Тыйыс айылҕалаах хоту дойду олохтоохторугар бултааһын диэн күннээҕи сиир аһылыгы хааччыныы эрэ буолбакка, көлүөнэттэн көлүөнэҕэ бэриллэн иһэр төрүт дьарыкпыт, олох оскуолата, эр санаа кыһата, айылҕаҕа харыстабыллаах сыһыан эйгэтэ.
Ил Түмэн дьокутааттарын уонна өрөспүүбүлүкэ Бырабыыталыстыбатын көҕүлээһиннэринэн, «Бултааһын уонна булт ресурсаларын харыстааһын туһунан» тирэх сокуоҥҥа биэс боччумнаах уларыйыы киллэриллибитэ. Биһиги ураты харыстанар айылҕа территорияларыгар бултааһыны тэрийии бэрээдэгин сокуонунан бигэргэттибит, айылҕаны, тулалыыр эйгэни араҥаччылааһыҥҥа күннэтэ сыралаһар булт судаарыстыбаннай иниспиэктэрдэрин олохторун уонна доруобуйаларын булгуччу страховкалыыры киллэрдибит.
Ураты болҕомто бултааһын тииһилэҥнээх буолуутун боппуруостарыгар ууруллар. Дьокутааттар көҕүлээһиннэринэн, уопсай туһаныллар бултуур сирдэргэ биир эрэ булчут баһылыыра хааччахтанна, бултааһыҥҥа көҥүлү биэриигэ дьэҥкэ мэхэньиисим олохтонно. Сыыппара технологията киллэриллэн, көҥүлү биэрии 87 %-а электроннай киэбинэн оҥоһуллар, булчут билиэтин судаарыстыба өҥөтүн оҥоруу порталын көмөтүнэн ылар кыах үөскээтэ.
Саамай сүрүнэ, холбоһуктаах үлэ үтүө түмүктэри көрдөрдө. Күн бүгүн билим таһымынан ыытыллар судаарыстыба мониторинын чахчыта бигэргэтэринэн, булт ресурсаларын ахсаана элбээн иһэрэ көстөр. Өрөспүүбүлүкэҕэ 2015 сылтан тайах ахсаана 75 тыһыынчаттан 134 тыһыынчаҕа тиийдэ, туртас ахсаана икки төгүл эбилиннэ, киис ахсаана 314 тыһыынчаттан таҕыста. Бу -- эһиги, булчуттар, кылааккыт итиэннэ айылҕаҕа, айылҕа ресурсаларыгар эппиэтинэстээх сыһыаҥҥыт түмүгэ.
Булт хаһаайыстыбата сайдан иһэр. Булт хаһаайыстыбатын сайдыытын 2035 с. диэри Кэнсиэпсийэтэ салааны салайыы, төрүт үгэстэри, булт туризмын сайыннарыы тосхоло буолар.
Булчут күнүнэн, күндү доҕоттор! Барыылаах Баай Байанай бэттэх көрөн мичик гыннын!
Андрей НАХОДКИН, Ил Түмэн сир сыһыаннаһыыларыгар, айылҕа ресурсаларыгар уонна экологияҕа сис кэмитиэтин бэрэссэдээтэлэ.
Хаартыска: Владимир Григорьев.
-
0
-
0
-
0
-
0
-
0
-
0
