Издательский дом Редакция Подписка
Погода в Якутске: . -13 oC

"Ийэ тыл" көҥүл түмсүү бастакы мунньаҕын Иван Шамаев, Саргылаана Ноева, Афанасий Гуринов-Арчылан, Марина Кириллина, Вилюяна Никитина, Ньургун Бэчигэн, Жанна Барашкова, Февронья Шишигина, Дьулустаан Осипов иилээн-саҕалаан ыыттылар. Сүрүн мунньах кэнниттэн 6 сиэксийэнэн дьүүллэһии буолбута: Үөрэх тыла; Ааҕар Саха Сирэ; Сахалыы контент. Тыл суолтатын түөрүйэтэ; Саха тылын үөрэтиини тупсарыы; Дьыссаат, алын сүһүөх кылаас; Саха тылын, сиэрин иҥэрии.

"Ийэ тыл" көҥүл түмсүү бастакы мунньаҕын Иван Шамаев, Саргылаана Ноева, Афанасий Гуринов-Арчылан, Марина Кириллина, Вилюяна Никитина, Ньургун Бэчигэн, Жанна Барашкова, Февронья Шишигина, Дьулустаан Осипов иилээн-саҕалаан ыыттылар. Сүрүн мунньах кэнниттэн 6 сиэксийэнэн дьүүллэһии буолбута: Үөрэх тыла; Ааҕар Саха Сирэ; Сахалыы контент. Тыл суолтатын түөрүйэтэ; Саха тылын үөрэтиини тупсарыы; Дьыссаат, алын сүһүөх кылаас; Саха тылын, сиэрин иҥэрии.

“Тыл саллаата” буолар кыахтаах

Иван Шамаев, Өрөспүүбүлүкэтээҕи интэринээт-лиссиэй дириэктэрэ:

Шамаев

    -- Биһиги биир санааҕа, биир ыллыкка киирэн, тыл организмын хайдах оҥоробутуй? Бу судургу буолбатах. Маннык сорук араас кэмҥэ уопсастыба иннигэр турбута. Холобур, Британияҕа валлийскай (уэльс) тылы тилиннэрбиттэрэ. Австралия олохтоохторун тылларын сөргүтүүгэ эмиэ күүстээх үлэ бара турар. Онон биһиги даҕаны, үөһэттэн барытын оҥоруохтара диэн күүтэн олорбокко, уопсастыбаннай хамсааһын үөскэтиэхпитин наада.

Сайа

   Наталья Михалева-Сайа, норуодунай суруйааччы, бэйиэт, суруналыыс:

         - Биһиги дьоммут-сэргэбит оҕолорун кытта нууччалыы кэпсэппиттэрин курдук кэпсэтэллэр, өссө онтулара элбээн, бэргээн иһэр. Биһиги бэйэбит холобурбутунан оҕолорбутун сахалыы саҥардыахтаахпыт. Холобур, Уйбаан Уйбаанабыс уулуссаҕа нууччалыы саҥара сылдьар саха оҕолорун көрдө да: “Хайа, бу тоҕо сахалыы саҥарбаккыт?” – диэн ыйыталаһа сырыттаҕына, оҕолоро сахалыы саҥаран баралларын кэпсээбитэ. Аны мин Сунтаарга маҕаһыыҥҥа үлэлиир дьүөгэлээхпин. Маҕаһыыҥҥа оҕолор олох нууччалыы кэпсэтэллэр үһү. Онуоха: “Бу ханнык омук оҕолоро киирдилэр? Тоҕо сахалыы саҥарбаккыт?” – диир үһү. Итинник диэтэ да, кыбыстыбыт курдук тутталлар уонна тута сахалыы саҥаран киирэн бараллар эбит. Онон түмсүүбүт хас биирдии киһитэ “тыл саллаата” буолар кыахтаах.

