Элбэх сүөһүлээх-сылгылаах улуустар сорудахтара улахан. Холобур, Мэҥэ Хаҥалас улууһа 44 369 туонна оту хааччыннаҕына, сүөһүтүн-сылгытын талбаата суох кыстатыахтаах. Бу курдук, Чурапчы улууһа 39 890, Сунтаар улууһа 34 000, Таатта улууһа 32 662, Хаҥалас улууһа 31 000, Уус Алдан улууһа 31 000, Амма улууһа 30 653, Ньурба 29 683, Нам улууһа 27 533, Үөһээ Бүлүү улууһа 24 343, Бүлүү 23 182, Өлүөхүмэ улууһа 14 290, Горнай улууһа 11 881, Кэбээйи улууһа 10 274, Дьокуускай куорат 9 202, Жатай 350 туоннаны оттуур былааннаахтар.
Хотугу улуустары көрдөххө, Дьааҥы улууһа 8 788, Томпо улууһа 5 452, Орто Халыма улууһа 5 000, Өймөкөөн улууһа 3 660, Эбээн Бытантай улууһа 2 501, Абый улууһа 1 968, Уус Маайа улууһа 1 928 туоннаны чөкөтүөхтээхтэр. Бырамыысаланнай улуустартан Ленскэй улууһа 5 722, Алдан улууһа 1 650, Мииринэй улууһа 637 туоннаны хааччыныахтаахтар. Тыа хаһаайыстыбатын улуустардааҕы департаменнарыттан түмүллүбүт чахчынан, барыллаан ааҕыы быһыытынан, өрөспүүбүлүкэ үрдүнэн 394 219 туонна от (былаан 91 %-а) оттонор туруктаах.
Биллэрин курдук, бэс ыйыгар төһө даҕаны тымныы буоллар, от ыйыгар сөҥүү үчүгэйдик түһэн уонна халлаан куйааран, киин, илин эҥээр итиэннэ Бүлүү эргин улуустарга үүнүү куһаҕана суох. От ыйын аҥаарыттан быыстала суох ардаан, окко киирии арыый тардылыннар даҕаны, кыраапыктан улахан хаалыы суох.
Тыа хаһаайыстыбатын уонна ас-үөл бэлиитикэтин министиэристибэтин сүөөү аһылыгын бэлэмнээһиҥҥэ суһал ыстааба иһитиннэрэринэн, атырдьах ыйын 4 күнүнээҕи туругунан, күөх быйаҥ күрэҕэр 23 168 отчут, 9 914 араас мааркалаах тыраахтар, 8 879 звено, ол иһигэр 3 246 толору мэхэньисээссийэлээх, 3 510 ситэтэ суох мэхэньисээссийэлээх, 62 көлө, 2000 илии звенолара тахсан, оттуу сылдьаллар. Барыта 122 982 гектар иэннээх ходуһа сирэ охсуллан, 118 425 туонна от кэбиһиллибит (ол иһигэр, мобильнай биригээдэлэр 3 687 туоннаны оттообуттар). Бу – кыстыыр от 27 %-а. Ону таһынан 600 туонна сиилэс угуллубут, 35 туонна сенаж оҥоһуллубут.
Улуустарынан холобурдаатахха, Мэҥэ Хаҥалас улууһун хотуурдаахтара 17 871, Амма улууһун отчуттара 12 149, Уус Алдан улууһун отчуттара 11 003, хаҥаластар 9 670 туонна оту чөкөтөннөр, инники күөҥҥэ иһэллэр!
-
0
-
0
-
0
-
0
-
0
-
0
