Издательский дом Редакция Подписка
Погода в Якутске: . -13 oC

Куорат күнүн көрсө, Дьокуускай баһылыга Евгений Григорьев суруналыыстарга пресс-кэмпириэнсийэ биэрдэ.

Куорат күнүн көрсө, Дьокуускай баһылыга Евгений Григорьев суруналыыстарга пресс-кэмпириэнсийэ биэрдэ.

2032 сылга Дьокуускай ирбэт тоҥҥо тутуллубут саамай бастыҥ куорат буолан, өрөгөйдөөх 400 сылын дьоһуннук тэринэн көрсүөҕэ. Бу туһунан Ил Дархан Айсен Николаев «Саха Өрөспүүбүлүкэтин киин куората Дьокуускай 2032 сылга диэри сайдыыта» диэн ыйааҕа, куорат маастар-былаана, араас кэскиллээх бырайыактар бигэргэтэллэр, онон аны 10 сылынан Дьокуускайбыт киһи билбэт гына тупсарыгар эрэнэбит да, ону эрэйэбит даҕаны.

Холобура, бу соторутааҕыта «Якутск 4.0.0 Старт» диэн пуорум буолан ааста. Онно Дьокуускай инфраструктуратын саҥардыы сүрүн хайысхаларын быһаарыстылар: уу ситимин тардыы, көҕөрдүү үлэтэ, уулуссалары сырдатыы, суоллары оҥоруу, сквердэри, болуоссаттары тупсарыы, социальнай эбийиэктэри тутуу, о.д.а.

мээр

Мээр Евгений Григорьев “Комсомольская правда” хаһыакка биэрбит интервьютугар аквапаарка уонна экстрим-паарка тутуллуохтааҕын туһунан этэн турар. Билигин онно 3 га иэннээх сирин булан,  ыраастыы сылдьаллар. Онно уу, уот тардыллар кыахтаах. Оттон сынньалаҥ паарката кыһыннары үлэлиир буолуоҕа.

Арыгыны атыылыыр маҕаһыыннары, сымыйа-кафелары хайдах аччатар туһунан боппуоруоска киин куорат баһылыга: “Ил Түмэн манна сыһыаннаах сокуоҥҥа кэккэ уларытыылары киллэрээри сылдьар. Сокуонунан эрэ кыайар кыахтаахпыт”, -- диэтэ. Ол сокуон ылыллан, күүһүгэр киирдэҕинэ, 100 кв.м кыра иэннээх сымыйа-кафелар (аахпыттарынан 42 баар) сабыллыахтаахтар. ''Ону таһынан бу хааччахха 2 ресторан хабыллар. Дьиэлэрин-уоттарын иэнэ кыратынан. Ол эрээри тустаах урбаанньыттары кытары көрсөн быһаарсыахпыт, кэпсэтэргэ бэлэммин. Биһиги, бастатан туран, сымыйа-кафелары утары охсуһабыт. Икки остуолу туруоран баран, биир хос саҕа иэннээх сиргэ пиибэни, онтон да атын итирдэр утахтары атыылыыр туочукалары суох оҥоруохтаахпыт”, - диэн эттэ.

Ленин проспега хаһан оҥоһуллан бүтэрин бары да кэтэһэбит. Маныаха Евгений Григорьев: ''Үлэбит түргэн тэтимнээхтик барыан, үгүс харгыстары көрүстүбүт. Хаһан саҕалааппытын кытта, былыргы көмүүлэр көстүбүттэрэ, ону быһаарарга бириэмэ барбыта. Аны буорбут суураллан эҥин... Ити курдук көһүппэтэх өттүттэн мэһэйэ элбэҕэ... Ол да буоллар бүтэрэн эрэбит. Дириҥэ 3 миэтэрэни хастыбыт. Алтынньыга диэри аспаалынан бүрүйүөхпүт, ол кэнниттэн суол бэлиэлэрин туруоруохпут", -- диэн эрэнэрдэ.

2791 1

Куораты көҕөрдүү боппуруоһугар Евгений Николаевич: “Маһы син балачча олордобут эрээри, үксэ өлөр. Онон үлэлиир ньымабытын уларытыахпыт. 10 сылга үлэлиир тэрилтэлэри кытары хантараак түһэрсиэхпит. Кинилэр мас салгыы үүнэрин хонтуруоллуохтаахтар. Иккиһинэн, ''Киһи бу күн сиригэр оҕо төрөтүөхтээх, мас олордуохтаах, дьиэ туттуохтаах” диэн этии баар. Ону мас олордор иэспитин үксүбүт кыайан толорбокко хаалар. Онон олохтоохтор бэйэлэрэ мас олордор былаһааккаларын тэрийиэхпит.  Уопсайынан, куораты көҕөрдүүнү туспа муниципальнай бырагыраама быһыытынан оҥорор туһунан «Якутск 4.0.0 Старт»  пуорумҥа кэпсэттибит'', -- диэн быһаарда.

Евгений Николаевич эппитин курдук, Саха Сирэ хаарбах дьиэ ахсаанынан Арассыыйаҕа бастакы миэстэҕэ сылдьар. Олору барыларын көтүрэн, күрдьэн, онно олорор дьону саҥа дьиэҕэ-уокка көһөрүү – куорат сүрүн соруга. Онуоха федеральнай киинтэн эбии үп көрдөһүөхтэрэ. Билиҥҥи туруган олорор дьиэ үс гыммыт биирэ – мас дьиэ. Онно 35 тыһыынча киһи олорор.

Элбэх оҕолоох ыаллар босхо сир ылар уочараттарыгар 7000 кэриҥэ дьиэ кэргэн турарын туһунан өрүү этэллэр да, боппуруос быһаарыллан биэрбэт. Онно төрүөт элбэх. Федеральнай сокуон ирдэбилинэн, бэриллэр учаастак суоллаах, уоттаах буолуохтаах. “Инфраструктурата суох учаастактары аны биэрбэппит. Бүлүүлүүр, Намныыр аартыктарга, Маҕан суолугар суолу оҥорор, уоту тардар үлэ ыытыллар”, -- диэтэ киин куорат аҕа баһылыга.

Куорат кыһалҕата элбэх. Ол эрээри Москуба биирдэ баар буолбатаҕа. Сыыйа биһиги да куораппыт олорорго бэрт табыгастаах буолуоҕа. Манна диэн эттэххэ, аҕыйах сыл иһигэр төһө уларыйбытын, тупсубутун бары да бэлиэтии көрө сырыттахпыт. Онон кутуйах түүлэннэҕинэ ычча диирин курдук, олохпут таһыма тупсан истэҕин ахсын итэҕэһин-быһаҕаһын куолулуу эрэ сылдьыбакка, хас биирдиибит Дьокуускайбыт тупсарын туһугар кыһаллыаххайыҥ.

  • 2
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением
Лента новостей

Суоппар буолар уустугурда

Муус устар 1 күнүттэн байаҥкамаат бэбиэскэтиттэн куотунар дьону тырааныспары ыытар…
28.03.24 17:19
Лента новостей

Интерактивнай быыстапка

«Арассыыйа – Мин устуоруйам» мультимедийнай устуоруйа пааркатыгар кулун тутар 20 күнүттэн…
28.03.24 16:23