Амма өрүскэ Харама хайата диэн саха киһитэ эрэ барыта ытыктыыр сирэ баар. Харама хайатын туһунан араас үһүйээннэр былыр-былыргыттан кэпсэнэн кэлбиттэрэ. Ол эрээри, айылҕаҕа, ытык сирдэргэ харыстабыллаах сыһыаннарын умнар дьон бааллар. Бу күннэргэ онно сынньана тиийбит хампаанньа киһитэ Амма өрүскэ массыынатын сууйан, астынан, үөрэн-көтөн турар хаартыскатын социальнай ситимнэринэн тарҕаттылар. Дьэ, дьон айылҕаҕа тиийэн сиэрэ суох быһыытын көрдөрөрүн таһынан, онтукатыттан өссө киэн туттара сүрдээх.
Биһиги Амма улууһун айылҕа харыстабылын иниспиэксийэтигэр тахсан, бу киһиэхэ сыһыаннаан туох эмит миэрэ ылыллыбытын туһунан ыйыттыбыт.
Иниспиэксийэ начаалынньыга Семен Заровняев: «Амматааҕы айылҕа харыстабылын иниспиэксийэтигэр массыынатын сууйбут киһи туһунан иһитиннэрии киирбитэ. Хаартыскаҕа массыына судаарыстыбаннай нүөмэрэ көстөр. Амма оройуонун ГИБДД-тын үлэһиттэрэ тута бу киһини көрдөөбүттэрэ, билигин массыына хаһаайына ким буолара быһаарылынна. Административнай ирдэһии дьыалата саҕаланна», - диэн эттэ.
-
0
-
0
-
0
-
0
-
0
-
0
