39 977 ынах төрөөтө
Ааспыт сайын кураан сатыылаан уонна ойуур баһаардара тураннар, оттуурга бэрт уустук балаһыанньа үөскээбитэ. Курааннаабыт улуустар мобильнай биригээдэлэри тэрийэн, үрэхтэр бастарынан, ыраах учаастактарынан көһөн, өрүс арыыларыгар киирэн, сорохтор Амур сиригэр тиийэн оттуурга күһэллибиттэрэ. Ол түмүгэр, былааннаах от 86 %-а хааччыллыбыта, сиилэһи уонна сенаһы бэлэмнээһин сорудаҕа 70-80 % толоруллубута.
Инньэ гынан, татым оттоох улуустар барыта холбоон, 46 тыһыынча туонна оту атыыластылар. Күн бүгүҥҥү туругунан, 213 828 ынах сүөһү, ол иһигэр 78 069 ынах итиэннэ 189 491 сылгы, ол иһигэр 120 129 биэ, кыстыгы туораан эрэллэр. Ыам ыйын 12 күнүнээҕи чахчынан, 39 977 ынах, ол эбэтэр ынах 51,2 %-а төрөөтө.
Ыһыы иэнэ кэҥэтиллиэҕэ
Быйыл сааскы ыһыы үлэтэ бас билии көрүҥүттэн тутулуга суох өрөспүүбүлүкэ үрдүнэн барыта 49,2 тыһыынча гектар иэннээх бааһынаҕа ыытыллыаҕа. Ити иһигэр 10,7 тыһыынча гектарга бурдук, 30,5 тыһыынча гектарга сүөһү сиир култуурата (16 тыһыынча гектарга биир сыллаах, 14,5 тыһыынча гектарга элбэх сыллаах көрүҥнэр), 6,58 тыһыынча гектарга хортуоппуй уонна 1,372 тыһыынча гектарга аһаҕас буорга үүнэр оҕуруот аһа.
Уоҕурдууну хааччынарга быйыл аан бастаан Арассыыйа Тыатын хаһаайыстыбатын министиэристибэтиттэн 33 мөл солк. көмө көрүллэн, 1100 туонна уоҕурдуу (760 туонна азофоска, 160 туонна карбамид, 180 туонна диаммофоска) атыылаһылынна. Өрөспүүбүлүкэ бүддьүөтүттэн 191 мөл. солк. (бурдугу үүннэриигэ 103 мөл., хортуоппуйга 62 мөл. солк., аһаҕас буорга олордуллар оҕуруот аһыгар 26 мөл. солк.) көрүлүннэ.
– Быйыл ыһыы иэнэ эмиэ кэҥэтиллиэҕэ: бурдук ыһыыта 700 гектарынан, сүөһү сиир култууратын ыһыыта 1000 гектарынан, хортуоппуйу олордуу 5 %-ынан, оҕуруот аһын олордуу 2-3 %-ынан, – диэтэ Александр Атласов.
Халааны куттала суох аһардар дьаһал тэрилиннэ
Сааскы халаан уутун сүтүгэ суох аһардарга тустаах дьаһаллар сыллата эрдэттэн бэлэмнэнэллэр. Министиэристибэ халааны утары суһал ыстаабын исписэлиистэрэ улуустардааҕы тыа хаһаайыстыбатын управлениетын үлэһиттэрин кытары олунньу 25 күнүттэн муус устар 25 күнүгэр диэри өрүстэр сүнньүлэригэр сытар нэһилиэктэргэ сүөһүнү-сылгыны, материальнай-тиэхэньиичэскэй сыаннастары страховкалатарга өйдөтөр-сырдатар үлэни ыыппыттар, уу ааһар кэмигэр сүөһүнү-сылгыны таһааран быстах хаайар пууннар туруктарын бэрэбиэркэлээбиттэр, өрөмүөннэппиттэрэ, наада буолар оту-бурдугу хааччыйтарбыттар. Хас биирдии ыалынан төһө сүөһү-сылгы баара өссө төгүл ааҕыллыбыт, ууга барар кутталлаах эбийиэктэр испииһэктэрэ, сүөһүнү-сылгыны үөһэ таһаарыы былаана оҥоһуллубут. Хаһаайыстыбалар өрүс арыыларыгар уонна хочолоругар кыстаппыт, сааһаппыт сылгыларын уу ылбат сирдэригэр таһаарбыттар.
Өрөспүүбүлүкэ үрдүнэн уу ааһар кэмигэр сүөһүнү-сылгынын быстах хаайар 116 пуун баар. Олорго 22 903 ынах сүөһү, 25 532 сылгы таһаарыллыахтаах. Халааны утары суһал ыстааптар уонна тыа хаһаайыстыбатын исписэлиистэрин тэрээһиннэринэн, 13 улууска итиэннэ Дьокуускай куорат таһынааҕы бөһүөлэктэргэ, барыта 52 нэһилиэнньэлээх пууҥҥа, сүөһүнү-сылгыны быстах хаайар пууннарга таһаарар эрчиллиилэр ыытыллыбыттар.
- 1
- 0
- 0
- 0
- 0
- 0