--Презентация кыттыылаахтара, спортивнай оонньуу бэҕэһээ наһаа үчүгэйдик аһыллыбытынан уонна сүрдээх үчүгэйдик буола турарынан итиитик-истиҥник эҕэрдэлиибин! Аныгылыы аһыллыы буолла диэххэ наада. Уруккуттан саҕалаан, бу билиҥҥи сайдыыбытын барытын көрдөрдүбүт. Уонна саамай кульминацията - Иван Белолюбскай тахсыыта. Билиҥҥи дьоруойдарбытын дьоҥҥо-норуокка хаһан даҕаны үчүгэйдик көрдөрбөппүт. Ону, дьэ, бу көстүбүтэ сүрдээх үчүгэй! Уонна үчүгэйэ диэн - кыра оҕолоох, сылгылаах, кулунчуктаах тахсыы буолар. Режиссер Сергей Расторгуев улаханнык кыаммыт диэн этиэххэ наада. Устуоруйаҕа киирэр аһыллыы буолла диэн бэлиэтиибин. Сөҕөрбүн-махтайарбын уонна үөрэрбин этэбин.
Көрүҥ тахсарыгар хайаан да личность баар буолуохтаах. Улахан, үчүгэй киһи баар буолуохтаах. Быраастар уонна физкультура учууталлара 10-чалыы сыл үөрэнэллэр. Холобура, тириэньэр Федор Матвеевич 3 сыл училищеҕа, 4 сыл университекка үөрэнэн бүтэрбитэ. Ол аата, 7 сыл дьаныһан, бу идэтин ылбыт. Мандар Уус: "Тахсар көрүҥҥэ улахан, үчүгэй тириэньэр көһүннэҕинэ, ол көрүҥ тахсар", - диэн этиитигэр сөпсөһөбүн. Холобур, тустууга Дмитрий Коркин, дуобакка Николай Кычкин курдук улахан аан дойдуга таһаарар тириэньэрдэр үөскээтэхтэринэ, саҥа талааннар тахсаллар. Федор Матвеевич мас тардыһыытын методикатын ким да оҥоро илигинэ саҥаттан оҥорон эрчийбитэ. Үөрэнээччилэрин да көрүөххэ - Евгений Сивцев, Николай Дьаакынап, Уйбаан Белолюбскай уо.д.а. - барыта чөмпүйүөннэр.
Биһиги кинигэбит үксэ сахалыы буолар. Сахалыы бэйэбит эрэ ааҕабыт. Манна араас тылынан тахсыбыта биһиэхэ, спортивнай салайааччыларга, сүрдээх үчүгэй бэлэх буолар. Онон махтанабын. Көрүҥмүтүн атын тас дойдуга тарҕатарга, бэлэхтииргэ бу киһи кыбыстыбат кинигэтэ буолан таҕыста диэн ордук чорботон бэлиэтиэххэ наада. Итиччэ элбэх тылынан тылбаастаммыт кинигэ аҕыйах буолуо, суох да буолуо. Спортивнай оонньуулар дойдутугар презентациятын оҥоро турарбыт сүрдээх символичнай. Ол аата, Федор Матвеевич туһунан инникитин өссө даҕаны кэпсэтиилэр уонна сырдатыы бара туруоҕа. Онон үчүгэй кинигэ тахсан, мас тардыһыытыгар улахан суолталаах буолуоҕа. Үчүгэйдик үлэлээбит тириэньэр үлэтэ күн-түүн син биир аһыллан тахсар.
Федор Матвеевич эрчийбит оҕолоро тириэньэр буолан, билигин оҕо бөҕөтүн таһаара сылдьаллар. Аҥаардас Уйбаан Белолюбскай буолунай элбэх үчүгэй спортсменнары таһаартаата. Быйыл мас тардыһыытын аан дойдутааҕы күрэҕэр абсолютнай чөмпүйүөннэннибит. Онон инникитин субу курдук сайда туруохха, Федор Матвеевич аата куруук ааттана турдун.
-
2
-
0
-
0
-
0
-
0
-
0
