Издательский дом Редакция Подписка
Погода в Якутске: . -12 oC

Саха Өрөспүүбүлүкэтин Тутууну уонна дьиэни-уоту кэтээһиҥҥэ судаарыстыбаннай управлениетын аатыгар үксүн хомунаалынай өҥө төлөбүрүн хаттаан аччатан аахтарыыны хайдах оҥорор туһунан ыйытыы киирэр эбит.

Саха Өрөспүүбүлүкэтин Тутууну уонна дьиэни-уоту кэтээһиҥҥэ судаарыстыбаннай управлениетын аатыгар үксүн хомунаалынай өҥө төлөбүрүн хаттаан аччатан аахтарыыны хайдах оҥорор туһунан ыйытыы киирэр эбит.

-- Чуолаан уопсай дьиэ бөҕүн (ТКО) тиэйиигэ туһуламмыт боппуруос үгүс. Онон ханнык түгэннэргэ “перерасчет” оҥорторуохтарын сөбүн быһааран биэриим, -- диэн кэпсээн саҕалыыр госстройжилнадзор салайааччытын солбуйааччы Павел Корнилов. – Өскөтүн кыбартыыра хаһаайына 5 күнтэн сыл аҥаара кэм устата дьиэтигэр олорботох буоллаҕына, кэккэ өҥөлөргө чэпчэтиилэри оҥорторуон сөп.

ЖКХ

-- Ханныктарга, холобур?

 -- Сылаас уонна тымныы ууга, бөҕү тиэйтэриигэ, канализацияҕа, гааска, уокка.

Уопсай дьиэни көрүү-истии, хапытаалынай өрөмүөн, ону тэҥэ араадьыйа, антенна, дьиэни сылытыы, гааһы уонна уоту ити сыалга туһаныы өҥөлөрүн төлөбүрдэригэр хаттаан аччатан ааҕыы оҥоһуллубат. 

-- Дьиэбэр олорботохпун хайдах дакаастыыбын?

  -- Ханна эмэ өр буола барыаххытын иннинэ эбэтэр, дьиэҕитигэр төннөн кэлэн баран, 30 күн иһигэр салайар хампаанньаҕытыгар сайабылыанньа биэрэ охсуоххутун наада. Онуоха чахчы атын сиргэ сылдьыбыккытын туоһулуур докумуоннардаах буолуохтааххыт: айаҥҥыт билиэттэрэ, путевкаҕыт, командировочнайгыт, балыыһаҕа сыппыккытын туһунан ыспыраапка, даачаҕа сайылаабыккытын бигэргэтэр ТСЖ-тан сурук, гостиницаҕа бронь, о.д.а. УК сайабылыанньаҕытын 5 үлэ күнүн иһигэр көрүөхтээх.

  Аны туран, өссө биир ирдэбил баар – төһө уу, уот, гаас, ититии бараммытын ааҕар тэрил дьиэҕитигэр (уопсай биир эбэтэр бэйэҕитигэр туспа) суох буолуохтаах. Итиэннэ оннук анал прибору туруоруу тиэхиньиичэскэй өттүнэн кыаллыбатын туоһулуур аахтаны сайабылыанньаҕытын кытта тэҥҥэ биэриэхтээххит. Оттон учуотчуктаах буоллаххытына, суох кэмҥитигэр төһөнү аахпытынан төлүүргүтүгэр тиийэҕит.

1 33

-- Бука, сорохтор: “Мин олорботох кэммэр ууну да, уоту да туһамматым, онон тугу да төлөөбөппүн”, -- диэн туруорса сатыыллара буолуо дии?

-- РФ Дьиэҕэ-уокка кодексын 155-с ыстатыйатын 11-с пуунугар “неиспользование собственниками, нанимателями и иными лицами помещений не является основанием невнесения платы за жилое помещение и коммунальные услуги” диэн ырылхайдык сурулла сылдьар. Онон хомунаалынай төлөбүрдэртэн төрүт төлөрүйүөхпүт дии санаамаҥ, син биир ханнык эмэ чааһын төлүүргүтүгэр тиийэҕит. Хас да кыбартыыралаах киһи олорор-олорбот дьиэтин ахсын барытыгар төлүөхтээх.

-- Бөхпүт боппуруоһугар төннүөххэ...

