Аан бастакытын ыытыллыбыт ырыа көрүүтүн күрэҕэр улуус 9 уһуйааныттан 80-тан тахса кыттааччы кэлэн күөн күрэстилэр, ыалдьыттарга, көрөөччүлэргэ ылбаҕай ырыаларын бэлэхтээтилэр. Күрэҕи «Кэскил» уһуйаан иитиллээччилэрэ хомоҕой тыллаах хоһооннорунан, ырыаларынан арыйдылар. Дьүүллүүр сүбэҕэ Амма улууһун үөрэҕин салалтатын уопсай үөрэхтээһин методическай арыаллааһынын сүрүн исписэлииһэ Эмма Давыдова, Амма улууһун оскуолаларыгар иитэр үлэҕэ дириэктэрдэрин сүбэһиттэрин салайааччыта Майя Карманова, «Иэйии» култуура киинин хормейстера Анна Лобанова үлэлээтилэр. Түмүккэ «Ылбаҕай ырыа» анал аат хаһаайыннарынан Покровкаттан «Солнышко» уһуйаан, «Кыайыыны уруйдуур ырыа» анал аат хаһаайыннарынан Болугуртан «Колосок» уһуйаан буоллулар. Салгыы III үктэли- «Дуораанчык» уһуйаан, Амма-Наахара нэһилиэгэ, II үктэли «Мичээр» ОСК Бөтүҥ нэһилиэгэ, I үктэли «Кэскил» уһуйаан, Алтан нэһилиэгэ ыллылар. III үрдэлинэн “Хатыҥчаана»» уһуйаан, Амма нэһилиэгэ, II үрдэлинэн «Чэчир» ОСК, Соморсун нэһилиэгэ, I үрдэлинэн «Кэнчээри» ОСК Амма нэһилиэгэ наҕараадаланнылар. Онтон «Кылаан чыпчаал» аатын Амма нэһилиэгин «Радуга» ОСК ылла.
Тэрээһин чэрчитинэн «Кэскил» уһуйаан төрөппүттэрин, үлэһиттэрин «Кыайыы чемодана» быстаапката тэриллэн дьон сэҥээриитин ылла. Кэлбит ыалдьыттар астынан, дуоһуйа сынньанан, сүргэлэрэ көтөҕүллэн бардылар. Тэрээһиҥҥэ күүс-көмө буолбут нэһилиэкпит тэрилтэлэригэр: олохтоох дьаһалта, ОДьХ, Алтаннааҕы Е.С. Никитина аатынан орто оскуола коллективтарыгар, Амма улууһун үөрэх үлэһиттэрин идэлээх профсоюзтарыгар, улуустааҕы үөрэх салалтатыгар улахан махталбытын тиэрдэбит. Кэнчээри ыччакка Ийэ дойдуга тапталы, харыстабыллаах сыһыаны, бэриниилээх буолууну иҥэриигэ улууспут уһуйааннара бэртээхэй ырыа түһүлгэтин бэлэхтээтилэр.
Антонида ВАСИЛЬЕВА, Амма.
-
0
-
0
-
0
-
0
-
0
-
0
