Тимофей Сметанин сэрии бастакы сылыгар бэбиэскэ тутан, аармыйаҕа ыҥырыллан, уоттаах сэриини этинэн-хаанынан билбит буолан, айымньыларыгар олус итэҕэтиилээхтик, кырдьыктаахтык абарбыт санаатын саха саллаатын уобараһынан чаҕылхайдык арыйан суруйбута. Самныбат-санааны, толлубат толкуйу, Ийэ дойдуга бэриниилээх тапталы хоһоонноругар хоһуйан, дьону-норуоту түмпүтэ, Кыайыыны уһансарга кэхтибэт санааны киллэрбитэ.
Поэт «Саллаат сүрэҕэ» диэн хоһоонун 1945 сыллаахха суруйбута. Бу айымньыга поэт саха саллаатын уобараһын, кини ис туругун, санаатын уонна сэрии кэмэ хайдах курдук ыараханын сиһилии кѳрдѳрбүтэ. Саллаат төрөөбүт алаһа дьиэтиттэн тэлэһийэн, Ийэ дойдутун кѳмүскүүр сэриигэ сылдьарын кѳрѳбүт:
«Уулаах окуопаҕа сытан ,
Утуйбакка да сылдьан,
Ийэ дойдум дьолун иһин
Эрэйдэммитим иһин…»
«Кѳстѳр айыым сырдыгыттан ,
Кѳҥүл олохтон арахсаммын,
Сарсын тахсар күн иһин
Саманна оҕуттахпына да,..»
Сэрии сиэртибэтэ улахан этэ, элбэх киһи суорума суолламмыта, элбэх киһи бааһыран, илиитэ-атаҕа суох хаалбыта, доруобуйата эчэйбитэ. Ону маннык кэрчиктэртэн ааҕан билиэххэ сѳп:
«Атаҕы тэҥнээн хаамар
Аналым быстыбытын иһин,
Мас баттыктанан
Барар-кэлэр буоллахпына…»
«Буойун ааттана охсуһууга
Босхоҥ, доҕолоҥ буолтум иһин, …»
«Аалай хааным тохтубута
Арассыыйа дэхси хонуутугар,
Кыһыл тѳлѳн сибэкки буолан,
Кыыһа үүнэр буоллаҕына,…».
Ааптар бэйэтэ дойдутугар олус бэриниилээх, ол иһин хас биирдии хоһоонугар дойдутун ахтар. Бу хоһоонугар саллаат Өлүөнэ биэрэгин ахтан-санаан ааһар:
«Үүрүѳх курдук мин бэйэм олохпор
Үчүгэй суох да буоллаҕына,
Үѳскээбит Ленам биэрэгэр
Үѳрүү иһиллэр буоллаҕына,…»
Уоттаах сэриигэ Ийэ дойдуларын иһин кыа хааннарын тоҕон кыргыспыт саллааттар олорон ааспыт олохторун кэмсиммэттэрин, бэйэлэрин дьоллоох дьонунан ааҕыналларын буойун поэт маннык этэр:
«Син биир этиэҕим
Сирдээҕи дьолу билэбин диэн».
«Син биир ааҕаарыҥ
Сир үрдүгэр дьоллооҕунан».
-
0
-
0
-
0
-
0
-
0
-
0
