Санаттахха, 2010 сылтан саҕалаан СӨ Хотугу норуоттарын оонньуулара Эбээн Бытантай улууһугар төрдүс төгүлүн ыытыллар. Кулун тутар 31 күнүттэн муус устар 2 күнүгэр диэри, үс күн устата, хотугу сир төрүт култууратын, сиэрин-туомун, олохторун укулаатын илдьэ сылдьар хотугу улуустар бэрэстэбиитэллэрэ үгэс буолбут успуорт көрүҥнэригэр күрэс былдьастылар.
Тэрээһин үөрүүлээх аһыллыытыгар Ил Түмэн төрүт олохтоох аҕыйах ахсааннаах хотугу норуоттар уонна Аартыка дьыалаларыгар сис кэмитиэтин бэрэссэдээтэлэ Елена Голомарева, СӨ Аартыканы сайыннарыыга уонна хотугу норуоттар дьыалаларыгар миниистирэ Владимир Черноградскай, СӨ тыатын хаһаайыстыбатын миниистирэ Александр Атласов, СӨ физическэй култуураҕа уонна успуорка миниистирэ Леонид Спиридонов, РФ Уопсастыбаннай балаататын демографияҕа, дьиэ кэргэн сыаннастарын харыстааһыҥҥа хамыыһыйатын бэрэссэдээтэлэ Сергей Рыбальченко, о.д.а. кыттыыны ыллылар.
– Мустубут табаһыттарга айылҕабыт алҕаабытын курдук, ыраас уонна сылаас халлаан туран биэрдэ, -- диэн норуот дьокутаата Елена Голомарева кэпсиир. — Күрэс кыттыылаахтара кыайыыга бары дьулуурдарын уонна маастарыстыбаларын үрдүк таһымнаахтык көрдөрдүлэр. Өрөспүүбүлүкэ алта оройуонуттан 11 хамаанда кыттыыны ылла. Оонньуулар чэрчилэринэн, наарталаах табаларынан сүүрдүүгэ, национальнай таҥаска-сапка күрэхтэһиилэр, маастар-кылаастар, өрөспүүбүлүкэтээҕи «Көс ыал» куонкурус уонна дьаарбаҥка сааскы бырааһынньыгы олус киэргэттилэр.
Наарталаах табаларынан 1, 5, 10 км усталаах ыраах дистанцияҕа сүүрдүүгэ күрэхтэр, муҥутуур чөмпүйүөнү быһаарыы мустубут дьоннор интэриэстэрин тартылар. Успуорт күрэхтэрин бырагырааматыгар наартаны нөҥүө ыстаныы, аркааны быраҕыы уонна эстафета киирбиттэрэ. Хайыһардьыттары табанан соһуу, хотугу тустуу көрүҥэ уонна оскуола саастаах уолаттар ортолоругар «Аин туркил» диэн түргэн наартаҕа аһаҕас турнир ураты сэҥээриини ылла. Успуорт оонньууларын кэмигэр улуус урукку баһылыга Иван Гороховы кытта көрүстүм.
Мин 2008 сыллаахха, Ил Түмэн дьокутаатыгар хандьыдаат быһыытынан кэлбиппэр, Иван Егорович олус үөрэ-көтө көрсүбүтэ. Кинини кытта бииргэ икки ыҥырыылаах Ил Түмэн үлэтин кэмигэр сүрдээх үчүгэйдик үлэлээбиппит. Сотору кэминэн Саккырыыр бөһүөлэккэ бастакы таас оскуола дьиэтэ үлэҕэ киирэриттэн олус үөрэбин. Даҕатан эттэххэ, маннык тииптээх оскуолалар Өлөөн национальнай улууһугар Харыйалаахха уонна Өлөөҥҥө, Эдьигээн улууһугар Кыстатыамҥа, Анаабыр улууһугар Сааскылаахха итиэннэ Булуҥ улууһугар Күһүүргэ тутуллубуттара.
Маны таһынан таас оскуолалар тутуулара Булуҥ улууһугар Таймылыырга, Бороҕоҥҥо, Хара Уулаахха былааннаммыттара. Биһиги норуот дьокутаата Иван Иванович Андреевы кытта ити эбийиэктэри үбүлээһин бүддьүөккэ көрүллэрин хонтуруоллаабыппыт.
– Арассыыйа норуоттарынан уонна төрүт үгэстэринэн күүстээх. Эһиги күүстээх норуоккут, дьиэ кэргэн төрүт үгэстэрин харыстыыгыт. Москубаттан Эбээн Бытантайга диэри 9,5 тыһ. тахса км., ол эрээри бу күрэхтэһиигэ кыттаары көс ыаллар ыраахтан кэлбиттэрэ туохха да тэҥнэммэт.
«Көс ыал» куонкурус дьүүллүүр сүбэ бэрэссэдээтэлинэн талыллыбытым улахан чиэс уонна эппиэтинэс. Бу номинация Бүтүн Арассыыйатааҕы «Сыл бастыҥ ыала» диэн куонкурус балаһыанньатыгар киирэригэр уонна Саха Сирин көс ыала Москубаҕа буолар финалга тиийиэхтэрэ диэн эрэнэбин. Уопсастыбаннай балаата хамыыһыйатын бэрэссэдээтэлэ буоларым быһыытынан, итиннэ сырабын-сылбабын барытын ууруом. Дьиэ кэргэттэргэ, төрөппүттэргэ уонна оҕолорго чэгиэн-чэбдик доруобуйаны, дьолу-соргуну, ситиһиилэри баҕарабын, – диэн Уопсастыбаннай балаата демографияҕа, дьиэ кэргэн сыаннастарын харыстааһыҥҥа хамыыһыйатын бэрэссэдээтэлэ Сергей Рыбальченко баҕа санаатын эттэ.
Елена Голомарева хаартыскаҕа түhэриитэ.
-
0
-
0
-
0
-
0
-
0
-
0
