-Спорт бырааһынньыга бэҕэһээ үөрүүлээх быһыыга-майгыга аһылынна. Федор Матвеевич кинигэтин дьоҥҥо-сэргэҕэ билиһиннэрэн, киэҥ эйгэҕэ таһаарыахха диэн санаан, Марианна Матвеевналыын кэпсэтэн, кылгас бириэмэҕэ олоххо баҕа санаабытын киллэрдибит.
Федор Матвеевич тириэньэр быһыытынан мас тардыһыытыгар улахан олук уурбута. Маннык дьону биһиги хайаатар даҕаны үйэтитиэхтээхпит. Кинилэр норуокка элбэҕи биэрэллэр. Ону кэм-кэрдии аастаҕына, биирдэ өйдүүгүн.
Спорт - сүдү күүс. Спорда суох ыччаты кыайан ииппэппит. Билиҥҥи кэмҥэ ыччаты иитии өссө ыараата. Оҕолорбут бары YouTube-ка, социальнай ситимнэргэ, төлөпүөҥҥэ олороллор. Сахалыы саҥарарбыт даҕаны аччаата.
Национальнай көрүҥнэр ( мас тардыһыыта, хапсаҕай, о.д.а.) нөҥүө оҕолору сахалыы тылга, төрүт култуурабытыгар уһуйар табыгастаах. Билигин Дьокуускай куоракка Манчаары аатынан Спорт национальнай көрүҥнэрин өрөспүүбүлүкэтээҕи киинигэр 1000 кэриэтэ оҕо дьарыктанар. Бу киин билигин оҕонон туолан турар. Бу оҕолор сахалыы тыыны иҥэринэн, дойдуларыгар туһалаах дьон буолуохтара. Бу акылаатын, төрдүн-төбөтүн оҥорбут дьонтон биирдэстэрэ -- Федор Матвеевич Дегтярев.
Хата, кинигэ Мас тардыһыытыгар аан дойду чөмпүйэнээтин баттаста. Онон, араас дойдуттан кэлбит дьон бу кинигэни дойдуларыгар тиийэн ааҕаннар, бу тириэньэри бары билиэхтэрэ. Бу кинигэни нэһилиэк аайы бибилэтиэкэлэргэ бэлэхтиэхпит. Суруллубут -- суоруллубат. Бу - устуоруйа. Мас тардыһыыта салгыы сайдыа диэн эрэнэбит. Билигин маспыт аан дойду таһымыгар тахсан, сүрдээх түргэнник сайда сылдьар. Онон инникитин маннык дьону сайдыыга олук уурбуттара диэн өйдүөхпүт-саныахпыт.
- 1
- 0
- 0
- 0
- 0
- 0