Икки салайааччы кэпсэтиитэ өрөспүүбүлүкэ бэтэринээринэй-санитарнай туругун, ол иһигэр тыа хаһаайыстыбатын бородууксуйатын, сүөһү «хамсааһынын», вакцинациялааһын уонна тастан сыстыганнаах ыарыы киирбэтин хааччыйар үлэ-хамнас тула ыытылынна. Яна Любченкова Россельхознадзор управлениета өрөспүүбүлүкэ Бэтэринээрийэҕэ департаменын кытары үлэтэ үс лаборатория уонна научнай-чинчийэр институт кыттыыларынан ыытылларын эттэ. Социальнай тэрилтэлэри олохтоох аһынан-үөлүнэн хааччыйыыга уонна аһылык куттала суох буолуутугар ураты болҕомто уурулунна.
– Өрөспүүбүлүкэ салалтата тыа хаһаайыстыбатын салаатыгар улахан болҕомтотун уурар. Ил Дархан социальнай тэрилтэлэри олохтоох аһынан хааччыйыы таһымын 60 %-ҥа тиэрдэр соругу туруорар, – диэн бэлиэтээтэ Яна Любченкова.
Билигин өрөспүүбүлүкэ Кытайга сибиинньэ этин уонна балыгы атыыга таһаарарыгар кыах үөскээбит. Онон Айсен Николаев вице-премьер Сергей Местниковка сибиинньэ иитэр бөдөҥ хаһаайыстыбалары кэҥэтэр, баазаларын тупсарар туһунан боппуруоһу үөрэтэригэр эттэ. Тыа хаһаайыстыбатын уонна ас-үөл бэлиитикэтин министиэристибэтэ Аһылык технологиятын киинин баазатыгар бородууксуйаны оҥорооччулары уонна хааччыйааччылары кытары «биир түннүк» киэбинэн үлэлииргэ Россельхознадзор лабораториятын арыйарга этиитин өйүүрүн биллэрдэ. Лаборатория анал тэрилинэн сэбилэниитэ уонна үлэһиттэрин хамнаһа федеральнай бүддьүөттэн көрүллүөхтээх. Маны таһынан Ил Дархан уопсастыбаннай аһылык тэрилтэлэригэр бэрэбиэркэни ыытыы бэрээдэгин судургутутарга «Судаарыстыбаннай хонтуруолу (кэтээн көрүүнү) уонна муниципальнай хонтуруолу тэрийии итиэннэ оҥоруу уратыларын туһунан» Арассыыйа Федерациятын Бырабыыталыстыбатын 336 №-дээх Уурааҕар кэккэ уларытыылары киллэрэргэ көҕүлэһиини оҥорорго сөбүлэһэрин биллэрдэ. Салгыы кэпсэтии тыа хаһаайыстыбатыгар туһаныллар сирдэр фитосанитарнай туруктарын көрүү-истии итиэннэ ойууру буортулааччылары утары охсуһуу боппуруоһугар туһаайылынна диэн Ил Дархан уонна Бырабыыталыстыба пресс-киинэ иһитиннэрэр.
Хаартыскаҕа Андрей Сорокин (ЯСИА) түһэриитэ
-
1
-
0
-
0
-
0
-
0
-
0