Сэниир буоллаҕына -- сэҥээриэ суоҕа

Дьулустаан Осипов 2

   Дьулустаан Осипов, «Алтан» IT-оскуола дириэктэрэ:

  - Саха тылыгар аахайбат буолуу биир төрүөттээх – дьон тылы ситэри ытыктаабат, сэниир. «Саха тыла туохха нааданый? Бу тылынан үлэлээбэппит, харчы өлөрбөппүт. Үөрэтии бырагыраамата барыта нууччалыы эбэтэр омуктуу» – дииллэр. Төрөппүттэр, оҕоҕо сахалыы контент суох диэннэр, нууччалыы мультиктары көрдөрөллөр. Ол, дьиҥэр, көлбөрүтүнүү буолар. Тоҕо диэтэххэ, YouTube-ка сахалыы мультик дэлэй. «Чохоон» диэн ханаал баар. Аҕыйах күннээҕитэ «Түннүк» диэн оҕо ханаалыгар «Фиксиктэр» киинэ 79 сиэрийэтин сахалыы тылбаастаан таһаарбыттара. Эн төһө даҕаны ситимҥэ сахалыы мультик оҥорон уур, ырыа ай, бырагырааманы суруй – дьон саха тылын сэниир буоллаҕына, маны сэҥээриэ суоҕа. Бу сэнэбили туоратарга, саха тылын барыстаах оҥорорго тугу гыныахха сөбүн «Сахалыы контент. Тыл суолтатын түөрүйэтэ» диэн сиэксийэҕэ дьүүллэһиэхпит.

Мин тус көрүүм маннык – тылбыт муодунай буоларын ситиһиэхтээхпит. Билиҥҥи ыччат үксэ K-Pop истэр. Биһиэхэ аҕыйах сыллааҕыта оннукка маарынныыр “Snow Boys” диэн олус чаҕылхай бөлөх тахса сылдьан, кыргыттар сүрэхтэрин "уулларбыта". Бу уолаттар Арассыыйанан гастроллаабыттарын кэннэ, миэхэ «ВК» ситимҥэ нуучча кыргыттара «Сахалыы үөрэт эрэ» диэн суруй да суруй буолбуттара. Тоҕо саха тылыгар үөрэниэхтэрин баҕаралларын ыйыппыппар, кинилэр: «Snow Boys”-тары истиэхпитин, өйдүөхпүтүн баҕарабыт», – диэбиттэрэ. Онон орто саастаах оҕолорго култуура эйгэтигэр улахан индустрия үлэлиэхтээх. “Snow Boys” курдук уолаттар биһиэхэ сыл аайы тахсыахтаахтар. Оччоҕо ыччат саха тылын билэ сатыаҕа.

Мин Ньургун Бэчигэнтэн ыйыппытым: «Тыгын Дархан» сахалыы киинэтин атыылаһан дуу, булан дуу, хантан көрүөхпүн сөбүй?”—диэн. Онтубут кинохранилищеҕа сытар эбит. Онтон мээнэ тахсыбат, аһаҕас туһаныыга суох үһү. Ол курдук, «Саха» НКИХ «Көмүс пуондатыгар» эмиэ  сахалыы тыллаах видео, аудио матырыйаал бөҕөтө харалла сытар. Ону эмиэ аһаҕас туттууга таһаарар киһи. Национальнай бибилэтиэкэҕэ даҕаны элбэх кинигэ электроннай барыйааннара сыталлар. Уопсайынан, сахалыы контены бэйэбит судаарыстыбаннай тэрилтэлэрбит баттаан олороллор.

 Вилюяна Никитина

Вилюяна Никитина, «Ийэ тыл кэскилэ» түмсүү салайааччыта:

- Куоракка тылы үөрэтэр наадатын син өйдүүр курдук буоллахтарына, улуустарга өйдөөбөттөр. Тыа төрөппүтэ оҕото сахалыы билбэтин кыһалҕа курдук көрбөт, улааттаҕына охсуулаах буолуо дии санаабат. Холобур, эбэлэргэ, эһэлэргэ сиэннэрэ нууччалыы эрэ саҥарар буолбутун эттэххэ, соһуйаллар, «кырдьык даҕаны» дииллэр. Аны улууска олорор сорох учууталлар бэйэлэринэн: «Оҕолор ВПР-дарын нууччалыы туттараллар, сахалыы үөрэннэхтэринэ, ону куһаҕаннык суруйуохтара», – дииллэр. Онон төрөппүттэргэ да, учууталларга да өйдөтүү үлэтэ барыахтаах. Бэйэбит эрэ туруннахпытына, тылы быыһыыр кыахтаахпыт.

