Уопсастыба

Куонкурус аһыллыыта бүгүн социальнай ситим нөҥүө ыытылынна. Куонкурус кыттыылаахтарын эҕэрдэлээн Саха Өрөспүүбүлүкэтин Бырабыыталыстыбатын бэрэссэдээтэлин солбуйааччы Дмитрий Садовников, куттал суох буолуутун хааччыйар судаарыстыбаннай кэмитиэт бэрэссэдээтэлэ Дмитрий Лепчиков уо.д.а. тыл эттилэр. «Илии сылааһа» иис сыаҕын салайааччы, «Гражданскай килбиэн» бэлиэ хаһаайката Ирина Саввина куонкурус туохха олоҕуран ыытылларын туһунан сырдатта, балаһыанньаны билиһиннэрдэ, ситиһиилэри баҕарда. Биһиги улууспутуттан баһылыгы социальнай боппуруостарга солбуйааччы, уопсастыбаннай ыстаап салайааччыта Алена Гуляева куонкурус улахан үлэттэн тэриллэрин этэн туран эҕэрдэлээтэ, кыайыыга дьулууру, тулууру баҕарда.

Куонкуруска кыттар Таатта, Чурапчы, Томпо, Амма, Мэҥэ Хаҥалас, Хаҥалас, Нам, Кэбээйи, Өлөөн, Абый улуустарын, Жатай бөһүөлэгин хамаандалара түөрт күн устата барыта 13 устуука, 10 көрүҥ таҥаһы тигиэхтээхтэр. Бэнидиэнньиккэ, ол эбэтэр балаҕан ыйын 18 күнүгэр, киэһэ 18:00 чааска, куонкурус түмүктэнэн, үлэлэр тэрийээччилэргэ туттарыллыахтара. Кыайыылаахтар үлэ хаачыстыбатынан быһаарыллыахтара.

Таатта улууһун «Харыстаана» диэн иистэнньэҥнэр хамаандаларын Саха Өрөспүүбүлүкэтин үөрэҕириитин туйгуна, «Албан Аата» уордьан толору кавалера Дмитрий Петров аатын сүгэр Ытык Күөл 2-с №-дээх орто оскуолатын технологияҕа учуутала, биллэр иистэнньэҥ Анна Никифорова салайар. От ыйыгар Дьохсоҕон нэһилиэгин дьаһалтатын уонна «Илии сылааһа» сыах көҕүлээһиннэринэн ыытыллыбыт өрөспүүбүлүкэтээҕи Иис ыһыаҕар иккис миэстэни ылары ситиспиттэрэ. Биир дойдулаахтарбытыгар бу улахан куонкуруска ситиһиини баҕарабыт.

Ийэлэр илиилэрин сылааһынан угуттанан, алгыс тылынан арыалланан тигиллибит таҥастар, уолаттарбытыгар харысхал, дурда-хахха буоллуннар!