Тутуу

Күүтүүлээх эбийиэги тутуу былаан быһыытынан этэҥҥэ бардаҕына, эһиил үһүс кыбаарталга  үлэҕэ киириэҕэ. Санатар буоллахха, оҕо саада «Демография» национальнай бырайыак чэрчитинэн, федеральнай бүддьүөттэн үбүлэннэ. Тутуу уопсай суумата 138 мөл. 243 тыһ. солк. тэҥнэһэр. Социальнай эбийиэк тутуутун хаамыытын Сергей Никитин салайааччылаах «Тутуу дирекцията» үүннүөҕэ-тэһиинниэҕэ. Тустаах тэрилтэ Амма улууһугар оҕо искусствотын дьиэтин, спортивнай сааланы, олорор дьиэлэри, о.д.а улахан тутуулары ыыппыта. Онон олохтоохтор күүтүүлээх хас эмэ сыл устата сыраласпыт туруорсуулара олоххо киирээри тутуу саҕаламмытыттан  сүрдэрэ көтөҕүлүннэ, үөрүүлэрэ үрдээтэ. Оҕо саадын сэбиэдиссэйэ Полина Кононова: “Биһиэхэ  саҥа оҕо саада тутуллара олус улахан суолталаах. Кырачааннарбыт барахсаттар эргэ, иҥнэри барбыт,  тымныынан аргыйар дьиэҕэ сылдьыбыттара ыраатта. Ыччат сөбүлээн олохсуйан сыл аайы кэҥии турар нэһилиэккэ саҥа дьиэ тутулларын туруорсубуттара тыын боппуруос буолбута уонтан тахса сыл буолла. Ол иһин, саҥа тутуу саҕаланар буолбутугар нэһилиэкпит баһылыга Мария Захарова  көҕүлээһининэн, олохтоохтор бука бары биир киһи курдук турунаммыт эргэ дьиэни көтүрэн, тутуу миэстэтин ыраастаан биэрбиппит. Тутуу саҕаланарыгар улахан көмөнү улууспут баһылыга Николай Архипов, Ил Түмэн дьокутааттара Руслан Федотов, Сергей Ларионов  оҥордулар. Руслан Еремеевич тутууну ыытыыга бастакынан көмөлөспүтүн түмүгэр барыта саҕаланан барбыта.  Онон киниэхэ олохтоохтор махталбыт муҥура суох”, – диэн үөрүүтүн үллэһиннэ.

Тыа хаһаайыстыбатыгар былдьаһыктаах күннэр үүннүлэр

Руслан Федотов  өрөспүүбүлүкэҕэ биллэр-көстөр урбаанньыт уонна меценат буолар. Кини Саха сиригэр бастакынан кэриэтэ тыа хаһаайыстыбатыгар  улахан оруолу ылар анал тиэхиньикэлэри аҕалан атыыга таһаарбыта.  Кини сөптөөх үлэни ыыппытын түмүгэр билигин өрөспүүбүлүкэ тыатын хаһаайыстыбатыгар үлэлии сылдьар бааһынай  хаһаайыстыбалар, биирдиилээн да дьон анал тиэхиньикэнэн толору хааччылла тураллар. Уһун кыһыннаах кыстыгы этэҥҥэ туораан, сандал саас кэлэн, күөххэ үктэнэрбит бу тиийэн кэллэ эбээт. Коронавирус дьаҥа турбатаҕа буоллар дэлэлээх үчүгэй буолуо этэ дуо? Барыта этэҥҥэ буолуо диэн эрэниэҕиҥ!  Сандал саас кэлэн, билигин  Саха сирин үрдүнэн сааскы ыһыыга бэлэмнэнии номнуо саҕаланна. Биллэрин курдук, ыһыы үлэтин болдьоҕо олус кылгас. Ити үлэни көрүөх бэтэрээ өттүгэр үмүрүтэ охсорго, биллэн турар, анал тиэхиньикэлэр наадалар.  Ити быһаарыллар  кыахтаах.  Бүгүн муус устар 6 күнүгэр  тимир суолунан атыыга «МТЗ-82.1” (бөлөрүүс) тыраахтырдар уонна  ыһыыга туһаныллар сири көбүтэр сеялкалар кэллилэр. Балар Аллараа Бэстээххэ «Сенокос техника»  уонна Дьокуускайга «Руслан» диэн маҕаһыыннарга атыыга таҕыстылар.

Руслан Федотов тэрилтэтин сүрүн сыала-соруга -- бааһынай хаһаайыстыбалары тиэхиньикэнэн, саппаас чааһынан, сиэмэ бурдугунан хааччыйыы. Коронавирус дьаҥыттан сылтаан ыһыы хампаанньата харгыстанара адьас сатаммат. Бу тыа сирин хас биирдии олохтооҕун уонна тыа хаһаайыстыбатын кэскилэ, уйгу-быйаҥ төрдө буоларын умнуо суохтаахпыт.  Тыа сирин дьоно-сэргэтэ хороҕор муостааҕы, сыспай сиэллээҕи хото ииттэҕинэ эрэ үптэнэр-астанар кыахтааҕын бу ыгым кэмҥэ саныырбыт  тоҕоостоох.

«Тэрилтэм хаһаайыстыбалар иннилэригэр ылыммыт эбээһинэһин, дуогабарын хайаан да толорор санаалаах.  Онон бүгүҥҥэттэн дьонум үгүстэрэ үлэҕэ таҕыстылар. СӨ бырабыыталыстыбатын дьаһалтата үлэлиирбитин өйүүр. Сотору кыһыҥҥы суол хаалан айан-сырыы харгыстаныа турдаҕа. Ол иннинэ тутуу былдьаһан, хоту улуустары саппаас чааһынан, анал тиэхиньикэлэринэн  хайаан да хааччыйыахпытын наада. Маннык уустук кэмҥэ бары үлэлээх буолуохтаахпыт. Ол туһунан РФ Президенэ Владимир Путин,  Ил Дархаммыт Айсен Николаев эттилэр. «Ыксал буолла, балаһыанньабыт ыараата” диэн  үлэһиттэрим ыстаатын сарбыйа сатыырым сокуоҥҥа да эппиэттээбэт, суобаһым да ылыммат. Онон бу уустук кэмҥэ ыһыктынан кэбиспэккэ, иннибитигэр туруоруммут сорукпутун толордохпутуна табыллар. Санитарнай булгуччулаах ирдэбиллэри толорон, тутуһан бары үлэһиттэрим дьаҥтан харыстанар маасканан, атын да анал тэриллэринэн толору хааччылыннылар», -- диэн Руслан Еремеевич бигэ санааны ылыммытын туһунан иһитиннэрдэ.