Аҥаардас үөрэтиинэн эрэ ыраатыахпыт суоҕа

Ядреев 5 1

Иван Ядреев, юрист:

- Саха Сирин тылларын тустарынан сокуон элбэх нуормата үлэлээбэккэ турар. Холобур, ааннарга «выход» диэн тыл сахалыы эмиэ суруллуохтаах. Ол гынан баран, онно ким да наадыйбат. Ол иһин ону туруорсар хамсааһын наада. Ону тэҥэ, былаас тугу эрэ ылыныа диэн кэтэһэн баран олорумуох тустаахпыт. Бэйэбититтэн саҕалыахха. Бэйэлэрэ тэрилтэлээх, урбааннаах дьон бааллар. Саха тылын тэрилтэ иһинэн туттан барыахха сөп. Үлэ дуогабарын уонна туох баар документацияны сахалыы оҥорон, толорон, вывескалары сахалыы суруйан. Сокуон ону көҥүллүүр эрээри, саха тылын эйгэтин кэҥэтэр маннык кыаҕы ким да туһаммат.

Ирландия тутулуга суох буолбутун кэннэ, бары оскуолаларга, университеттарга ирландскай тылы үөрэтиини киллэрбиттэрэ. Бу айылаах булгуччулаах үөрэтии баарын үрдүнэн, ирландскай тыллаах дьон ахсаана бүгүҥҥэ диэри аҕыйыы турар. Тоҕо? Тоҕо саҥарбаттарый? Хоруйа — судаарыстыбаннай дуоһунастарга, салалтаҕа бу тыл букатын туттуллубат. Онон саха тылын аҥаардас үөрэтиинэн эрэ ыраатыахпыт суоҕа. Тулабыт барыта сахалыы буолуохтаах, суруктан-бичиктэн саҕалаан, саҥарар саҥаҕа, улахан сугулааннарга, кумааҕы отчуоттарга тиийэ.

Аны сахалыы электроннай кинигэни элбэтэргэ хас биирдиибит кылаатын киллэриэн сөп. Арассыыйа судаарыстыбаннай бибилэтиэкэтин саайдыгар ханнык эмэ сахалыы кинигэни буллахха, оцифровкаламматах диэн буолааччы. Онно «оцифровкаҕа куоластаа» диэн кунуопка баар. Кинигэ төһөнөн элбэх куолаһы хомуйар да, электроннай барыйаанын оҥорууга уочарата бастакыларга чугаһаан иһэр. Онон бибилэтиэкэ саайдыгар сахалыы кинигэлэри оцифровкалыырга куоластаан иһиэххэ.

Нууччаттан киирии тылы утарар Дмитрий Чаҕаан диэн кырдьаҕастаахпыт. «Сыыһа саҥараҕыт», -- дии-дии, наар барыларын көннөрө сылдьар. Онуоха киниэхэ эппитим: “Саха тылын 30 бырыһыана монгуол тылыттан киирбит тыллар, ону барытын быраҕан кэбиһэр сатаммат”, -- диэн. Саха тыла былыргыттан араас тыллары кытта алтыһан, саҥа тыллары иҥэринэн истэҕэ дии. Ол иһин «Сахалыы ыраастык саҥарыахтаахпыт!» диэн луоһун кэриэтэ этиилэри мин олох сөбүлээбэппин.

Биһиги «ийэ тыл» диэн тыл ситимин наһаа элбэхтэ туттабыт. Оттон мин ийэм тыла нуучча буоллаҕына, мантан туора барыахтаахпын дуо? Холобура, мин Дьокуускайга нууччалыы тыллаах эйгэҕэ үөскээбитим, онтон улаатан эрэ баран, сахалыы саҥарар буолбутум. Эбэҥкилэрбит да сахалыы саҥараллар. Кинилэр ийэлэрин тыла – эбэҥки. Хаҥалас нууччалара эмиэ сахалыы судургутук быһаарсаллар. Кинилэр нуучча эрээрилэр, мантан хаалан хаалыа суохтаахтар. Онон «Ийэ тыл» диэбэккэ, «саха тыла» диирбит ордук. Оччоҕо омугунан саха буолбатах эрээри, сахалыы саҥарар, билэ сатыыр дьону эмиэ хабыахпыт этэ.

Биһиги «сахалыы» диэн тылы иһиттибит да, сахалыы таҥаһы, сиэри-туому, олоҥхону, Эллэйи санаан кэлэбит. Дьон маны барытын биир курдук көрөр. Ийэ тыл күнүгэр аналлаах тэрээһиммит барыта ырыа, үҥкүү, тыйаатыр эрэ буолар. Чопчу тылга сыһыаннаах тэрээһин буолуохтаах буоллаҕа. Тылы уонна төрүт култуураны арааран, туспа өйдүөххэ наада. Оччоҕо дьон бу стереотиптартан босхолонон, атын омук сахалыы тылбаастаммыт айымньыларын атыҥыраан бүтүө этэ.

