Саҥа үөрэх дьылын соруктарын туруорар дьоһун тэрээһиҥҥэ өрөспүүбүлүкэ бары улуустарыттан 400 киһи, ол иһигэр, иитэр-үөрэтэр тэрилтэлэр салайааччылара, учууталлар уонна уһуйааччылар, төрөппүттэр, уопсастыбанньыктар уонна федеральнай эспиэрдэр кэлэн кытталлар. Ону таһынан, элбэх киһини хабар сыалтан, онлайн-трансляциялар тэриллэллэр.
Атырдьах ыйынааҕы сүбэ мунньах бырагыраамата киэҥ -- араас былаһааккаларынан пуорумнар, санаа атастаһыыларын, быыстапкалары таһынан, култуурунай-чэбдигирдэр дьаһаллар ыытыллаллар.
Бэҕэһээ, атырдьах ыйын 22 күнүгэр Ленин болуоссатыгар оҕону чэбдигирдии үлэтин тэрээһинигэр аналлаах бэстибээл буолла. Онно араас улуус оскуолалара сайыҥҥы сынньалаҥы хайдах атаарбыттарын, тугу үлэлээбиттэрин-хамсаабыттарын, төһө үүнээйини ылбыттарын, эмтээх оттору хомуйбуттарын уо.д.а. тустарынан сырдаттылар. Холобур, Кэбээйи улууһун Мукучутун оҕолоро соботтон тугун да бырахпакка астаан, туһаҕа таһаарар, оттон Амма эдэр натуралистара дойдуларыгар үүнэр отунан-маһынан чэй, мыыла, эйгэни ыраастыыр чүмэчи, ыҥырыа мүөтүнэн маас оҥорор эбиттэр.
«Сэргэлээх уоттара» култуура киинигэр анал үөрэх кыһаларын бүтэрэн, үлэ көрдүүр эдэр учууталларга педагогическай вакансиялар дьаарбаҥкалара тэрилиннэ. Инньэ гынан, оскуолалар тиийбэт үлэһиттэринэн хааччылыннылар. Идэтийбит бэлэмнэнии киинигэр үөрэх уонна наука миниистирэ Ирина Любимова кыттыылаах анал орто үөрэх кыһаларын дириэктэрдэрин сүбэ мунньаҕа ыытылынна.
Идэлээх сойуустар дьиэлэригэр Анаабыр, Булуҥ, Кэбээйи, Өлөөн уонна Эдьигээн улуустарын педагогтарыгар анаан «Үөрэхтээһин муниципальнай тиһигэ: саҥа ирдэбиллэр уонна саҥа эппиэтинэстэр» диэн доһуннаахай пуорум буолла.
Бүгүн сарсыарда өттүгэр мунньах кэккэ былаһааккаларынан ыытыллыаҕа. Олорго иитэр-үөрэтэр үлэ систиэмэтин сайыннарыыга, үөрэхтээһин хаачыстыбатын тупсарыыга, иитэр-үөрэтэр үлэ тиһигэр сыыппара технологиятын туһаныыга, «Уопсастыбанай сакаас» чэрчитинэн ыытыллыбыт чинчийии түмүктэрин билиһиннэриигэ кэпсэтиилэр, санаа атастаһыылара буолуохтара.
Күнүстэн киэһэ «Сэргэлээх уоттара» култуура киинигэр «Үөрэҕирии тиһигэ уонна сайдыы тосхоло» диэн пленарнай мунньах буолуоҕа, онно Ил Дархан Айсен Николаев кыттыыны ылыаҕа.
-
4
-
0
-
1
-
0
-
0
-
0
