Маны таһынан 31 600 гектарга сүөһү сиир култууратын ыстылар. Дьыл аһын, хортуоппуйу, 6 тыһыынча гектарга уонна оҕуруот аһын 1,1 тыһыынча гектарга (44 гектарга хаппыыстаны, 97 гектарга моркуобу, 59 гектарга сүбүөкүлэни, 35 гектарга араас култуураны) олортулар.
Бу сыыппараҕа агрооскуолалар киллэрэр кылааттара кырата суох. Санатан эттэххэ, өрөспүүбүлүкэ үрдүнэн 96 агрооскуола баар, үгүстэрэ хортуоппуйу уонна оҕуруот аһын арааһын үүннэрэн, кыһын оскуола «итии аһылыгын» хааччыйаллар, ордубутун нэһилиэнньэҕэ батараллар. Саас эрдэттэн арассаада арааһын үүннэрэн атыылыыллар.
Хаҥалас улууһун Сиинэ агрооскуолата (дириэктэр Валерий Ордахов) быйыл хортуоппуйу 0,5 гектарга, оҕуруот аһын (сүбүөкүлэни, моркуобу, хаппыыстаны) 0,3 гектарга, ону таһынан оҕурсууну, помидуору, биэрэһи 54 кв миэтэрэ иэннээх тэпилииссэҕэ олордубут.
– Хойукка диэри хаһыҥнаан, оҕуруоппутун арыый хойутаан олортубут. Арассаадаларын эрдэ таһаарбыт ыаллар дэлби үлүтэн кэбиспиттэрэ, инньэ гынан, биһиги 400 устуука помидор, 300 устуука биэрэс, 350 устуука оҕурсу уонна 280 устуука сайыҥҥы сибэкки арассаадатын атыылаатыбыт. Үгүс махтал тылларын иһиттибит. «Лоу Экос» диэн лааҕырдаахпыт, онно оҕолор сезонунан солбуһа сылдьан сайын устата үлэлииллэр, оҕуруоту көрөллөр-истэллэр, – диэн кэпсээтэ агрооскуола маастара Мария Голокова.
Хаартыскалары Мария Голокова ыытта.
-
1
-
0
-
0
-
0
-
0
-
1