Омуктуу киинэни сахалыы тылбаастаатахха, дьон тоҕо көрбөтүй? Тоҕо диэтэххэ, тылбаастанар айымньылары дьон номнуо нууччалыы тылынан көрбүт буолар. Ол иһин иккистээн ону көрөр интэриэһэ суох. «Фиксиктэр» урукку сиэрийэлэрин оҕолор номнуо көрдөхтөрө дии. Дьон болҕомтотун тардаары, нууччалыы тылбаастамматах, наһаа киэҥник биллибэтэх киинэлэри сахатытыахха наада. Холобур, татаардар Бразилияттан, Португалияттан боростуой сериал атыылаһаллар. Ону тыйаатыр артыыстара татаардыы тииллииллэр. Инньэ гынан, дьахтар аймах төрөөбүт тылыгар сыстыытын ситистилэр. Биһиги да оннук гыныахпытын сөп. Ханнык эмэ нууччалыы тылбаастамматах дьоппуон мультигын даҕаны ылан сахалыы саҥардыахха сөп этэ. Субтитрдаан да таһаарыахха сөп. Уопсайынан, аан дойдуга баар нууччалыыта суох контены сахатытыы – бастыҥ сорукпут буолуохтаах.

Биллэр дьон сабыдыалын туһаныахха

Халан 2 1

Николай Павлов-Халан, тыл үөрэҕин магистра, тылбаасчыт:

- Арассыыйаҕа баар омуктар тыллара үгүстэрэ судаарыстыбаннай статустаахтар. Ол эрээри, бу тыллар бары хотторуулаах хаалаллар. Тоҕо оннук буоларый? Тоҕо диэтэххэ, нуучча омугар бэйэлэрин кыһалҕаларын тиэрдибэккэ олороллор. Тылбытын туруулаһарбытын көрө-көрө, нууччалар «бэйэлэрэ сырыттыннар» диэбит курдук сапсыйан кэбиһэллэр. Ону даҕаны, үчүгэйигэр буоллаҕына. Оттон куһаҕаныгар буоллаҕына, бу дьоммутун омугумсуктар, арахсан бараары сылдьаллар диэн дьаарханар буолаллар. Ол иһин биһиги нуучча дьонугар бэйэбит санаабытын тиэрдиэхтээх эбиппит.

Иккис этиим – сурутуу. Сахалыы суруналыыстыка аан дойдуга ханна да суох. Идэлээх киһи суруйбута тарҕаннаҕына, сахабыт тыла имиллэн-хомуллан, сөпкө этиллэн, дьоҥҥо тиийиэхтээх. Ол иһин сахалыы сурунааллар, хаһыаттар сүрдээх туһалаахтар. Онон хас биирдии саха киһитэ саха хаһыатын, сурунаалын сурутуохха уонна ону ааһан ийэлэрбитигэр, аҕаларбытыгар, аймахтарбытыгар, балыыһаларга, оскуолаларга сурутан биэриэххэ.

Киһи хараҕа сынньанар кыргыттара, дьахталлара саха тылын популяризациялыыр хамсааһыҥҥа киирэллэрэ туһалаах буолуо этэ. Саха тылын киэҥ эйгэҕэ таһаарыыга, Интэриниэккэ элбэх контены оҥорорго кэрэ сэбэрэлээх биллэр дьону, спортсменнары, артыыстары, блогердары киллэртээн иһиэххэ. Кинилэр бэйэлэрэ айбатыннар-оҥорботуннар даҕаны. Ол гынан баран, кинилэр өйүүллэрэ, пабликтарыгар таһаараллара улахан суолталаах. Оннук гыннахпытына, элбэх ыччат болҕомтотун тардыахпыт.

Национальнай бибилэтиэкэ дьаҥ кэмигэр цифровизацияҕа сүрдээх элбэх үлэни оҥордо. Билигин элбэх кинигэ электроннай барыйаанын ааҕыахха сөп буолла. Ол эрэн, «Айар» кинигэ кыһата кинилэри хааччахтыы сытар. Атыылыахтаах кинигэлэрэ босхо тахсарын сөбүлээбэт. Ону таһынан, суруйааччы өлбүт буоллаҕына, кини нэһилиэнньиктэрэ айымньытын киэҥник таһаарары көҥүллүө суохтарын сөп. Онон быраабы бас билээччилэри кытта эмиэ өйдөтүү үлэтэ барыахтаах.

