Дьокутааттар сиэссийэҕэ алта боппуруоһу көрдүлэр. Бастакынан «Дьокуускай куорат» куораттааҕы уокурук тутуутун уонна сири туһаныы Быраабылаларыгар кэккэ уларытыылары киллэрии боппуруоһа көрүлүннэ. Бу боппуруос эрдэ тустаах хамыыһыйаҕа көрүллэн баран, ситэри чочуйууга ыытыллыбыта.
Иккиһинэн, олохтоох салайыныы туһунан саҥа федеральнай уонна өрөспүүбүлүкэтээҕи сокуоннарга, ол иһигэр куораттааҕы уокурук баһылыгын талыы бэрээдэгэр, нуормаламмыт аакталары уонна быһаарыылары ылыныы бороссодууратын тупсарыыга сыһыаннаах пууннарга, сөп түбэһиннэрэн куорат Дууматын Регламеныгар киллэриллэр уларытыылар бигэргэннилэр.
Дьокутааттар бу уларытыылары таһынан, куорат баһылыгын дьокутааттар мунньахтарыгар аһаҕас куоластааһынынан таларга быһаардылар.
Төрдүһүнэн, куорат Дууматын Президиумун уонна сис кэмитиэттэрин туһунан балаһыанньаҕа бэрэстэбиитэллээх уорган үлэтин көдьүүһүн үрдэтэри уонна суһал буолуутун хааччыйан, мунньахтары видеокэмпириэнсийэ киэбинэн эмиэ ыытар туһунан уларытыы киллэрилиннэ. Төрдүһүнэн, ыччат бэлиитикэтин эйгэтигэр таһаарыылаахтык үлэлиир куорат олохтоохторун наҕараадалааһын туһунан быһаарыы бигэргэннэ.
Куорат Дууматын сокуоҥҥа көҕүлээһинин төннөрөр туһунан боппуруос туспа көрүлүннэ. Маннык быһаарыы 2025 с. кулун тутар 20 күнүттэн олоххо киллэриллибит «Аһаҕас былаас кэлим тиһигэр олохтоох салайыныы уопсай бириинсиптэрин туһунан» 33 №-дээх федеральнай сокуон итиэннэ онно сөп түбэһиннэрэн оҥоһуллубут Саха Өрөспүүбүлүкэтин олохтоох салайыныы туһунан сокуонун чэрчилэринэн ылылынна.
Мунньахха дьокутааттар итиэннэ М.К. Аммосов аатынан ХИФУ «Угуйук уонна уопсастыбаннаһы кытары сибээс» хайысхаҕа үөрэнэр үһүс куурус устудьуоннара кытыннылар.
Мунньах түмүгүнэн Дьокуускай куораттааҕы Дуума бэрэссэдээтэлэ Альберт Семенов уонна Жатайдааҕы уокурук дьокутааттарын сэбиэтин бэрэссэдээтэлэ Иван Лавров бэрэстэбиитэллээх уорганнар бииргэ үлэлээһиннэрин сайыннарыыга, сокуону оҥоруу уопутун атастаһыыга уонна дьокутааттар үлэлэрин көдьүүһүн үрдэтиигэ бииргэ үлэлиир туһунан Сөбүлэһиигэ илии баттаатылар. Бу туһунан Дьокуускай куораттааҕы Дуума пресс-киинэ суруйар.
Хаартыска: Дьокуускай куораттааҕы Дуума саайта.
-
0
-
0
-
0
-
0
-
0
-
0
