Көрсүһүүгэ дьокутаат Николай Петрович Саха сиригэр кэлэн барарын туһунан кэпсэппиттэр. «Кинини «Медвежьи острова» диэн саҥа тэриллибит судаарыстыбаннай аан айылҕа заповеднигын быйыл алтынньыга көрөн барарыгар ыҥырдым. Эһэлэр арыылара киһи тылынан кыайан кэпсээбэт ураты, кырасыабай айылҕалаах сиринэн-уотунан биллэр. Ол иһин, бу арыы норуокка үрүҥ эһэлэр үөскүүр ураты ньээкэ уйаларынан биллэр-көстөр, сыаналанар. Биһиги Аартыка эргимтэтигэр үрүҥ эһэ хото үөскүүрүгэр, төһө кыалларынан, кыһаллыахтаахпыт-мүһэллиэхтээхпит, ону ситиһэргэ сөптөөх үлэни ыытарга дьулуһуохтаахпыт», - диэн норуот дьокутаата Аркадий Анатольевич иһитиннэрдэ. Санатар буоллахха, 1980-с сс. «Чайгургино» заказник тэриллибитигэр, үрүҥ эһэни харыстыырга аналлаах тэрилтэни тэрийэр туһунан идиэйэ үөскээбит. 2000 сыллар эргин Эһэ арыыларыгар үрүҥ эһэ мэнээхтээбитэ биллэр, ол туһунан заказник иниспиэктэрдэрэ иһитиннэрбиттэр. 2006 сыллаахха ити түбэҕэ 76 үрүҥ эһэ баарын аахпыттар. «Медвежьи острова» заповеднигы тэрийэр туһунан боппуруоһу СӨ экологияҕа миниистирэ Сахамин Афанасьев уонна СӨ биологическэй ресурсаларга департаменын салайааччы Яков Сивцев көтөхпүттэр уонна докумуонун оҥорууга ылсан барбыттар. Заповеднигы тэрийэр туһунан дьаһалга РФ Бырабыыталастыбатын Бэрэссэдээтэлэ Михаил Мишустин быйыл от ыйыгар илии баттаабыта. Билигин заповедник ыстаата бигэргэтиллэн, үрүҥ эһэни харыстааһыҥҥа аналлаах үлэ саҕаланыахтаах. Ол курдук, мантан күһүн үрүҥ эһэ көһүүтэ (миграция) саҕаланар кэмигэр тустаах үлэһиттэр заповедник сиригэр-уотугар баар буолуохтаахтар. Бу күннэргэ заповедник сиригэр-уотугар 21 үрүҥ эһэ (18 улахан эһэ, 3 оҕолоро) баара биллибит.
-
0
-
0
-
0
-
0
-
0
-
0