Өссө биир ньыманан буолар – аудио-кинигэлэри таһаарыы. Дьиҥэр, көрбөт дьоҥҥо анаан аудио-кинигэлэр бааллар эрээри, ону киһи барыта кыайан истибэт. Бастатан туран, итини ыларга доруобуйаҕынан хааччахтааҕыҥ туһунан докумуон наада. Иккиһинэн, формата киэҥник тарҕаммыт MP-3 эҥин буолбатах. Анал тэриллэргэ эрэ истиэххэ сөптөөх киэбинэн оҥоһуллубут. Итини хайдах эрэ гынан переформатирование оҥорон, киэҥ туттууга таһаарбыт киһи. Маннык кинигэ үчүгэйэ диэн –хараҥаҕа да истиэххэ сөп. Дьиэ хаһаайката аһын астыы, дьиэтин хомуйа сылдьан, суоппар массыына ыыта сылдьан истиэн сөп. Оннук гынан, саха уран тылын дьоммутугар тарҕатыахпытын сөп. Ити кыаҕы туһаныахха баара.

Биһиги хойут сурукка тиийбит дьоммут. Онон суруйааччыларбыт өлбүт да буоллахтарына, өлбүттэрин кэннэ 70 сыл аастаҕына, имущественнай бырааба хааччахтанан бүтэр. Билигин кинилэр нэһилиэнньиктэриттэн көҥүл ыллахпытына эрэ тарҕатар кыахтаахпыт.

Бэчигэн бырагыраама оҥорор

Бэчигэн 2

Ньургун Бэчигэн, артыыс, араадьыйа үлэһитэ:

- Биһиги билигин «Сахалыы» диэн саха тылын үөрэтэргэ аналлаах сыһыарыыны оҥоро сылдьабыт. Бырагырааманы оҥорууга судаарыстыба 3,5 мөл. солкуобайы көрбүтэ. Маҥнайгы релиһэ ахсынньы саҥатыгар буолара күүтүллэр. Үөрэнии хас да таһымнаах буолуоҕа – сахалыы отой билбэт дьонтон үрдүк таһымнаахтык билээччилэргэ тиийэ бары бу бырагырааманы туттар кыахтаныахтара.

Бу үлэни саҕалыырбытыгар харгыстары, дьон өттүттэн итэҕэйбэт буолууну көрсүбүппүт. Мин тыл үөрэҕим суох. Кэргэним ангылычаан уонна ньиэмэс тыллара үөрэхтээх. Хайабыт да саха тылын үөрэҕэ суох. Онтон сылтаан бу бырайыак олоххо киирэрин сорохтор саарбахтыыллара, утарааччылар да бааллар этэ. Онон утарааччылар да баар буоллахтарына, дьон этэрин-саҥарарын улахаҥҥа уурбакка ылыстаххына, хантан эмэ күүс-өйөбүл булуохха сөп. Бырагырааманы таҥан оҥорууга билигин наука да, үөрэх да эйгэтиттэн олус элбэх киһи үлэлэһэ сылдьар. Наһаа элбэх дьон сүбэ биэрдэ, харчынан көмөлөстө. Онон мин эрэ бырайыагым диэн түөскэ охсунар кыаҕым суох. Бу кэлэктиип үлэтэ, норуот баайа-дуола буолар.

Биһиэхэ былаас сахалыы саҥарыан наада. Араас тэрээһиннэргэ биир эмэ сахалыы билбэт киһи баар буоллаҕына, мунньах бүтүннүү нууччалыы тылынан барар. Дьиҥинэн, тута тылбаас баар буолуохтаах. ХИФУ-га нууччалыы-сахалыы тылбаас кафедрата баар. Ол үөрэҕи бүтэрбит исписэлиистэри тардан, тута тылбааска үлэҕэ ылыахха наада.

Федора Романова, логопед:

- Бырагырааманы араас таһымнаах киһи туһаныан сөп диэтиҥ дии. Кырачааннарга эмиэ туһалаах буолара буолуо. Кыра оҕо син биир төлөпүөнтэн, көмпүүтэртэн арахпат. Онон оннук бырагыраама баара буоллар, мин оҕолорум төрөппүттэригэр тарҕатан кэбиһиэм этэ. Дорҕоону саҥарыы, дорҕоону арааран истии, тыл саппааһа курдук салаалар олус туһалаах буолуо этилэр. Логопедтарга аналлаах оннук нууччалыы бырагыраамалар бааллар, оттон сахалыы суох. Сахалыы баара буоллар, наһаа үчүгэй буолуо этэ.

