Тэрээһин үөрүүлээх быһыыга-майгыга аhыллыытыгар мустубуттары СӨ Бырабыыталыстыбатын бэрэссэдээтэлин солбуйааччы Сергей Местников, култуура миниистин маҥнайгы солбуйааччыта Афанасий Ноев эҕэрдэлээтилэр. Кыттыыны СӨ улуустарыттан норуот маастардара, уопсастыбаннас, салайааччылар ыллылар. Ыалдьыттар Казахстантан, Москуба куораттан, Алтай, Бурятия өрөспүүбүлүкэлэриттэн, Камчатскай уонна Хабаровскай кыраайтан тиийэ кэлбиттэр.
Сергей Местников Ил Дархан уонна бырабыыталыстыба аатыттан Норуот маастардарын пуорумун үөрүүлээх аһыллыытынан эҕэрдэлээтэ. Кини Саха Сирэ дойдубут үрдүнэн үгэс буолбут норуот ускуустубатын сайыннарыыга инники күөҥҥэ сылдьарын, норуот маастардара үгэспитин киэҥник тарҕаталларын, киэҥ билиилээхтэрин, уопуттаахтарын бэлиэтээтэ.
“Өрөспүүбүлүкэ таһымыгар өйөбүл эрэ буолбакка, норуот үгэскэ кубулуйбут нэһилиэстибэтин харыстыырга, сайыннарарга тус сыаллаах судаарыстыбаннай бэлиитикэ ыытыллар. Бастатан туран, судаарыстыбаннай анал үөрэх тэрилтэлэрэ сыллата киэҥ билиилээх исписэлиистэри бэлэмнииллэр. Бу Аартыкатааҕы култуура уонна ускуустуба института, араас колледжтар уонна училищелар.
Норуот маастардарын судаарыстыбаннай “Симэх” галерея түмэр. Араас маастар кылаастары, уопсастыбаннай бырайыактары, күрэхтэһиилэри тэрийэн, үгэспитин харыстыыллар, дьоммутугар-сэргэбитигэр билиһиннэрэллэр уонна сайыннараллар.
Ааспыт сылга Таатта улууһун Томторугар Мандар Уус түмэлэ үөрүүлээх быһыыга-майгыга арыллыбыта. Манна тимир уустара түмсэр, уопут атастаһар кыахтаннылар. Култуура уонна үөрэхтэһин, чуолан үөрэнээччилэргэ уопуту сыһыарыы бу кииҥҥэ баар буолара үчүгэй саҕалааһын.
Былырыын Уһук Илиҥҥэ аан маҥнайгы киэҥ-куоҥ, аныгы бириэмэҕэ толору эппиэттиир “Үлэ кыбаартала” аhыллыбыта. Олус кэскиллээх кластер”, - диэн эттэ.
Санатан эттэххэ ,кулун тутар 5 күнүгэр Норуот маастарын күнүн өрөспүүбүлүкэ хас биирдии муннугар бэлиэтиэхпит. Быйылгы тэрээһин “Симэх” норуот ускуустубатын галереята тэриллибитэ 30 сылыгар ананар.
Дьокуускайга кулун тутар 3-6 күннэригэр Өрөспүүбүлүкэ маастардара түмүстүлэр. Араас быыстапкалар, маастар-кылаастар, кэпсэтиилэр ыытыллыахтара. Саамай күүтүлээх үгэскэ кубулуйбут сахалыы таҥастаах сэлэлии хаамыы кулун тутар 5 күнүгэр буолуо.
-
0
-
0
-
0
-
0
-
0
-
0
