Ѳрѳспүүбүлүкэ Баhылыгын «Саха Ѳрѳспүүбүлүкэтигэр үгэс буолбут духуобунай-майгы-сигили сыаннастарын харыстааhын уонна бѳҕѳргѳтүү стратегическай приоритеттарын тустарынан» ыйааҕын бырайыагар култуура диэйэтэллэрин экспертнэй этиилэрэ киллэриллиэхтэрэ. Маннык кэпсэтии СѲ Баhылыга култуура диэйэтэллэрин кытта кѳрсүhүүтүгэр буолла.
Баhылык элбэх омуктаах култуураны салгыы сайыннарарга РФ Бэрэсидьиэнэ Владимир Путин ыйааҕынан бигэргэтиллибит Арассыыйа үгэс буолбут духуобунай-майгы-сигили сыаннастарын харыстааhыҥҥа уонна бѳҕѳргѳтүүгэ судаарыстыбаннай бэлиитикэ тѳрүттэрэ олук буолуохтара диэн ыйан туран, ити ыйааҕы олоххо киллэрэр тэрээhиннэр былааннарын сотору кэминэн бигэргэтиигэ биэрэргэ сорудахтаата.
Кѳрсүhүүгэ ону тэҥэ СѲ Бастакы Бэрэсидьиэнэ Михаил Ефимович Николаев аатын үйэтитиигэ этиилэри киллэрэргэ сорудах бэрилиннэ. Быйыл М.Е. Николаев тѳрѳѳбүт күнүгэр – сэтинньи 13 күнүгэр сѳп түбэhиннэрэн, үйэтитии туhунан ыйаахха илии баттаныаҕа.
2025 сылга ѳрѳспүүбүлүкэҕэ саха суругунан уус-уран литэрэтиирэтин 125 сыла бэлиэтэниэҕэ, тэрээhин дьаhалыгар хайыы үйэ илии баттаммыт. Саха суругунан уус-уран литэрэтиирэтэ А.Е. Кулаковскай-Ѳксѳкүлээх Ѳлѳксѳй 1900 сыллаахха суруйбут «Байанай алгыhа» айымньытыттан тѳрүттэммитинэн ааҕыллар.
«Бүгүн биhиги дойдубут Илин диэки хайыhар. Арассыыйаны, кини култууратын таптыыр миллиардынан киhиэхэ уонна, бастатан туран, Азия дойдуларыгар биhиги тугу этэрбит да, кѳрдѳрѳрбүт да баар. Ураты култууралаах уонна элбэх эйгэҕэ үтүѳ ситиhиилэрдээх Саха Сирэ Аартыкаҕа уонна Азияҕа култуура сайдыытын флагмана буолар кыахтаах. Бу эмиэ дойдубут интэриэhигэр биhиги чугастааҕы сылларга быhаарыахтаах соруктарбытыттан биир сүрүннэрэ», — диэтэ Айсен Николаев.
-
1
-
0
-
0
-
0
-
0
-
0
