Онно хоруйдуурга көрдөспүппүтүгэр, Быыбар киин хамыыһыйатын бэрэссэдээтэлин солбуйааччы Иван Андросов маннык быһаарда.
– Ватсаап, телеграм ханаал уонна мессенджер курдук социальнай ситимнэринэн хандьыдааттар тустарынан суруйуулары, хаартыскалары, видеоматырыйааллары, бырагыраамалары тарҕатыы (репостааһын) быыбар иннинээҕи аҕытаассыйаҕа киирсэр дуо?
– Быыбар иннинээҕи аҕытаассыйа 2002 с. бэс ыйын 12 күнүгэр ылыллыбыт 67 №-дээх «Арассыыйа Федерациятын гражданнара референдумҥа кыттар быыбардыыр бырааптарын уонна эбээһинэстэрин сүрүн мэктиэлэрин туһунан» федеральнай сокуонунан сүрүннэммит быраабылаларга олоҕуран ыытыллар. Аҕытаассыйалыыр матырыйааллары социальнай ситимнэргэ уонна мессенджердэргэ тарҕатыы бу сокуон 48-с уонна 54-с ыстатыйаларыгар олоҕуран уонна сөп түбэһиннэрэн оҥоһуллуохтаах.
– Социальнай ситимнэринэн матырыйааллары тарҕатыы төлөнөр дуо?
– Аҕытаассыйалыыр матырыйааллар хандьыдаат быыбардыыр пуондатыттан төлөммүт буолуохтаахтар.
– Социальнай ситимнэринэн матырыйааллары тарҕатыыга ирдэбил маассабай иһитиннэрэр-биллэрэр сириэстибэлэргэ (СМИ-гэ) курдук дуо?
– Социальнай ситимнэр уонна мессенджердэр СМИ-гэ киирсибэттэр, ол эрээри 67 №-дээх федеральнай сокуон 54-с ыстатыйатын 2-с пуунугар ыйыллыбыт төрүт чахчылар (ааптар аатын, араспаанньатын, аҕатын аатын, хантан төлөммүтүн, босхотун о.д.а.) тустарынан ирдэбиллэр толоруллуохтаахтар. Матырыйааллары тарҕатыах уонна социальнай ситимнэргэ таһаарыах иннинэ быыбар хамыыһыйатыгар көрдөрөн, сокуоҥҥа сөп түбэһэрин туһунан түмүктээһин ылыллыахтаах (67 №-дээх федеральнай сокуон 54-с ыстатыйатын 3-с пуунун быһыытынан).
– СМИ үлэһиттэрэ быыбар иннинээҕи аҕытаассыйаҕа кыттыа суохтаахтара биллэр, оттон социальнай ситимнэринэн аҕытаассыйаҕа кытталлар дуо?
– Үөһэ этиллибит федеральнай сокуон 48-с ыстатыйатын 7-с пуунун «ж» хос пуунугар олоҕуран, СМИ үлэһиттэрэ социальнай ситимнэринэн аҕытаассыйаҕа кытталлара эмиэ бобуллар.
-
3
-
0
-
0
-
0
-
0
-
0