-- 2020 сыл тохсунньутуттан хомунаалынай кытаанах бөҕү тиэйии төлөбүрэ кыбартыыраҕа хас киһи пропискалааҕыттан суоттанан ааҕыллар буолбута. Ол иннинэ 2019 сылга диэри дьиэ иэниттэн тутулуктааҕа. Онон өскөтүн эрдэ 4 киһи пропискалаах эбит, оттон билигин 2 эрэ буоллаҕына, “выпискаламмыттарын” туоһулуур ыспыраапканы МФЦ-тан ылан, УК-ҕытыгар илдьэн биэриҥ. Түөрт киһи иһин ыла сылдьыбыт ыйдарыгар “перерасчет” оҥортуоххутун сөп. 

img 0844

-- Оттон бөҕү кэмигэр хомуйбат буоллахтарына....

-- РФ Бырабыыталыстыбатын 2011 с. ыам ыйын 6 күнүнээҕи 354-с №-дээх дьаһалынан, өҥөнү хаачыстыбата суох оҥорор (холобура, бөҕү ситэ хомуйбаттар), биитэр төрүт да эбээһинэстэрин толорбот (тиэйбэттэр даҕаны), эбэтэр тохтуу-тохтуу, быһа-быһа (хастыы эмэ күн мунньа-мунньа) ыраастыыр буоллахтарына, ити өҥө иһин төлөбүргүтүн аччатан аахтарар бырааптааххыт.

Кытаанах хомунаалынай бөҕү тиэйии кыраапыктаах: таһырдьа +5 C кыраадыстан намыһах температура турар буоллаҕына, үс хонукка биирдэ, оттон халлаан +5 C кыраадыстан сылыйдаҕына, хас күн аайы тиэйиэхтээхтэр. Ити бэрээдэги кэстэхтэринэ, салайар хампаанньаҕыт бэрэстэбиитэлин ыҥыран, аахта толорторуохтааххыт. Өскөтүн болдьоммут бириэмэҕэ УК-тан ким да кэлбэтэҕинэ, кыбартыыра дуу, дьиэ дуу олохтооҕо бэйэтэ бэрэбиэркэни ыытара уонна аахтаны толороро көҥүллэнэр. Арай ирдэбилэ диэн, соҕотох бэйэтэ эрэ буолуо суохтаах. Атын киһи эмиэ (хас да буолаллара өссө ордук), сөбүлэһэрин уонна туруорсарын биллэрэн, илии баттыахтаах. 

Ол докумуону илдьэ, салайар хампаанньатыгар тиийэр уонна бөҕү тиэйии төлөбүрүн аччатан ааҕалларыгар сайабылыанньа суруйар. Икки нэдиэлэ иһигэр УК харда биэриэх тустаах. Өскөтүн аччатан ааҕартан дуу, биитэр ыйбыт итэҕэстэрин туоратартан аккаастанар дуу буоллаҕына, биһиги Адрес электронной почты защищен от спам-ботов. Для просмотра адреса в вашем браузере должен быть включен Javascript. диэн электроннай аадырыспытыгар эбэтэр dom.gosuslugi.ru систиэмэ «Управление госстройжилнадзора РС(Я) (ОГВ субъекта РФ, Контролирующий орган, ГЖИ)» диэн салаатыгар үҥсүү суругу түһэриэххитин сөп. Сокуоҥҥа олоҕуран, бу боппуруоһу сөптөөхтүк быһаарыахпыт.

-- Ааҕааччыбыт ыйытар: “Куоракка кэтэх дьиэҕэ олоробун. Биир үтүө күн эрэгийиэннээҕи оператортан сурук кэллэ: бөҕү тиэйии иһин төлөөбөккө сылдьар үһүбүн. Улахан суума мунньуллубут, иэскэ ыйаммыппын. Мин ол операторы кытта дуогабар түһэрсибэтэҕим. Бөҕү кутар контейнердарын харахтаан да көрө иликпин, ханна баарын да билбэппин. Уонна тоҕо төлүөхтээхпиний?» -- диэн.

 -- 2019 сыл тохсунньутуттан кэтэх да, уопсай да дьиэлэргэ олорооччулар бары кытаанах хомунаалынай бөҕү тиэйии иһин булгуччу төлүөхтээхтэр. Ол туһунан Федеральнай сокуон 89-с №-дээх сокуонун 24.7 ыстатыйатын 4-с пуунугар бигэргэнэр.

