«Сөҥүүнү үөскэтии билигин ойуур баһаарын умуруорарга эрэ оҥоһуллар. Хонтуруоллуур сирдэрбитигэр билигин эрдэттэн ылсаммыт, баһаар кутталын туоратыахтаахпыт. Метео сулууспаттан хайа эрэ сиргэ баһаар буолар куттала улааппытын туһунан иһиттибит да, ойуур умайан саҕаланарын күүтэн олорбокко, сэрэтэр үлэни ыытан иһиэхпитин наада», — диэтэ Николаев.
"Сөҥүүнү үөскэтиини уоту умуорарга эрэ буолбакка, баһаар буолар кутталын кыччатарга эмиэ туттуохха диэн ис хоһоонноох балаһыанньаны РФ Ойуур кодексыгар эбии киллэриэххэ" диэн этиини Ил Дархан көтөхтө.
Бу үлэни федеральнай бүддьүөт субвенциятын көмөтүнэн ыытыахтаахтар. Николаев Саха Сирин бу миэрэни олоххо киллэрэр маҥнайгы эрэгийиэн диэн чопчулуурга көрдөстө. Хонтуруол зонатыгар өрөспүүбүлүкэбит саамай киэҥ иэннээх ойуурдааҕын бэлиэтээн эттэ.
Өрөспүүбүлүкэ былаастара «Киин аэрологическай обсерватория» федеральнай судаарыстыбаннай бүддьүөттээх тэрилтэни кытта оҥоһуу сөҥүүнү үөскэтэр тэриллээх сөмөлүөтү арендалыырга дуогабар түһэристилэр. Көтөр аал баһаары умуорарын таһынан, тыа хаһаайыстыбатын наадатыгар туттуллар буолуоҕа.
Эрэгийиэннээҕи авиация хампаанньатыгар, Саха Сирин бүддьүөтүн харчытынан, АН-26 сөмөлүөккэ оҥоһуу сөҥүүнү үөскэтэр тэрили туруораллар. Оборудованиета барыта Арассыыйаҕа оҥоһуллубут гражданскай лаборатория сөмөлүөт бу иннинэ суох этэ. Балаҕан ыйыгар сөмөлүөт өрөспүүбүлүкэҕэ тургутууну ааһан саҕалыаҕа.
Санатан эттэххэ, 2021 сылга Саха Сиригэр 1696 уот үөскээбит сирдэрэ бэлиэтэммиттэрэ, оттон баһаар ааспыт сирин уопсай иэнэ 8 мөл. гектар кэриҥэ буолбута.
-
0
-
0
-
0
-
0
-
0
-
0
