Бу үлэ Арассыыйа бэрэсидьиэнэ Владимир Путин көҕүлээбит «Ыччат уонна оҕолор»национальнай бырайыак чэрчитинэн, «Биир ньыгыл Арассыыйа» баартыйа норуоттан хомуллан тиһиллибит «Оскуолалар үөрэхтээһин систиэмэлэрин модернизациялааһын» федеральнай бырагырааматынан ыытыллыбыта.
Ааспыт күһүн Ил Дархан Айсен Николаев Сунтаарга кэлэ сылдьан бу оскуола өрөмүөнүн кэлэн-истэн барбыта. Айсен Николаев: «Үөрэх тэрилтэтэ федеральнай хапытаалынай өрөмүөн бырагырааматын көмөтүнэн толору уларыйда. Бары сүрүн тутуу уонна оҥоруу үлэлэрин хаачыстыбалаахтык уонна болдьоҕор оҥордулар. Үөрэнээччилэр, учууталлар уонна оскуола салалтата бу уларыйыыттан сүргэлэрэ көтөҕүлүннэ», – диэн бэлиэтээбитэ.
Саҥардыллыбыт, тупсарыллыбыт оскуолаҕа үлэлиир,үөрэнэр олус үчүгэй диэн үлэһиттэр, оҕолор астыналлар:
Анна Иванова, математика учуутала:
— 1989 с. Сунтаар бастакы нүөмэрдээх орто оскуолата тутуллуоҕуттан өрөмүөннэммэккэ турбута. Кэлиҥҥи сылларга эргэрэн тымныы этэ, санузел сүгүн үлэлээбэт этэ уонна түннүк эргэрэн, оҥорбут да иһин син биир үрэ турара. Истиэнэ сыбахтара, үөһэттэн эмиэ хоҥнон саккырыыр буолбута.
Былырыын хапытааалынай өрөмүөн баран сылыйда. Кылаастар бары өрөмүөннэннилэр, көрүдүөргэ саҥа кафель тэлгээбиттэр, түннүктэри уларыппыттара, электроуот ситимнэрэ эмиэ уларыййдылар. Онон оскуола саҥа тыын ылан, билигин аһара сылаас, кылаастарга барыта саҥа миэбэл турда, элбэх панель дуоскалар турдулар, кылаастар сылаастар. Оҕолор, учууталлар уонна төрөппүттэр оскуола ончу тосту уларыйбытын олус сэргээтилэр. Күн аайы бары үөрэ-көтө сылаас оскуолаҕа үөрэнэ, үлэлии кэлэбит. Маннык нэһилиэнньэ туһугар анаммыт бырайыактар үлэлииллэрэ олус үчүгэй, хайҕаллаах дьыала.
Манна даҕатан эттэххэ, федеральнай бырагырааманан биһиги улууспутугар 2022 сыллаах Тойбохой, 2023 сыллаахха Кутана оскуолаларыгар хапытаалынай өрөмүөн барбыта.
Сонун төрдө уонна хаартыска: "Сунтаар сонуннара", Яина ВЛАСЬЕВА
-
0
-
0
-
0
-
0
-
0
-
0