3LAH66FQ

Дуогабар түһэрсибэтэҕим” диэн боппуруоска тохтуохха. Федеральнай сокуон ити үөһэ ыйыллыбыт ыстатыйатыгар этиллэринэн, эрэгийиэннээҕи оператор дуогабара “публичнай оферта” буолар. Ол аата эрэгийиэннээҕи оператор кытаанах хомунаалынай бөҕү тиэйии туһунан этиилэрин уонна дуогабарын бэйэтин саайтыгар уонна хаһыаттарга бэчээттэтэр. Бу иһитиннэрии тахсыбытын кэннэ, 15 күн устата дьиэ хаһаайына дуогабар түһэрсэргэ ирдэнэр докумуоннары эрэгийиэннээҕи операторга ыыппатах, тиксэрбэтэх буоллаҕына, 16-с күнүттэн быһалыы, нууччалыы эттэххэ, автоматически кинилиин дуогабар кэтэхтэн оҥоһуллар.

 Аны, “контейнеры харахтаабатаҕым, ханна баарын да билбэппин” диэн этиитигэр бу курдук чопчулаан биэрэбин: чааһынай секторга бөх кутар баахтары оҥорторон туруоруу – муниципальнай тэриллии эбээһинэһигэр киирэр, ол эбэтэр нэһилиэктэр дьаһалталарыгар, салайар хампаанньаларга. Эрэгийиэннээҕи оператор тиэйэр эрэ өҥөнү оҥорор.

Бөх быраҕар туочукалар бэйэ-бэйэлэриттэн 8-10 м тэйиччи буолуохтаахтар. Ону учуоттаан, итиэннэ СанПин “контейнер дьиэттэн 20 м ыраах уонна 100 миэтэрэттэн  чугас сиргэ баар буолуохтаах” диэн ирдэбилин тутуһан, чопчу ханна турарын кэтэх дьиэлэргэ олорооччулар бэйэлэрэ быһаарыахтаахтар. Онуоха тиэйэр улахан массыына сатаан батан киирэр, эргийэр киэҥ-аһаҕас сирин талыахтаахтар.

Өскөтүн контейнер эн дьиэҕиттэн 100-тэн тахса миэтэрэ тэйиччи уонна онно хааман тиийэр суол суох буоллаҕына, эрэгийиэннээҕи оператор өҥөтүн толорботоҕунан ааҕыллар. РФ Дьиэҕэ-уокка кодексын 157 ыстатыйатыгар, итиэннэ РФ Бырабыыталыстыбатын 2011 с. ыам ыйын 6 күнүнээҕи  354-с нүөмэрдээх уурааҕын 148 пуунугар олоҕуран, өскөтүн хомунаалынай өҥө оҥоһуллубатах буоллаҕына, хомунаалынай төлөбүр кээмэйин кыччатан аахтарар эбэтэр букатын да төлөөбөт курдук туруорсар бырааптааххыт.

Контейнер суоҕун олохтоох дьаһалтаҕытыгар эбэтэр салайар хампаанньаҕытыгар баран быһаарсыаххытын наада. Оттон оҥоһуллубатах өҥө иһин ылбыт харчыларын төнүннэрээри гынар буоллаххытына,  эрэгийиэннээҕи операторга тиийэҕит. Өскөтүн онно да туох да миэрэни ылбатахтарына, Роспотребнадзорга баран этэҕит: “Эрэгийиэннээҕи оператор санитарнай-эпидемиологическай нуорманы уонна контейнердары тутуу быраабылатын тутуспата”, -- диэн. Оттон төлөбүр тарыыбын үрдүк дии саныыр буоллаххытына, СӨ Сыана бэлиитикэтигэр кэмитиэтин аатыгар суруйуоххутун сөп. Хас үҥсэр-ирдиир сайабылыанньаҕытын барытын видео, хаартыска туоһулаах биэрэргит тоҕоостоох.

Тустаах тэрилтэлэртэн ылбыт хоруйдаргытын кытта сөпсөппөт буоллаххытына, СӨ борокуратууратыгар үҥсүү түһэриэххитин эбэтэр сууттаһыаххытын сөп. Ол эһиги көҥүлгүт уонна быраапкыт, ким да ону хааччахтаабат, буойбат-хаайбат.

--Павел Валерианович, бөҕү тиэйии, ол өҥө төлөбүрүн аччатан аахтарыы туһунан сиһилии кэпсээбиккэр махтанабын.

 

  • 0
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением