Мунньахха СӨ Ил Түмэнин бэрэссэдээтэлин солбуйааччы Виктор Губарев, Аартыка сайдыытыгар уонна Хотугу норуоттар дьыалаларыгар миниистири солбуйааччы Сергей Неустроев, Бырамыысыланнаска уонна геологияҕа миниистири солбуйааччы Андрей Сычевскай, Тутуу миниистирин солбуйааччы Виталий Акопов, СӨ Тыатын хаһаайыстыбатын министиэристибэтин балык хаһаайыстыбатын уонна Хотугу сир төрүт дьарыктарын сайдыытын отделын салайааччытын солбуйааччы Айаал Оконешников, СӨ Сыанаҕа бэлиитикэтин судаарыстыбаннай кэмитиэтин бэрэссэдээтэлин солбуйааччы Николай Бочков, “Якутопторг” АУо генеральнай дириэктэрин солбуйааччы Егор Ефимов кыттыыны ыллылар.
СӨ Бырабыыталыстыбатын 2022 с. ыыппыт үлэтин туһунан сүрүн дакылааты Аартыка сайдыытыгар уонна Хотугу норуоттар дьыалаларыгар миниистири солбуйааччы Сергей Неустроев оҥордо. Салгыы СӨ Ил Түмэнин бэрэссэдээтэлин солбуйааччы Виктор Губарев нэһилиэнньэ иннигэр парламентарийдар бырабыыталыстыба үлэтигэр бары өттүнэн төһүү күүс буолалларын, билигин дойдуга буола турар анал байыаннай эпэрээссийэҕэ Саха Сириттэн кыттыыны ылар сулууспалааччыларга уонна кинилэр дьиэ кэргэттэригэр үрдүкү салалта ураты болҕомтону ылалларын туһунан иһитиннэрдэ. Маны таһынан, анал байыаннай эпэрээссийэ ыытылла турар эригийиэннэригэр өрөспүүбүлүкэ биир бастакынан көмө оҥорбутун туһунан киэн тутта аҕынна. Билиҥҥи кэмҥэ ыччакка патриотическай иитии хайаан да наадатын бэлиэтээтэ.
Николай Слепцов, биэнсийэлээх:
- Иһитиннэрии төрүт саха тылынан этиллибэтэҕин сэмэлиибин. Бэлиэтээн эттэххэ, буолаары турар Ил Түмэн быыбарыгар уһук хоту сытар оройуоннар нэһилиэнньэтин ахсаанынан түөрт улуустан биир дьокутаат талыллыаҕа. Биһиги бэйэбит дьокутааппытын биэс сыл анараа өттүгэр көрбүппүт, ол кэннэ – суох. Аартыка сирэ-уота олус киэҥ, ону тэҥэ кыһалҕата үгүс элбэх. Икки улуустан биир норуот дьокутаата быыбарга талыллара буоллар диэн баҕа санаалаахпын.
Василий Горохов, тыыл бэтэрээнэ (92 саастаах):
- Тыа сирэ хайаатар да сөптөөх хааччыллыылаах, суоллаах-истээх буолуохтаах. Холобур, былыр айанньыттар суоллара-иистэрэ суох, сырыыта аҕыйах сирдэринэн ыаллар «эстэн эрэллэр» диэн сылдьыбат буолаллара. Биһиги билигин итинник балаһыанньаҕа тиийдибит. Маны таһынан, кулууп дьиэтэ олус тымныы, уопсайынан, социальнай эбийиэктэрбит бары кэриэтэ тымныылар, туруктара мөлтөх. Сыллата хапытаалынай өрөмүөннэр ыытыллыбаттарын кэриэтэ.
Нэһилиэкпититтэн түөрт Үлэ Дьоруойа үлэлээн-хамсаан, үүнэн тахсыбыттара. Ыччаттарбыт истэ-билэ, көрө, киэн тутта сылдьалларын курдук кинилэр ааттарын үйэтитэргэ сөптөөх өйдөбүнньүк оҥоруохха.
Юлия Семенова, сынньалаҥ киинин дириэктэрэ:
- Кулууп дьиэтэ олус тымныы. Хаарбах туруктаах, 1979 с. тутуллубута. Саҥа кулууп тутулларыгар баҕарабыт. Маны таһынан, бэйэм нэһилиэк Сэбиэтин дьокутаата буоларым быһыытынан, олохтоохтор туруорсууларын тиэрдэбин. Биһиги, уһук хоту олохтоохторо, «Буран» тиэхиникэни олохпутугар күн ахсын туһанабыт. Гаражка, баанньыкка ититии систиэмэтин киллэрии олорор дьиэттэн хас эмэ төгүл уустуктардаах. Аны туран гаражка ититии ситимин тардыыга төлөбүр кээмэйин эмиэ олус ыарырҕатабыт. Маны хонтуруолга ыларгытыгар этэбин.
Улуус үрдүнэн сайын икки эрэ катер дьону уонна таһаҕаһы тиэйэр-таһар. Түүннэри уочараттаабыппыт да үрдүнэн, сорох түгэҥҥэ тиксибэт буолааччыбыт. Эбии катер көрүллэрэ буоллар.
