Ол курдук, киберполиция сотрудниктара киэҥ далааһыннаах суһаллык ирдиир тэрээһиннэрин түмүгэр, тус кабинеттары алдьатыылар баалларын быһаарбыттар. Маны сэргэ, түөкүттэртэн эмсэҕэлээбит өрөспүүбүлүкэ 13 олохтооҕун булбуттар. Бу дьон кинилэр ааттарыгар микро сойуомнар оҥоһуллубуттарын билбэккэ, сэрэйбэккэ да сылдьар кэмнэрэ эбит.
Оперативниктар матырыйаалларыгар олоҕуран, “Компьютерга хараллар информацияҕа бырааба суохтук киирии” диэн 272 ыст. 2 чааһыгар олоҕуран холуобунай дьыалалар көбүтүллүбүттэр.
Салгыы кибер полиция сотрудниктара Забайкальскай кыраай 21 саастаах олохтооҕун туппуттар. Бу киһи “Биир кэлим судаарыстыбаннай уонна муниципальнай өҥөлөр” Федеральнай судаарыстыбаннай информационнай систиэмэҕэ хараллар тус кабинеттарга бырааба суохтук киирбитэ быһаарыллыбыт.
Түөкүнү Өлүөнэ өрүскэ навигация кэмигэр, Аллараа Бэстээххэ тохтоон турар өрүс суудунатыттан туппуттар. Доппуруос кэмигэр уорбаланааччы билинэр показаниеларын биэрбит.
Онно быһаарыллыбытынан, кини норуокка биллэр мессенджер бөлөҕөр киирэн, атын дьон аатыгар кыра сойуомнары оҥорууга түөкүннээһин схематын, кини бас билбэт сим-карталарын уонна “Госуслуга” сиэрбис алдьатыллыбыт аккауннарын хайдах туһанары билбит.
Бэрэбиэркэ ыытыллар кэмигэр бу бөлөххө 6000-тан тахса кыттааччы, хас даҕаны модератор баара биллибит, билигин бу бөлөх үлэлээбэт.
Маны тэҥэ, буруйданааччы суотабай сибээс оператордара уһун болдьоххо туһаналлыбытаҕынан үлэлэрин тохтоппут сим-карталарын туһанара, бу сим-каарталар инники туһанылла сылдьыбыт төлөпүөн сыһыарыларынан информацияны харайа сылдьыбыттара биллибит.
-
1
-
0
-
0
-
0
-
0
-
0