Программистар, сценаристар тиийбэттэр

Ольга Семенова

Ольга Семенова, «Кэскил» оҕо бэчээтин кыһатын дириэктэрэ:

- «Дьулуур: мас-рестлинг» киинэни көрбүт буоллаххытына, тылын-өһүн тэтимин өйдөөн истибиккит буолуо. Атын сахалыы киинэлэрдээҕэр олох ураты. Тоҕо диэтэххэ, сценарийа маҥнай нууччалыы суруллан баран сахалыы тылбаастаммыта. Сахабыт Сиригэр сценарист үөрэхтээх киһи суоҕун кэриэтэ, суруйар дьон бары самоучкалар. Онон сахалыы киинэҕэ сценаристары бэлэмнииргэ болҕомто ууруллуохтаах. Идэтийбит сценарист суруйбут тиэкиһэ быдан ордук буолара биллэр буоллаҕа дии.

Ону кытта Саха Сиригэр идэтийбит программист наһаа аҕыйах. Биир бырайыагы оҥорууга программистар бөлөхтөрө үлэлиэхтээх. Ол иһин бэйэбитигэр оннук дьон тиийбэккэ, омук сириттэн ыҥырабыт. Оттон үксүгэр биһиги программистарбыт соҕуруу көһөн үлэлииллэр. Сахалыы “метаверс” диэн виртуальнай куйаары хаһан эрэ оҥорон испиттэрэ да, программирование өттүгэр туох эрэ сатаммакка тохтообута. Онон итинник бырайыактары киллэрэргэ Сахабыт Сиригэр үгүс исписэлиис баар буолуохтаах.

Биһиги бэйэ-бэйэбититтэн уорсар дьикти адьынаттаахпыт. Тугу эрэ оҥорон таһаардаххына, сарсыҥҥы күнүгэр ким эрэ ылан, бэйэтин киэнин курдук элээрдэ сылдьар буолар. Ол оннугар бу дьон холбоһон үлэлиэхтэрин сөп. Холобур, «Кындыкан» бырайыагы аҕалыам этэ. Ити барыта энтузиаст дьон түмсэн оҥоро сылдьаллар. Ким да кими да баттаабат, бэйэ-бэйэлэрин өйүү сылдьаллар. Биисинэс дьоно итинник буолуохтаах. Манна атын даҕаны элбэх кэскиллээх бырайыак туһунан этилиннэ. Биһиги бары саха тылын харыстыыр сыаллаахпыт, ол туһугар түмсэн, бу идиэйэлэри олоххо киллэриэххэ.

Тарас

Тарас Егоров, программист:

--«Тылтай» диэн сахалыы тылы таайтарар оонньуулаах бырагыраамабытын салгыы сайыннарар былааннаахпыт. Учууталлар: «Оскуола оҕолорун үөрэтиигэ бу бырагырааманы туттуохха сөп», – диэн санааларын этэллэр. Онон оскуолаҕа саха тылын үөрэтэргэ ньыма быһыытынан туттулларын туһугар эбии матырыйаал киллэриэхтээхпит. Бу бырайыактан мин үбүлэммэппит, барыһырбаппын. Барыта баҕа өттүнэн оҥоһуллар. Дьиҥэр, саха тылын сайдыытын ити харгыстыыр. Дьон: “Бу саха тылыттан дохуот кэлбэт”, -- диэн наадата суоҕунан ааҕар. Ол иһин хас да тэрилтэ, урбаанньыт бородууксуйаларын сахалыы тылынан оҥорон иһэн тохтообуттара. Онон саха тылын престиһин үрдэтэр туһугар монетизацияны сайыннарыахха наада.

***

Форумҥа элбэх сэргэх бырайыак туһунан этилиннэ. Киирбит этиилэр бары резолюцияҕа бигэргэннилэр. Бу бырайыактар олоххо киирэннэр, саха тылын харыстыыр, сайыннарар үлэ араас хайысхаларынан салгыы даҕаны бара турдун.

  • 4
  • 2
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением
Лента новостей

Суоппар буолар уустугурда

Муус устар 1 күнүттэн байаҥкамаат бэбиэскэтиттэн куотунар дьону тырааныспары ыытар…
28.03.24 17:19
Лента новостей

Интерактивнай быыстапка

«Арассыыйа – Мин устуоруйам» мультимедийнай устуоруйа пааркатыгар кулун тутар 20 күнүттэн…
28.03.24 16:23