Маргарита Окорокова, Хаһааччыйа оскуолатын дириэктэрэ:
– Былырыын оскуолабыт 2023 сыллааҕы хапытаалынай өрөмүөн федеральнай бырагырааматыгар киирбитэ эрээри, биллибэт биричиинэнэн бырагырааматтан уһуллубута. Хомойон олоробут. Маны таһынан, оскуолабытыгар оҕолорбут икки сменанан үөрэнэллэр, эбии пристрой тутулларыгар, быйыл туһааннаах бырагыраамаҕа киллэрэргитигэр көрдөһөбүн.
Виталий Апросимов, Хаһааччыйа нэһилиэгин баһылыга:
- Быраастар кэлэн үлэлииллэрэ олус үчүгэй. Манна биир түгэҥҥэ тохтоон ылыым. Ол курдук, биһиги нэһилиэкпит 1500 киһилээх. Аартыкаҕа биир улахан сэлиэнньэ буолар. Быраастар атын нэһилиэктэри хабан үс күн үлэлииллэрэ былааннанар. Инньэ гынан, сорохтор көрдөрүммэккэ хаалар кутталлаахтар. Инникитин маны болҕомтоҕо ыларгытыгар.
Яна Портнягина, уһуйаан сэбиэдиссэйэ:
-Уһуйааммыт дьиэтэ олус эргэ, 1979 с. тутуу. Маны таһынан, эбийиэнэ кыараҕас буолан, оҕолорбут үс бөлөҕүнэн сылдьалларыгар эппиэттээбэт. Саҥа тииптээх, бары өттүнэн хааччыллыылаах дьиэ тутуллара буоллар. Билигин 55 миэстэлээх уһуйааҥҥа 60-тан тахса оҕо сылдьар.
Валерианна Романовна, биэнсийэлээх:
- Интэриниэт сибээһэ тамты быстар мөлтөх. Суол-иис, салгын сырыыта эмиэ уустук. Бу боппуруостар быһаарыллыахтарын наада. Балыыһабыт олус тымныы. Маны таһынан, улууска морг уонна судебнай мэдиссиинэ исписэлииһин үлэтэ мөлтөх. Нэһилиэнньэҕэ тиэрдиллиэхтээх субсидиялар, бырагыраамалар, куонкурустар ыытыллыыларын туһунан иһитиннэриилэр олус аҕыйахтар. Маны бырабыыталыстыба хонтуруолга ылыахтарын наада.
Ирина Гуляева, биэнсийэлээх:
- Нэһилиэккэ бэтэрээннэр Сэбиэттэрин бэрэссэдээтэлэбин. Улуус үрдүнэн бэтэрээннэр Сэбиэппит бэрэссэдээтэлэ суох олоробут. Дьиҥэр, кини биһиги үлэбитин-хамнаспытын сүрүннүөхтээх этэ. Улуус бэтэрээннэрин Сэбиэтин бэрэссэдээтэлин талан, үлэлэтэллэрэ буоллар үлэбит тэтимириэ этэ.
Александр Лебедев, олохтоох:
- «Якутопторг» табаарын атын маҕаһыыннар нөҥүө атыылыыллар. Сорох кэмҥэ хаачыстыбата быстар мөлтөх буолар. Маны таһынан, ититии ситимин оттук кэмэ түмүктэннэҕинэ бэйэбит хааччынабыт. Таас чох тиийбэт, атыылаһарга субсидия көрүллэрэ буоллар.
Сэргэх кэпсэтии түмүгүнэн СӨ Бырабыыталыстыбатын оробуочай бөлөҕүн салайааччыта Сергей Неустроевтан көрсүһүү туһунан санаатын үллэстэригэр көрдөстүм.
- Биһиги отчуоттуур үлэбитин олунньу 14 күнүттэн Усть Куйга сэлиэнньэтиттэн саҕалаабыппыт. Бүгүн Хайыр нэһилиэгэр уонна Хаһааччыйаҕа мунньахтаатыбыт. Нэһилиэнньэ хото кэлбит диэн бэлиэтиибин. Инники икки сылларга маннык мунньахтар ыытыллыбатах буолан, олохтоохтор ыйытыктара элбэх. Кыһалҕа эмиэ үгүс. Ол курдук, социальнай суолталаах дьиэлэр тымныылара, эргэрбиттэрэ, ититии ситимин төлөбүрэ гаражтарга үрдээбитэ, о.д.а. үгүс ыйытыктар киирдилэр. Этиилэри барытын боротокуолга киллэрэн, инникитин чинчийэн үөрэтиэхпит уонна кэккэ боппуруостарынан ыкса үлэлэһиэхпит, – диэн Сергей Неустроев эттэ.
Олохтоохтор бырабыыталыстыба отчуотун «үчүгэйинэн» сыаналаан, ытыс тыаһынан доҕуһуоллаатылар. «Өрүү да маннык сылдьан кыһалҕаларбытын болҕомтоҕо ыларгытыгар», – диэн баҕа санааларын тиэртилэр.
-
0
-
0
-
0
-
0
-
0
-
0
