Кэмпириэнсийэ саҕаланыытыгар Ил Түмэн Бэрэссэдээтэлин солбуйааччы Антонина Григорьева Ил Түмэн аатыттан эҕэрдэ тылы эттэ. Вице-спикер бэйэтин этиитигэр оҕо аймаҕы духуобунай-нравственнай өттүнэн иитии билиҥҥи туругун хайдах сыаналаабытын, ордук тугу тоһоҕолоон бэлиэтээбитин, итиэннэ оскуола иннинээҕи саастаах оҕолору иитиигэ көрүүлэрин туһунан сиһилии хаһыат кэлэр нүөмэригэр ааҕыаххыт.
Үөрэх үлэһиттэрин өрөспүүбүлүкэтээҕи сүбэ мунньахтара тохсунньу 27-31 күннэригэр, пандемиянан сибээстээн, онлайн киэбинэн, Zoom уонна Youtube былаһааккаларынан ыытыллар. Иитии-үөрэтии эйгэтин үлэһиттэрин таһынан, судаарыстыбаннай былаас уорганын бэрэстэбиитэллэрэ, научнай үлэһитэр, оскуолаҕа үөрэнэр оҕолордоох төрөппүттэр, уопсастыбаннай тэрилтэлэр бэрэстэбиитэллэрэ кытталлар. Былааннаммыт дьаһаллар бырагыраамалара киэҥ, «Үөрэхтээһини тупсарыы ньымата», «Саҥардыллыбыт бырагыраамалары олоххо киллэрии усулуобуйатын тэрийии», «Үөрэхтээһин түмүгэр ирдэбиллэри киллэрии» диэн үс сүрүн хайысханан аттарыллан, методика сэминээрдэрэ, онлайн-лиэксийэлэр, «төгүрүк остуоллар», бырайыактар сиэссийэлэрэ, дискуссионнай былаһааккалар тэриллэллэр. Ону таһынан, төрөппүт мунньаҕа, үөрэх миниистирэ Ирина Любимова ааспыт сылга ыытыллыбыт үлэ-хамнас туһунан сырдатар аһаҕас отчуота, педагогтар идэлэрин үрдэтэр куурустар, кыра саастаах оҕолор төрөппүттэригэр сүбэлэр, «Бүтүн Арассыыйатааҕы төрөппүттэр мунньахтара» хамсааһын Саха сиринээҕи салаатын сэбиэтин мунньаҕа уо.д.а. буолуохтара.
- 0
- 0
- 0
- 0
- 0
- 0