Уопсастыба

Киэһэ 7 чаастан да буоллар, дьон хотоҕустуу субуллан кэллэ. Эдэр да, эмэн да көрөөччү биһиги талааннаах, билиилээх адвокаппытыгар көмөлөһөөрү кэлбиттэрин көрөн киэн тутуннум. Саха дьоно барахсан ыксаллаах, ыарахан түгэҥҥэ сомоҕолоһорбут холобур эрэ буолуон сөп. Элбэх кэнсиэрди тэрийээччи, элбэх киһини ырыаһыт оҥорон  көтүтэ сылдьар, Саха Өрөспүүбүлүкэтин култууратын үтүөлээх үлэһитэ Мария  Александрова бэс ыйыгар артыыстар кэнсиэртэрин тэрийии олус ыараханын этэн туран, Тихону өйүү, Айыы санаанан көмөлөһөр сыаллаах кэлбит көрөөччүлэргэ махтанна. Манна эбэн эттэххэ,  Мария Сергеевна кэнсиэри тэрийэргэ сүүрбүт-көппүт, артыыстары түмпүт тэрийээччи буолар.

– Тихон ол туохха бар дьонугар наадыйда? – диэххит.
Эдэр ыал чэпчэтиилээх ипотекатынан, алта мөлүйүөн сууммалаах саҥа дьиэ туттан киирэн, аҕыйах ый олороотторун кытта, кытарарга былдьаммыта. Күүстээх, эрэл санаанан Тихон Дормидонтов билэр да, билбэт дьоно көмөлөһөн санаатын улаханнык көтөхтүлэр, инникигэ эрэли үөскэттилэр. Доҕотторо, мэлдьи алтыһар эйгэтэ артыыстар да туора турбатылар. Оҕо үҥкүү ансаамбылларыттан саҕалаан, элбэх биллиилээх артыыстарбыт: Арассыыйа Федерациятын народнай, Саха Өрөспүүбүлүкэтин народнай артыыската, Суорун Омоллоон аатынан Опера уонна балет театрын прима солистката Айталина Адамова, Саха Өрөспүүбүлүкэтин үтүөлээх артыыһа Владимир Павлов, Саха Өрөспүүбүлүкэтин народнай артыыһа Аскалон Павлов, Саха Өрөспүүбүлүкэтин үтүөлээх артыыһа Ника, биир дойдулаахтара, эдэр, кэскиллээх артыыстар Күндэл, Санита Ай, Ирена Файрушина о.д.а. ыллаатылар. Маны сэргэ эдэр талааннар, Мария Сергеевна Александрова салайар вокальнай ансамбылын ырыаһыттара, «Завод», «Бриллиантовые нотки» үҥкүү ансаамбылын оҕолоро кыттан сэргэхсэттилэр.

Кэнсиэри «Саха» НКИХ суруналыыһа Гея Буртахова уонна аан бастаан Тихон Дормидонтов иилээн-саҕалаан ыыттылар. Тихон барытыгар талааннаах ыччат буолар. Ыытааччы, ырыаһыт, алгысчыт быһыытынан бэйэтин көрдөрдө. Хас биирдии тахсар артыыһы билсиһиннэрэн, хайдах кинилэрдиин алтыспытын кэпсээтэ. Холобур, оскуолаҕа тохсус кылааска үөрэнэ сылдьан Айыы Ойууна В.А.Кондаков салайар норуот эмчиттэрин үөрэҕэр үөрэнэ сылдьан, Владимир Алексеевиһы кытары наар алтыһар артыыстары – Айталина Адамованы, Владимир Павловы кытары хайдах чугастык алтыспытын ахтан, үрдүкү үөрэтээччибит Владимир Алексеевич баар тыынын биллэрдэ. Владимир Павлов В.А. Кондаков «Аар тайҕа» диэн ырыатын ыллаан доллоһутта.

Тихон Дормидонтовка төннөн эттэххэ, кини 20 саастааҕар Сунтаарга Партизан култууратын дьиэтин директорынан үлэлии сылдьыбыта. Бэйэтин тула талааннаах ыччаттары: Тускулаананы, Радомир Сергееви таба көрөн, үлэҕэ ылан, билигин бу ыччаттарбыт «Саха» НИКХ төһүү үлэһиттэрэ буоллулар. Оҕо сааһыттан олоҥхоһут, оһуокайдьыт, ырыаһыт. Ол эрээри, юриспруденцияны талан, айымньылаахтык үлэлии сылдьар. Онон Тихону өйүүр доҕотторо артыыстар, көрөөччүлэр бары сомоҕолоһон кэлэн үтүө кэнсиэр буолла. Түмүгэр барыта үчүгэйинэн түмүктэннин диэн, Тихон Дормидонтов алгыһынан домноото.

Олус талааннаах Дьүрүйээнэ, Святослав Эверстов, Семен Ченянов, Саарын, Анастасия Готовцева, Мария Михайлова о.д. а. курдук артыыстартан бары үтүө санаанан салайтаран, Тихоммытын төһө кыахтаахпытвнан өйүүрбүтүн биллэрэн, дуоһуйан тарҕастыбыт.

Хаартыска: Ааптар түһэриитэ.