«Хас биирдии киһи талааннаах, ураты дьоҕурдаах диэн этэллэр. Ол мэлдьэһиллибэт! Сахабыт сиригэр сыалын-соругун ситиһэр, көхтөөх, айар куттаах эдэр дьон аҕыйаҕа суох. Биһиги ыччаттарбыт хорсун санааларынан, олоххо дьүккүөрдэринэн, кыайыыга дьулуурдарынан атыттартан чорбойоллор», – диэн бэлиэтиир СӨ ыччат дьыалатын уонна социальнай коммуникацияларга миниистирэ Степан Саргыдаев.
«Саха сирин талааннара» бырайыак өрөспүүбүлүкэбит кэскилин түстэһэргэ, сайдар саргытын салайсарга ыччаты каадыр быһыытынан бэлэмниир, сөптөөх суолга хайысхалыыр дьоһун ньыма буолар. Куонкурус урукку өттүгэр киэҥник биллибит «МИНИСТР» дьылабыай оонньуу идиэйэтин салгыыр эрээри, форматынан уонна ирдэбиллэринэн уратылардаах. Манна сүрүн сыал быһыытынан эдэр киһи идэ өттүнэн таһыма үрдүөхтээҕэ уонна салайар кыаҕа арыллыахтааҕа көрүллэр.
Тэрийээччилэр иһитиннэрбиттэринэн, кыттааччылар уопсайа түөрт түһүмэҕи ааһыахтаахтар. Хас биирдиитигэр сорудахтары толорон, саҥа үөрүйэхтэри, сатабыллары иҥэриниэхтэрэ, тустаах испэсэлиистэр санааларын истэн, сонун билиини эбиниэхтэрэ. Куонкурус Интэриниэт ситиминэн ыытыллар буолан, үгүс киһи кыттыһара күүтүллэр. Кыттааччылар 18-тарын сиппит, 45 саастарын ааһа илик эдэр дьон буолуохтаахтар. Балаһыанньаҕа суруллубутунан, «МИНИСТР» дьылабыай оонньуу кыайыылаахтара куонкуруска кыттар кыахтара суох эбит, онтон миэстэлэспэтэх кыттааччылар салгыы холонон көрөллөрүгэр хааччахтааһын суох.
«Финалга киирбит 300 киһи «LAB.TALENT» диэн аныгы кэмҥэ ирдэнэр сүрүн компетенциялары баһылыыр бырагыраамаҕа үөрэниэхтэрэ. Онтон бастыҥнар кэккэлэригэр киирбит 10 кыттааччы грант тутан, аан дойдуга уонна Арассыыйаҕа биһирэнэр үөрэх кыһаларыгар уһуйуллар кыахтаныахтара. Маны таһынан салайар каадырдар резервтэригэр киириэхтэрэ», – диэн чопчулуур миниистир.
Бэлиэтээн этэр буоллахха, бырайыагы СӨ ыччат дьыалатын уонна социальнай коммуникацияларга министиэристибэтэ, итиэннэ СӨ Ил Дарханын инновационнай менеджмеҥҥэ үрдүкү оскуолата сүрүннүүллэр. Интэриэстээх дьону @ya_talant2020 инстаграм сирэйгэ уонна https://komanda.sakha.gov.ru/ru-RU/ya-talant саайтка киирэн билсэргитигэр ыҥыраллар, #ТалантыЯкутии бэлиэнэн матырыйааллары көрөргө сүбэлииллэр.
-
0
-
0
-
0
-
0
-
0
-
0
