Мунньах кыттыылаахтара туох санаалаахтарый?
Тимофей Иванов, улуустааҕы быыбар хамыыһыйатын салайааччы, дьокутааттар улуустааҕы Сэбиэттэрин урукку бэрэссэдээтэлэ:
— Ил Түмэн сис кэмитиэтин бэрэссэдээтэлэ Владимир Прокопьев, Ил Дархан сүбэһитэ, урут Үрдүкү Суут Бэрэссэдээтэлин солбуйааччытынан үлэлээбит улахан уопуттаах Игорь Николаев олохтоох салайыныы ситимин бүгүҥҥү туругун баары баарынан ырыппыттарын, саҥа сокуон тоҕо ылылларын, киирдэҕинэ туох уларыйыы күүтэрин сиһилии саас сааһынан илдьиритэн биэрбиттэрин, аһаҕастык кэпсэппиттэрин дьон сэргээтэ. Сүрүн түгэннэри сөпкө быһаардылар дии саныыбын. Сокуон барылыгар улуус, нэһилиэктэр баһылыктарын быыбардарыгар куонкуруһу ааспыт салайааччы дьокутааттар көрүүлэригэр киирэрин туһунан этиллэрэ сөп. Ити каадырдары кытта үлэни сөргүтүүгэ төһүү буолуо.
Сокуон барылынан көрүллэр боломуочуйалары үбүлээһин мэктиэлэнэр буолара олохтоох бэйэни салайыныы ситимин көдьүүстээх оҥоруо, эппиэтинэһин үрдэтиэ. Боломуочуйалары тыырыыга быһаччы үлэлии олорор баһылыктар санааларын аһаҕас истиилэргэ этиниэхтэрэ, бэлэмнээн тиэрдиэхтэрэ. Саҥа сокуон олохтоох бэйэни салайыныыга баар уопуту түмэн ылыллан эрэр сокуон буоларын бэлиэтиэххэ сөп.
Афанасий Тимофеев, Арыылаах нэһилиэгин дьаһалтатын баһылыга:
– Ил Түмэн сис кэмитиэтин бэрэссэдээтэлэ Владимир Прокопьев, Ил Дархан сүбэһитэ Игорь Николаев биһиги, нэһилиэктэр баһылыктара, мунаахсыйар боппуруостарбытын өйдөнүмтүө гына быһааран, дьэҥкэрдэн биэрдилэр. Сокуон тоҕо ылылларын, баһылыктар быыбардара хайдах тэриллиэхтээҕин кэпсээтилэр, саҥа сокуон өйдөбүлүн тиэртилэр. Ил Түмэҥҥэ сокуон барылын иккис-үһүс ааҕыытыгар боломуочуйалары тыырыыга биһиги этиилэрбитин күүтэллэрин эттилэр. Саха Сирин сокуоннарын оҥорооччулар итинник бэйэлэринэн кэлэн «сиргэ» быһаччы үлэлиир баһылыктары кытта көрсүһэллэрэ, өйдөммөт түгэннэри быһаараллара биһиэхэ олус үчүгэй. Дьэ билигин олохтоох салайыныы өрөспүүбүлүкэтээҕи сокуонун барылын дьоммутугар-сэргэбитигэр тиэрдиэхпит, быһаарыахпыт.
Кэпсэтиигэ сылдьыбыт нэһилиэкпит дьокутааттара элбэҕи билэн-көрөн, санаалара лаппа уларыйан бардылар. Үчүгэй, аһаҕас кэпсэтии буолла. Нэһилиэктэр баһылыктара эмиэ сүргэлэрэ көтөҕүллэн тарҕастылар.
Семен Каратаев, Тааһаҕар нэһилиэгин дьаһалтатын баһылыга:
— Саас Ил Түмэн Бэрэссэдээтэлэ Алексей Еремеев, сис кэмитиэт салайааччыта Владимир Прокопьев олохтоох салайыныы боппуруостарыгар кэпсэтэ кэлэ сылдьыбыттарын кытта тэҥнээтэххэ, бу сырыыга үчүгэйдик бэлэмнэммиттэрэ, быдан элбэҕи хорутан үлэлээбиттэрэ, хайысхалары быһааран булбуттара көстөр. Уустук боппуруостары, холобур, баһылыктар быыбардарын киһи өйдүүр гына элбэх холобурдаан быһаардылар, олохтоох салайыныы саҥа сокуонун барылыттан ураты өрөспүүбүлүкэ инники сайдыытыгар хамсаныылары көрүүнү билиһиннэрдилэр. Түмүккэ, түмсүөххэ диэн этиилэрэ сөптөөх сэҥэриини ылла. Уустук кэмнэргэ түмсүүлээхпит быдан ордук. Баһылыктар элбэх ыйытыгы биэрэн толору хоруйдары ыллылар. Публичнай истиигэ, муниципаллар сийиэстэригэр салгыы кэпсэтиигэ этиилэрбитин бэлэмниэхпит. Саҥа сокуон диэн саҥа сокуон буоллаҕа. Өйдөммөт өрүттэрэ билигин да элбэх диэххэ сөп. Боломуочуйаны толорууга үптээх-харчылаах буоллаҕына сатанар диэтилэр даҕаны быһаарыыны кэтэһэр өрүттэр бааллара көстөр.
Кэпсэтии ис хоһоонун дьоммутугар тиэрдиэхпит, нэһилиэкпит депутаттарын кытта саҥа сокуон барылын ырытыахпыт, этиилэрбитин бэлэмниэхпит.
Хаартыска: ааптар түһэриитэ.
-
0
-
0
-
0
-
0
-
0
-
0
