--Уруккуттан сааланыахпын баҕарарым. Эмиэ даҕаны дьахтарга сэрэхтээх дьарык. Ол эрээри умсугутуулаах. Нууччалыы эттэххэ, азартаах.
Былырыын сааҕа көҥүл ылан, бастакыбын кустаабытым. Күһүнүн мас көтөрүгэр сылдьабын. Бэйэбэр анаан саа атыыластым. Таҥаспын-саппын эмиэ булчукка табыгастаах гына дьаһаммытым.
Кэргэммин кытта ырбыылары, күөллэри, маардары кэрийэн көрөбүт. Үксүн күнүнэн эргийэн кэлэбит. Биирдэ эмэ хонобут. Ол иһин дурда, үүтээн туттубаппыт Кус кынатын тыаһын иһиттибит даҕаны, иккиэн чуумпуран, кэтээн олоробут. Биһиги улууспутугар үксүн моонньоҕон, көҕөн кэлэр. Кыҥыырын саҕана, аны кыһыл кинигэ көтөрө буолуо диэн, эмиэ да сэрэхэчийэҕин. Ол эрээри оннуктары көрө иликпит.
Кэргэним отой кыра эрдэҕиттэн бултуур буолан, ыраах сирдэргэ соҕотоҕун сылдьар. Мин икки кыра оҕолоох буолан, оннук билиҥҥитэ тэйбэппин.
Кэлиҥҥи сылларга сааланар кыргыттар элбээтилэр ээ. Кэргэннэрин, аймах уолаттарын кытары тэҥҥэ сылдьыһаллар. Бу дьиэ кэргэн сыһыаныгар даҕаны олус туһалаах эбит. Эргин кытта өссө чугасыһаҕын, уһуктан эрэр айылҕа устун хааман иһэн, ирэ-хоро кэпсэтэҕин. Этэргэ дылы, бэйэтэ романтика.
Сааскы куска дьахтар киһи таҥаһын үчүгэйдик көрүнүөн наада. Күнүс сылаас курдугун аанньа, халлаан албын, түүнүн олус тымныйар. Иккиһинэн, кус халлаан хараҥарыыта ууга түһэр буолан, кыраҕы харах, сымса туттуу наада. Күһүҥҥү булт оннооҕор ордук. Сылаас даҕаны, үөн-көйүүр даҕаны аҕыйыыр.
Дьиэбит таһыгар, оҕолору үөрэтэ таарыйа, воздушканан сыал ытабыт. Онон бу эр дьон сөбүлүүр дьарыга эрэ буолбакка, кыыс аймах даҕаны сыстар, ылларар эбит.
- 13
- 4
- 1
- 0
- 0
- 0