Бастатан туран, олохтоох нэһилиэнньэ көҕүлээһинин өйүүр бырагыраама өрөспүүбүлүкэтээҕи бырайыагынан, 1,5 км. усталаах сайыҥҥы уу ситимэ тардылынна. Нэһилиэк дьоно-сэргэтэ бэйэлэрин көҕүлээһиннэрин олоххо киллэриигэ көхтөөхтүк кытыннылар. Кэлэр 2026 сылга уу ситимин бары ыалларга тиэрдэр, нэһилиэнньэни толору хааччыйар сорук турар.
Ойуур баһаарыттан куттал суох буолуутун ирдэбилин быһыытынан, сэлиэнньэни тулалыыр минералламмыт балаһа саҥардылынна. Уулуссалары тупсарыы үлэтэ сыллата ыытыллар. Быйыл Харитонов аатынан уулуссаҕа, МУАД-тан салгыы кытылга диэри суолга таас кумах кутулунна. Саҥа үлэҕэ киирбит успуорт саалатыгар баскетбол оонньуур щит туруорулунна. Ис эркиҥҥэ сылааһы тутар матырыйаал саайылынна, киирэр ааннарга уонна саала тулатыгар сырдатар лаампалар ыйаннылар. Олох-дьаһах хомунаалынай хаһаайыстыба пуондатын көмөтүнэн, уопсай дьиэлэргэ сылаас уу ситимин ыраастааһын былаан быһыытынан оҥоһулунна. Ону таһынан, оттук сезонугар бэлэмнэнии үлэлэр бардылар.
Түөлбэлэр олохтоохторо Аҕа дойду Улуу сэриитин кыттыылаахтарыгар уонна тыылга үлэлээбит дьоҥҥо анаммыт искибиэргэ, оттон Кырдьаҕастары сынньатар-чэбдигирдэр киин инструктор-сиэстэрэтэ Саргылаана Матвеева салалтатынан ийэлэр «Давдын» түөлбэ искибиэригэр сибэкки олордоннор, бөһүөлэк көстүүтүн тупсарбыттара.
Мирослав Иванов ыччаттарга үтүө холобуру көрдөрдө: Саҥа уонна Почтовай уулуссалары туоруур сиргэ мустубут ууну ханааба хаһан ыыппыта күөх отунан үүннэ. Дьон сылдьарыгар табыгастаах буоллун диэн, мас тэлгэтэн, таастаах кумаҕы кутан, олус үчүгэй тротуары оҥордо. Обургу уолаттары көмөлөһүннэрэн, быраҕылла сытар матырыйаалы (маһы, тимири) хомуйан, кыһын «Буран» көлөлөөхтөр алдьаппаттарын курдук, ититэр ситим тыраассатын бөҕөргөттө. Бу улахан хайҕаллаах дьыала буолар, үтүө санааттан оҥоһуллар ханнык баҕарар үлэни, кыра буоллун, улахан буоллун өр сылларга туһалыырын курдук харыстыахха наада.
Бу курдук Кирбэй нэһилиэгэр сайын бөһүөлэги тупсарыыга былааннаммыт үлэлэр ыытылыннылар.
Хаартыскалары ааптар хааччыйда.
-
0
-
0
-
0
-
0
-
0
-
0
