Сугулааны Иван Шамаев, Саргылаана Ноева, Афанасий Гуринов-Арчылан, Марина Кириллина, Вилюяна Никитина, Ньургун Бэчигэн, Жанна Барашкова, Февронья Шишигина, Дьулустаан Осипов иилээн-саҕалаан ыыттылар.
Сүрүн мунньах кэнниттэн 6 сиэксийэнэн дьүүллэһии буолбута:
- Үөрэх тыла;
- Ааҕар Саха Сирэ;
- Сахалыы контент;
- Саха тылын үөрэтиини тупсарыы;
- Дьыссаат, алын сүһүөх кылаас;
- Саха тылын, сиэрин иҥэрии.
Ньургун Бэчигэн оҥоһулла сылдьар "Сахалыы" диэн саха тылын үөрэтэргэ аналлаах сыһыарыытын туһунан кэпсээтэ. Бырагырааманы оҥорууга судаарыстыба 3,5 мөл. солкуобайы көрбүт эбит. Сыһыарыы маҥнайгы релиһэ ахсынньы саҥатыгар буолара күүтүллэр.
Программист Тарас Егоров "Тылтай" диэн сахалыы тылы таайтарар оонньуулаах бырагырааматын салгыы сайыннарар былааннааҕын эттэ. Учууталлар: "Оскуола оҕолорун үөрэтиигэ бу сыһыарыыны туттуохха сөп", -- диэн санааларын биллэрдилэр.
Юрист Иван Ядреев омуктуу киинэни сахалыы тылбаастаатахха, дьон тоҕо көрбөтүн туһунан санаатын эттэ. Кини этэринэн, тылбаастанар айымньылары дьон номнуо нууччалыы тылынан көрбүт буолар. Ол иһин иккистээн ону көрөр интэриэһэ суох. Дьон болҕомтотун тардаары, нууччалыы тылбаастамматах наһаа киэҥник биллибэтэх киинэлэри сахатытыахха наада. Холобур, татаардар Бразилия сэрийээллэрин бэйэлэрин тылларыгар тииллээн, дьахтар аймах төрөөбүт тылыгар сыстыытын ситистилэр.
Форумҥа элбэх сэргэх бырайыак этилиннэ. Киирбит этиилэр бары испииһэккэ резолюцияҕа бигэргэннилэр. Саха тылын харыстыыр, сайыннарар үлэ араас хайысхаларынан салгыы даҕаны бара турар.
Мунньах туһунан сиһилии "Ил Түмэн" хаһыакка ааҕыҥ
-
4
-
1
-
0
-
0
-
0
-
1
