдук, улуустааҕы, өрөспүүбүлүкэтээҕи күрэх кыайыылаахтарын ортолоругар I истиэпэннээх лауреатынан Денис Оконешников, саҥа саҕалыыр этээччилэргэ I истиэпэннээх лауреатынан Айаал Аммосов буолан, туһааннааҕынан 120 уонна 100 тыһыынча солкуобай суумалаах сэртипикээтинэн бэлиэтэннилэр. Иккиэн Мэҥэ Хаҥалас улууһуттан сылдьаллар. Маны таһынан, иккиэн Иркутскайга, от ыйын 3-6 күннэригэр ыытыллар «Ердын оонньуулара – Евразия норуоттарын оонньуулара» норуоттар икки ардыларынааҕы этнокултуура бэстибээлигэр кыттар путевканы туттулар.
Салгыы Денис Оконешников, Айаал Аммосов «Добун оһуокайы» таһаарар түһүлгэлэрэ буолла.
Күнүс 2 чаастан саҕалаан, киэһэ 6 чааска диэри куорат пааркатыгар, Оһуокай искибиэригэр бырааһынньыктааҕы оһуокай буолла. Хастыы да түһүлгэнэн кыттан, дьон барыта астынан, үөрэн-көтөн тарҕастылар.
Хаартыскаларга Марта Николаева уонна Александр Тарскай түһэриилэрэ.
-
6
-
0
-
0
-
0
-
0
-
1
