Агрооскуола сүрүн хайысхата – оҕуруот аһын олордуу: хортуосканы, хаппыыстаны, оҕурсууну, помидору, биэрэhи, моркуобу, сүбүөкүлэни, о.д.а. Ылар үүнүүлэриттэн оҕо-сынньалаҥ лааҕырыгар утары сииллэр, кыһын оскуола остолобуойугар тутталлар.
Онуоха эбии араас оттон күhүн чэй хатараллар. Төрдүс сылын Куочайга тигээйи иитэн, мүөт атыылыыллар. Быйыл тэпилииссэҕэ икки сүүстэн тахса ук клубниканы олордубуттар.
Бу үлэни производствоҕа дириэктэри солбуйааччы Николай Александрович Николаев, маастардар Василий Васильевич Куприянов, Александра Алексеевна Софронова, Саргылаана Семеновна Фокина, биология учуутала Любовь Анатольевна Петрова ыыталлар. Мүөтү бэлэмниир үлэҕэ быйыл ахсыс кылаас үөрэнээччитэ Целистина Давыдова бэйэтин баҕатынан үлэлэспит.
Бу сайын пасекаларын уулаах, сибэккитэ элбэх диэн Бакамдаҕа көһөрбүттэр, эрдэ Букчайга турбут. Быһа холоон көрүүлэринэн, бу сылга мүөт өссө тупсубут, элбээбит. Холобур, былырыын 50 киилэни ылбыттар. Биир тигээйи биир сайын биир чаайынай ньуоска мүөтү биэрэр.
Сибиэhэй олохтоох мүѳтү нэһилиэнньэ хамаҕатык ылар, атыыга тахса да илигиттэн элбэх сакаас киирэр. Бу дьарыктарынан оҕолор научнай үлэлэри суруйаллар. Оскуола ыытар дьаарбаҥкаларыгар мүѳт атыытыттан киирэр харчылара ороскуоттарын сабар, араас наадаҕа туттуллар.
Онон Антоновка оскуолатын «Куочай мүѳтэ», «БукЧай» бородууксуйалара дьон-сэргэ биһирэбилин ыллылар.
- 0
- 0
- 0
- 0
- 0
- 0