«Илгэ» кэпэрэтиип астыыр сыаҕа уон үлэһиттээх. Симиэнэҕэ 3 туонна, сылга 500 туонна үүтү астаан, арыыны таһынан үрүҥ ас арааһын оҥорон батарар. Сыах дьиэтин сылытар уонна үүтү астыырга туһаныллар паары таһаарар паарынан үлэлиир хочуолунай 2016 сыллаахха туспа дьиэҕэ туруоруллубута. Кулун тутар 14 күнүгэр баттааһыны быраҕар кылаапан сүгүн үлэлээбэккэ, хочуол оһоҕо дэлбит тэппитэ.
Улуус баһылыга Яков Степанов уонна тыа хаһаайыстыбатын улуустааҕы управлениетын начальнига Дмитрий Ефимов Кириэс Халдьаайыга кэлэннэр, суһаллык хамыыһыйа тэрийэн, көрөн-истэн бараннар, хочуолунай 90 бырыһыана саахалламытын, чөлүгэр түһэрэр табыллыбатын быһаардылар.
Үүтү туттарыы кэмин көрсө, саҥа хочуолунайы тутар соругу туруордулар. Онон, кэпэрэтиип салалтата бу нэдиэлэ устатыгар умайбыт хочуолунайы ыраастаан, саҥа хочуолунайы тутар сири бэлэмниэхтээх, итиэннэ саҥа хочуол оһоҕун сайаапкалыахтаах. Былаан быһыытынан саҥа хочуолунай дьиэтэ 120 кв. миэтэрэ иэннээх буолуохтаах, түргэнник тутуллар сэндвич-панелларынан оҥоһуллуохтаах. Хочуолунай кэмпилиэгэр Е 1/9P мааркалаах паарынан үлэлиир оһох, икки циркулярнай носуос, питательнай уонна подпиточнай носуостар уонна 100 кВт кыамталаах дизель-генератор көрүллэр эбиттэр.
Томпоттон биһиги общкоррбут Евдокия Неустроева
-
0
-
0
-
0
-
0
-
0
-
0
